1 Sakonɔ 27 - WE NU GALE 1995

Davidi 'dafa dɛa to soda ngɔ nù Israɛlɛ

¹ Kɛ gɛ a li obe Israɛlɛ kɛ wa dɛ to mbati 'da nwa ni: Wa a ogã wi kɔ nu fɛlɛ kulanɔ, do ogã wi ngɔ osoda koto kpo, tabi ngɔ osoda kama kpo, do ogã wi ngɔ Owi dɛa tonɔ. Wa kɛ̃a sodanɔ do ngɔ gili wa 'bu ngɔ nɛ bɔa do 'da zu zɛkɛnɔ kɔ sabɛlɛ. Nɛ ngɔ gili sodanɔ ni, wa dɛ zi toe we zɛkɛ kpo, nɛ wa yapa ngba wa. Nɛ ngɔ gili osoda kpo, nɛ wa kpa osoda 'bu koto bɔa ngɔ wa nalɛ.

^2-15 Ngɔ gili sodanɔ ni vɛ̃ wa ti mbula 'da ogã winɔ gɛ: Kɔ kuti zɛkɛ, wi a Yasobamɛ, be 'da Zabdiɛlɛ, wi kɔ nu fɛlɛ Perɛsi. A do tɛ̃ a hã a ba zi nu a hã ngɔ gili ogã wi ngɔ sodanɔ kɔ zɛkɛ ni. Nɛ kɔ bɔa zɛkɛ, wi a Dodai, wi Ahoa. Nɛ wi gbaka a tɛ toe ni wi a Miklɔtɛ. Nɛ kɔ talɛ zɛkɛ, wi a Bɛnaya, be 'da gã nwa nganga Yoyada. Bɛnaya a mbe kpo kɔ ngɔ gili sodanɔ 'bu wa talɛ ni. 'Da fala kɛ a nɛa we hɔ gã wi ni, nɛ be 'da a Amizabadɛ hɔ wi kpe dati ngɔ gili sodanɔ olo a. Nɛ kɔ nalɛ zɛkɛ, wi a Asaɛlɛ, nya Yoabɛ, nɛ 'do a, nɛ be 'da a Zɛbadia ba toe olo a. Nɛ kɔ mɔlɔ zɛkɛ, wi a Samutɛ, wi kɔ nu fɛlɛ Izira. Nɛ kɔ gazɛlɛ zɛkɛ, wi a Ira, be 'da Ikɛsi, wi Tekoa. Nɛ kɔ sambo zɛkɛ, wi a Helɛsi, wi Paloni, kɔ nu kpala Efraimɛ. Nɛ kɔ ngbɛ'dɛ'dɛ zɛkɛ, wi a Sibkai, wi Husa, kɔ nu fɛlɛ Zera. Nɛ kɔ kusi zɛkɛ, wi a Abiezɛrɛ, wi Anatɔtɛ, kɔ nu kpala Bɛnzamɛ. Nɛ kɔ zɛkɛ kɛ 'bu, wi a Marai, wi Nɛtofa, tɛ kɔ nu fɛlɛ Zera. Nɛ kɔ zɛkɛ kɛ 'bu ngɔ nɛ kpo, wi a Bɛnaya, wi Piratoni, kɔ nu kpala Efraimɛ. Nɛ kɔ zɛkɛ kɛ 'bu ngɔ nɛ bɔa, wi a Hɛldai, wi Nɛtofa, kɔ nu fɛlɛ Otniɛlɛ.

Ogã winɔ ngɔ nu kpala obe Israɛlɛ

^16-22 Nɛ zélé li ogã winɔ ngɔ nu kpala obe Israɛlɛ. Kɔ nu kpala Rubɛnɛ wi a Eliezɛrɛ, be 'da Zikri. Kɔ nu kpala Simeoni wi a Sɛfatia, be 'da Maaka. Kɔ nu kpala Levi wi a Hasabia, be 'da Kɛmuɛlɛ. Obe zã Aroni, wi a Sadɔkɛ. Kɔ nu kpala Yuda wi a Elihu, mbe kpo kɔ onya Davidi. Kɔ nu kpala Isakarɛ wi a Omri, be 'da Mikaɛlɛ. Kɔ nu kpala Zabuloni wi a Isɛmaya, be 'da Obadia. Kɔ nu kpala Nɛftali wi a Yɛrimɔtɛ, be 'da Azriɛlɛ. Kɔ nu kpala Efraimɛ wi a Oze, be 'da Azazia. Nɛ kɔ mbee nu kpala Manase kɛ si 'biti gɛ̃a wese wi a Yɔɛlɛ, be 'da Pɛdaya. Nɛ mbee nu kpala Manase si 'biti gba wese, kɛ wa ɔ ngɔ nù Galadɛ ni, wi a Ido, be 'da Zakaria. Kɔ nu kpala Bɛnzamɛ wi a Yasiɛlɛ, be 'da Abnɛrɛ. Kɔ nu kpala Danɛ wi a Azarɛlɛ, be 'da Yɛroamɛ. Ki ni a li ogã wi ngɔ nu kpala obe Israɛlɛ a ni.

²³ Nwa Davidi tɔ̀lɔ̀ zi obe zagbãlãnɔ kɛ wa dɛ ti 'bu sabɛlɛ bɔa ni gɔ. We kɛ nwa tɔ̃a zi na, obe Israɛlɛ wa dɛlɛ sɛ wena ɔ nɛ sɔlanɔ li nza gɛ.

²⁴ Yoabɛ, be 'da Sɛruya tɔlɔ zi winɔ, nɛ nde wa è gɔ̀, we kɛ zã Gale nɔ̃lɔ̃ dɛ tɛ obe Israɛlɛ, we duzu mɛ kɛ Davidi dɛa ni. Gulu nɛ ma kɛ wa kɔmɔ ngɔ gili owinɔ vɛ̃ kɔ 'buki li nɛ a “Dɛa tonɔ 'da nwa Davidi” ni gɔ.

Ogã winɔ ngɔ mɛnɔ 'da nwa

²⁵ Nɛ zélé li ogã wi ngɔ mɛnɔ 'da nwa: Azmavɛtɛ, be Adiɛlɛ, zi a wi fɔmɔ mɔ olo gã golenɔ 'da nwa. Yonatanɛ, be 'da Oziasi, zi a wi zɔ mɔ tɛ mɛnɔ kɛ wa usu ma ngɔ nùi, do kɔ gã lenɔ do kɔ obe lenɔ, do falanɔ wa zɔ do mɔ ngɔ le ni.

²⁶ Ezri, be 'da Kɛlubɛ zi a gã wi ngɔ owinɔ kɛ wa dɛ toe kɔ fɔnɔ ngɔ nùi ni.

²⁷ Simei, wi Rama, zi a wi fɔmɔ te vinɔnɔ. Zabdi, wi Sɛfamɛ zi a wi fɔmɔ dɔ̃ vinɔɛ kɛ ma yula tɛ wala te vinɔɛ ni.

²⁸ Bala-Hananɛ, wi Bɛtɛ-Gedɛrɛ zi a wi fɔmɔ ofɔ te olivɛnɔ do te sikɔmɔrɛ ngɔ nùi kɛ si ba gɔtɔ ni. Yoasi zi a wi zɔ mɔ tɛ onɔnɔ.

²⁹ Sitrai, wi Saroni a gã wi ngɔ Owi fɔmɔ ngɔmbɔnɔ kɔ ba'denɔ tɛ Saroni ni. Safatɛ, be 'da Adlai zi a gã wi ngɔ owi fɔmɔ ongɔmbɔnɔ tɛ li zɔ̃nɔ gele fala ni.

³⁰ Obilɛ, wi kɔ nu kpala Ismaɛlɛ zi a gã wi fɔmɔ osamonɔ. Yedia, wi Merɔnɔtɛ zi a gã wi fɔmɔ naa pundanɔ.

³¹ Yazizɛ, wi Hagri zi a gã wi fɔmɔ obata do odua. Ki ni a li owinɔ kɛ wa fɔmɔ zi mɛnɔ 'da nwa Davidi gɛ a ni.

Owi tɔ̃ mbula hã nwa Davidi

³² Yonatanɛ, yamba Davidi, zi a wi tɔ̃ mbula hã a. A a wi ĩ ti mbɛti, nɛ a zi do hã zã wena. Yehiɛlɛ, be 'da mbe wi Hakmoni, a a wi be mɔ hã obenɔ 'da nwa.

³³ Ahitofɛlɛ 'bɔ a wi tɔ̃ mbula hã nwa. Husai, be Arɛkɛ, zi a wi tɔ̃ usu we do Davidi.

³⁴ Ahitofɛlɛ fia, nɛ Abiatarɛ do Yoyada, be 'da Bɛnaya wa dungu olo a. Nɛ Yoabɛ zi tɛ mɛ 'bɔ a gã wi ngɔ sodanɔ 'da nwa.