1 Sakonɔ 26 - WE NU GALE 1995

Owi zɔ mɔ tɛ nu ngbo Tɛmpɛloe

¹ Owi zɔ mɔ tɛ nu ngbonɔ wa zi tɛ mɛ 'bɔ do ngɔ gili wa. Kɔ nu fɛlɛ Kore wi zi a Mɛselemia, be 'da Kore, nɛ a be yaa Abiasafɛ.

² A kua obulu be sambo. Li wa yolo ngɔ kuti be, gbaa we hɔ ngɔ tala be ma kɛ: Zakaria, Yɛdiaɛlɛ, Zebadia, Yatniɛlɛ,

³ Elamɛ, Yohananɛ do Eliohenai.

⁴ We Obɛdɛ-Edɔmɛ, Gale wila zi nu a tɛ̃ a, nɛ a kua obulu be ngbɛ'dɛ'dɛ. Li wa yolo ngɔ kuti be, gbaa we hɔ ngɔ tala be ma kɛ: Sɛmaya, Yozabadɛ, Yoa, Sakarɛ, Nɛtaneɛlɛ,

⁵ Amiɛlɛ, Isakarɛ do Peulatai.

⁶ Nɛ kuti be 'da a Sɛmaya kua obe kɛ wa a ogã wi kɔ nu fɛlɛ kula 'da wa ni, we kɛ wa zi a Owi dĩ.

⁷ Obenɔ 'da Sɛmaya wi a Otni, Rɛfaɛlɛ, Obɛdɛ do Elzabadɛ, Elihu do Sɛmakia. Owinɔ wa kɔ̃a gɛnɛ Elihu do Sɛmakia wena.

⁸ Nɛ obe zã Obɛdɛ-Edɔmɛ fala nɛ kpo do obenɔ 'da a ngboo, do mbe wi nanɔ, wa vɛ̃ a owi dĩ. Nɛ wa dɛ toe 'da wa do ngawi. Nɛ owinɔ ni vɛ̃ a Owele 'bu wa gazɛlɛ ngɔ wa bɔa.

⁹ Obenɔ 'da Mɛselemia do onya a, wa hɔa ngɔ gili wele kpo. Wa vɛ̃ a Owi wili 'bu ngɔ wa ngbɛ'dɛ'dɛ, nɛ wa a Owi dĩ.

¹⁰ Kɔ nu fɛlɛ Mɛrari, wi zi a Hosa. A kua obulu be nalɛ: Simri, wele kɛ a ɔ nɛ kuti be kɔ nu fɛlɛ kula ni. Gɛnɛ kɔ a a kuti be gɔ, nɛ nde wi hã ngawi kuti be hã a, wi a baa a.

¹¹ Hilkia, be kɛ bɔa, Tɛbalia be kɛ talɛ, nɛ Zakaria, be kɛ nalɛ. Ngɔ gili obenɔ 'da Hosa do onya a zi a Owi wili 'bu ngɔ wa talɛ.

¹² Ngɔ gili Owi zɔ mɔ tɛ nu ngbonɔ do ogã wi ngɔ wa, wa dɛ zi toe 'da wa kɔ Tɛmpɛlo 'da NWA.

¹³ Nɛ wa tua zeke, nɛ wa gɔnɔ sanga nu ngboe wa nɛ zɔ mɔ se'de ni. Nɛ wa kɛ̃a ma, nɛ nu fɛlɛ kulanɔ kɛ wa dɛlɛ gɔ, do owanɔ wa a dɛla ni, wa kpa ma wia kɔ̃.

¹⁴ Wa tua zeke we gɔnɔ sanga nu ngbonɔ. Nɛ wa hã nu ngbo kɛ si 'biti gba wese ni hã Selemia. Nɛ wa hã nu ngbo kɛ si gbãlã ngɔ hã be 'da a Zakaria, kɛ a zi a dia wi tɔ̃ mbula ni.

¹⁵ Nɛ Obɛdɛ-Edɔmɛ kpa nu ngbo kɛ si ba gɔtɔ, nɛ obenɔ 'da a wa zɔ mɔ tɛ falanɔ wa usu do tolenɔ ni.

¹⁶ Supimɛ do Hosa wa zɔ zi mɔ tɛ nu ngbo kɛ si 'biti gɛ̃a wese, do nu ngbo Salekɛtɛ, kɛ ma si 'biti wala kɛ ma la dɛ ngɔ kala i ni. Wa kɛ̃a sanga owi zɔ mɔ nu ngbonɔ ɔ nɛ kɛ gɛ:

¹⁷ Tũ kpo kpo, nɛ wa a olevitɛ gazɛlɛ na, wa zɔ mɔ tɛ nu ngbo kɛ si ba gɔtɔ. Nɛ wa a Owele nalɛ tɛ nu ngbo kɛ si gbãlã ngɔ, nɛ wa a Owele nalɛ tɛ nu kɛ si ba gɔtɔ. Nɛ wa a Owele bɔa bɔa tɛ fala wa a do tolenɔ ni.

¹⁸ Nɛ we o'bili tɔanɔ kɛ zã nɛ si 'biti gɛa wese ni, wa a Owele nalɛ ngɔ wala nga, nɛ Owele bɔa kɔ tɔa i.

¹⁹ Ki ni mɛ a tɛlɛ tɛ kɛ wa gɔnɔ do sanga Owi zɔ mɔ tɛ nu ngbonɔ, kɛ wa kala wa kɔ nu fɛlɛ Kore do Mɛrari gɛ a ni.

Dɛa tonɔ 'da mbe olevitɛnɔ

²⁰ Dɛa toe 'da mbe olevitɛnɔ zi a fɔmɔ mɔ olo gã golenɔ kɔ Tɛmpɛloe do mɛnɔ kɛ ma santo, kɛ owinɔ wa hã ma hã Gale ni.

²¹ Obe zã Ladanɛ, kɔ nu fɛlɛ Gɛrsoni, kɛ wa a ogã wi ngɔ nu fɛlɛ kulanɔ 'da wa ni, wi a Yehieli,

²² mba do obenɔ 'da a, Zetamɛ do Yɔɛlɛ. Dɛa toe 'da wa mɛ a zɔ mɔ tɛ mɔ olo gã golenɔ kɔ Tɛmpɛlo 'da NWA ni.

²³ Nɛ onu fɛlɛ Amramɛ, Isarɛ, Hebroni do Uziɛlɛ,

²⁴ wi zi a Sɛbuɛlɛ, be zã Gɛrsoni, be 'da Mɔizɛ ngboo ni. A zi a wi zɔ mɔ tɛ omɔ olo gã golenɔ vɛ̃.

²⁵ Nɛ kɔ nu fɛlɛ a ni, wa kpa obe zã Eliezɛrɛ, nya Gɛrsoni. Obenɔ ni wi a Rɛhabia, be 'da Eliezɛrɛ, do Yɛsaya, Yoramɛ, Zikri do Sɛlɔmitɛ.

²⁶ Nɛ Sɛlɔmitɛ do onya a, wa a Owi zɔ mɔ tɛ mɛnɔ kɛ nwa Davidi do ogã wi kɔ nu fɛlɛ kulanɔ do ogã wi ngɔ osoda koto, do ogã wi ngɔ osoda kama kpo, do tala ogã wi ngɔ osodanɔ wa hã ma ni.

²⁷ Owinɔ ni wa hã zi mbe mɛnɔ wa kala ma li bole ni hã Gale, takɔ wa 'dafa do tɔa Tɛmpɛlo 'da a.

²⁸ Nɛ mɛnɔ vɛ̃ kɛ wi gba olo nu Gale Samuɛlɛ, do Saulo, be 'da Kisi, do Abnɛrɛ, be 'da Nɛrɛ, do Yoabɛ, be 'da Sɛruya, wa hã zi ma hã Gale ni, wi zɔ 'bɔ mɔ se'de wi a Sɛlɔmitɛ fala nɛ kpo do onya a.

²⁹ Kɛnania do obenɔ 'da a, kɛ wa a owi nu fɛlɛ Isarɛ ni, wa dɛ zi to mbatinɔ 'da wa ngbala obe Israɛlɛ, nɛ wa zi 'bɔ a owi gɔnɔ we.

³⁰ Nɛ Hasabia do ombe wi wili koto kpo do kama sambo kɛ wa a a owi dĩ kɔ nu fɛlɛ Hebroni ni, wa zɔ zi mɔ tɛ 'bili tɛ nù Israɛlɛ kɛ mɔ yolo nu lì Yɔrdanɛ, nɛ nde ma si 'biti gɛ̃a wese ni. Nɛ wa zɔ mɔ tɛ mɛnɔ vɛ̃, kɛ ma zɔa dɛa to 'da Gale, do kɛnɔ ma zɔa dɛa to 'da nwa ni.

³¹ Yɛria a gã wi kɔ nu fɛlɛ Hebroni. Nɛ kɔ 'bu sabɛlɛ nalɛ dɛa to nwa 'da Davidi, nɛ wa fa we ĩ ti li owinɔ kɔ nu fɛlɛ kula 'da Hebroni ni. Nɛ wa kpa ma tɛ kɔ le Yazɛrɛ, tɛ ngɔ nù Galadɛ na, Owi wili kɛ wa a a Owi dĩ kɔ nu fɛlɛ winɔ ni wa boe.

³² Nɛ nwa Davidi saka Owele koto bɔa do kama sambo kɔ nu fɛlɛ ni, kɛ wa vɛ̃ a ogã wi kɔ nu fɛlɛ kulanɔ ni, na wa zɔ mɔ tɛ mɛnɔ kɛ ma we dɛa to 'da Gale, do kɛnɔ ma we dɛa to mbatinɔ ngɔ 'bili tɛ nù Israɛlɛ si 'biti gba wese. Mɛ zi a nùi kɛ onu kpala Rubɛnɛ do Gadɛ, do mbee nu kpala Manase kɛ wa si 'biti gba wese wa ɔ ngɔ nɛ ni.