1 Sakonɔ 28 - WE NU GALE 1995

Salɔmɔ a dɛ sɛ tɔa Tɛmpɛlo olo Davidi

¹ Nwa Davidi mba li ogã wi ngɔ obe Israɛlɛ vɛ̃ tɛ Yeruzalɛmɛ: ogã wi ngɔ nu kpala winɔ, ogã wi ngɔ sodanɔ 'da nwa, ogã wi ngɔ osoda koto, do osoda kama kpo, ogã wi zɔ mɔ tɛ mɛnɔ do onadalamɛnɔ 'da nwa, do obenɔ 'da a mba do Owi tɔ̃ mbula hã nwa, do onga sodanɔ, do owinɔ kɛ wa a owi dĩ ni.

² Nwa Davidi kulu ngɔ, nɛ a tɔ̃ hã wa na: “Nɛ, owinɔ 'da mi, do nɛ, onya mi, nɛ zélé mi sɛ! Mi zi do linggamɔ we dɛ tɔa Tɛmpɛlo, we e Sanduku Gba Tɔkɛ 'da nwa kɔ nɛ. Sanduki ni, ma ɔ nɛ mɔ a nyanga Gale 'da lɛ ngɔ nɛ ni. Mi 'dafa zi mɛnɔ vɛ̃ we nɛ,

³ nɛ Gale tɔ̃a hã mi na, mi a mi dɛ́ sɛ tɔa Tɛmpɛloe, kɛ wa dɔnggɔ sɛ ɛ kɔ nɛ ni gɔ. We kɛ mi a wi bi bolo, nɛ mi a tɔkɔ tɛ Owele nu wena.

⁴ Nɛ nde NWA Gale 'da lɛ obe Israɛlɛ saka mi sanga nu fɛlɛ kula 'da baa mi, takɔ mi do obe zã mi, lɛ dungu nwa ngɔ nù Israɛlɛ fai. Zi dati, nɛ a saka nu kpala Yuda na, nwa hɔ kɔ nɛ. Nɛ dɛ kɔ nu kpala Yuda ni, a saka nu fɛlɛ kula 'da baa mi. Nɛ dɛ kɔ nɛ ni, ma dia tɛ NWA ngboo na, a saka mi dɛ sanga wa ni do nwa ngɔ obe Israɛlɛ vɛ̃.

⁵ Nɛ dɛ sanga gba gili obenɔ kɛ NWA hã wa hã mi ni, a saka Salɔmɔ na, a dungu nwa ngɔ obe Israɛlɛ, owinɔ 'da a olo mi.

⁶ NWA Gale tɔ̃a hã mi na: ‘Be 'da mɔ Salɔmɔ a dɛ sɛ tɔa Tɛmpɛloe, do li fanda hã mi. We kɛ wi mi saka a wi a a. A sɛ a be 'da mi, nɛ mi sɛ a baa a.

⁷ Mi 'dafa dɛa to nwa 'da a na, ma 'bana fai. Mi dɛ sɛ ni, do 'da fala kɛ a e sila a ngboo ngɔ dɛ mbulanɔ 'da mi, ɔ nɛ kɛ a dɛ ma sɔɛ gɛ ni.

⁸ Kɔ dɔ̃ ni, aa onyae, owinɔ 'da NWA, dɛ dati Gale 'da lɛ, kɛ a zele lɛ gɛ, do dati nɛ obe Israɛlɛ vɛ̃, nɛ 'bílí do kɔ sila nɛ we dɛ mbulanɔ 'da NWA Gale 'da lɛ. Nɛ dɛ na mɛ ni, nɛ dia nùi kɛ nɛ ngɔ nɛ gɛ, ma 'bana sɛ do mɔ nɛ, nɛ nɛ hã sɛ ma hã obe zã nɛ do mɔ wa fai.’ ”

⁹ Nɛ 'do ki ni, nɛ a tɔ̃ hã Salɔmɔ na: “Salɔmɔ be 'daa, ma wia na, mɔ ĩ ti Gale kɛ mi dɛa toe hã a ni. Nɛ mɔ dɔnggɔ a do sila mɔ kpo, do hi wi 'da mɔ vɛ̃. Mba gɔ, NWA zɔ mɔ gbaa kɔ sila wele, nɛ a ĩ ti linggamɔ zã wele. Mɔ fa a, nɛ mɔ kpa sɛ a. Kɔ mɔ bɛ̃ gɛnɛ a, nɛ a da sɛ kɔ̃ a tɛ mɔ fai.

¹⁰ Ngangga ni, mi zɔa na, NWA saka mɔ, takɔ mɔ dɛ tɔa Tɛmpɛloe kɛ mɛ sɛ a fala dɔnggɔ do a ni. Kɔ mɔ ɔ́ do kpã sila, hã mɔ ndo toe.”

Davidi hã hi tɔa Tɛmpɛloe a dɛa ni hã Salɔmɔ

¹¹ Davidi dɛa mbɔkɔ hi tɔa Tɛmpɛloe, nɛ a hã ma hã Salɔmɔ. A hã ma hã a, mba do hi o'bili tɔanɔ kɛ zã nɛ ni, do otɔa usu do omɔ olo gã golenɔ, do 'bili tɔanɔ kɛ ngɔ, do kɛnɔ kɔ nɛ, do fala kɛ ma santo wena, we e do Sanduku Gba Tɔkɛ ni.

¹² Nɛ a hã 'bɔ mbɔkɔ hi mɛnɔ vɛ̃ kɛ a kɔa zi we dɛ ma ni hã a, ɔ nɛ li fanda Tɛmpɛloe, do 'bili kɔ tɔanɔ kɛ zã li fanda ni, do 'bili kɔ tɔanɔ we usu do omɔ olo gã golenɔ kɔ Tɛmpɛloe ni, do omɛnɔ kɛ ma santo, nɛ wa hã ma hã Gale ni.

¹³ Nɛ a hã li ngɔ gili onganganɔ do olevitɛnɔ, do li tonɔ kɛ ma dɛ sɛ tɛ̃ ɛ kɔ Tɛmpɛloe 'da NWA, do li omɔ dɛ do toe 'da fala sambala tɛ kɔ Tɛmpɛloe ni.

¹⁴ Nɛ a be tɛlɛ tɛ dĩ mɔ mbali do dĩ fɛ̃a mɔ bolo kɛ ma wia na, wa dɛ do mɔ kpo kpo, ɔ nɛ tɛlɛ tɛ dɛa to nɛ ni.

¹⁵ A bia dĩ mɔ a do mwindanɔ, do dĩ mɔ 'be do mwindanɔ,

¹⁶ do dĩ omɛsa mɔ mbali kpo kpo kɛ wa dɛ sɛ ma we a mapanɔ kɛ wa hã ma hã Gale ngɔ nɛ ni, do dĩ omɛsa fɛ̃a mɔ bole,

¹⁷ do dĩ okanya dumu do mulu sa'denɔ, do dĩ saninɔ kɛ wa kpɔ do tɔkɛ we kpã tɛ mɛnɔ, do dĩ be mɔlangi kɛ wa dɛ sɛ do mɔ mbali kɛ 'dɔlɔ nɛ zã nɛ bina, do dĩ gba sani kɛ wa dɛ sɛ do mɔ mbali do fɛ̃a mɔ bolo.

¹⁸ A bia 'bɔ dĩ gbagala dɔ do fũ yɔmbɛ, kɛ wa dɛ sɛ ma do mɔ mbali kɛ 'dɔlɔ nɛ zã nɛ bina ni. 'Do nɛ, nɛ a be 'bɔ dĩ ngilingili kɛ ma santo, do hi mɛnɔ kɛ wa ɔ nɛ wele, nɛ wa dɛa ma do mɔ mbali, nɛ sala 'baka ma gulu ngɔ Sanduku Gba Tɔkɛ 'da NWA ni.

¹⁹ Nɛ nwa Davidi na: “Mɛnɔ kɛ mi bia vɛ̃ ni, mɛ a kɛ NWA bia hã mi, nɛ mi kɔma ma ni. Nɛ 'buki ni tɔ̃ gulu mɛnɔ vɛ̃ kɛ ma wia na wa dɛ ni.”

²⁰ Nɛ a tɔ̃ 'bɔ na: “Be 'daa, mɔ ɔ́ do kpã sila, nɛ gbãlã tɛ mɔ sɔ̃, nɛ mɔ tɛ dɛ̃ toe do kili gɔ. NWA Gale 'da mi lá sɛ mɔ ni iko gɔ. A sɛ fala nɛ kpo do mɔ, nɛ a gala sɛ mɔ gbaa na, dɛa to tɔa Tɛmpɛloe ma e.

²¹ Ngɔ gili nganganɔ do levitɛnɔ kɛ wa dɛ sɛ sambala kɔ tɔa Tɛmpɛloe ni, wa vɛ̃ kɛ zã mɔ gɛ boe. We duzu toe kɛ mɔ nɛ dɛ ma ni, mɔ wia we gbini zã mɔ do owinɔ kɛ wa do dia sila, do hã zã dɛa to, do ogã winɔ do owinɔ vɛ̃ wa dɛ olo nu mɔ ni.”