1 Sakonɔ 23 - WE NU GALE 1995

Davidi kɛ̃a to hã olevitɛnɔ

¹ 'Da fala kɛ Davidi dɛa zi gbɛlɛ wena ni, nɛ a saka be 'da a Salɔmɔ na, a dungu nwa ngɔ nù Israɛlɛ olo ɛ.

² 'Do nɛ, nɛ a sa mɔ hã ogã wi ngɔ obe Israɛlɛ, mba do nganganɔ do levitɛnɔ vɛ̃.

³ Nɛ wa tɔlɔ okpasa levitɛnɔ kɛ wa do 'bu sabɛlɛ talɛ we kũ dɛ ngɔ ni kpo kpo vɛ̃. Nɛ owinɔ ni vɛ̃ zi a Owele koto 'bu wa talɛ ngɔ wa ngbɛ'dɛ'dɛ.

⁴ Davidi saka sanga wa Owele koto 'bu wa bɔa ngɔ wa nalɛ, takɔ wa zɔ mɔ tɛ to tɔa Tɛmpɛlo 'da NWA. Nɛ a saka 'bɔ Owele koto gazɛlɛ, nɛ a a wa na, wa ɔ ogã wi ngɔ dɛa tonɔ, nɛ wa ɔ 'bɔ a Owi gɔnɔ we.

⁵ Nɛ a a Owele koto nalɛ we zɔ mɔ tɛ ngbo nu tɔa, nɛ Owele koto nalɛ we dɔnggɔ NWA do mɛnɔ kɛ wa ga do zuma ni.

⁶ Davidi gɔnɔ zi sanga olevitɛnɔ do ngɔ gili wa talɛ, dɛ sanga nu fɛlɛ Gɛrsoni, Kehatɛ do Mɛrari.

⁷ Gɛrsoni kua Ladanɛ do Simei.

⁸ Nɛ Ladanɛ ko obulu be talɛ: Yehiɛlɛ, Zetamɛ, do Yɔɛlɛ.

⁹ Nɛ Simei ko obulu be talɛ: Sɛlɔmitɛ, Haziɛlɛ do Haranɛ. Obenɔ ni zi a ogã wi ngɔ nu fɛlɛ kula 'da Ladanɛ.

¹⁰ Simei kua zi 'bɔ mbé obe nalɛ: Yahatɛ, Ziza, Yeusi do Bɛria.

¹¹ Yahatɛ zi a kuti be, nɛ Ziza a be kɛ bɔa. Nɛ Yeusi do Beria wa kò zi obe zã wa dɛlɛ gɔ. We duzu ki ni, wa tɔlɔ zi wa ɔ nɛ nu fɛlɛ kula kpo iko ni.

¹² Kehatɛ kua obe nalɛ: Amramɛ, Isarɛ, Hebroni do Uziɛlɛ.

¹³ Nɛ Amramɛ ko Aroni do Mɔizɛ. Nɛ nwa saka zi Aroni do obenɔ 'da a fala nɛ kpo na, wa ɔ owi dɛ to tɛ fala kɛ ma santo ni fai. Nɛ wa dɔ dɔnggamɔ fũ yɔmbɔ hã ɛ, nɛ wa dɛ to hã ɛ, nɛ wa wele nu wa tɛ winɔ do zu li ɛ NWA.

¹⁴ Wa tɔlɔ zi obenɔ 'da Mɔizɛ wi 'da Gale, do nu kpala Levi, nɛ nde wa zi a onganga gɔ.

¹⁵ Obenɔ 'da Mɔizɛ wi a: Gɛrsɔmɛ do Eliezɛrɛ.

¹⁶ Nɛ Gɛrsɔmɛ kua Sɛbuɛlɛ do kuti be.

¹⁷ Nɛ Eliezɛrɛ ko be kpo, li a a Rɛhabia, nɛ a kò 'bɔ mbe be 'do a gɔ. Nɛ nde obe zã Rɛhabia wa dɛlɛ zi wena.

¹⁸ Nɛ Isarɛ kua Sɛlɔmitɛ do kuti be.

¹⁹ Nɛ Hebroni ko obulu be nalɛ: Yɛria, Amaria, Yaziɛlɛ, do Yɛkamamɛ.

²⁰ Nɛ Uziɛlɛ kua Mika, do Isia.

²¹ Mɛrari kua Mali do Musi. Nɛ Mali ko obulu be bɔa: Elazarɛ do Kisi.

²² Elazarɛ fia, nɛ nde a kò bulu be gɔ, a kua tati nɛ a oboko be iko. Nɛ oboko benɔ ni, wa ba zi ngba wa do oyamba wa, obenɔ 'da Kisi.

²³ Musi kua obulu be talɛ: Mali, Edɛrɛ do Yɛremɔtɛ.

²⁴ Ki ni a li obe zã Levi, kɛ wa a ogã wi kɔ nu fɛlɛ kulanɔ 'da wa ngboo, nɛ wa kɔma do li wa kpo kpo kɔ 'buku kɔmɔ do li owinɔ gɛ a ni. Fala kɛ wa zi do 'bu sabɛlɛ bɔa ni, nɛ wa hã dɛa to kɔ Tɛmpɛlo 'da NWA hã wa.

²⁵ Mba gɔ, Davidi tɔ̃a zi na: “NWA Gale 'da lɛ obe Israɛlɛ a hã dungu fio hã lɛ owinɔ 'da a. Nɛ a ɔ sɛ fai dɛ Yeruzalɛmɛ.

²⁶ Na mɛ ni, nɛ olevitɛnɔ wa bá sɛ 'bɔ tɔa Tande 'da NWA Gale we la nɛ dɛ dati gɔ.”

²⁷ Davidi tɔ̃a zi dati fie 'da a na, wa kɔmɔ li olevitɛnɔ 'da fala kɛ wa do 'bu sabɛlɛ bɔa ni.

²⁸ Nɛ olevitɛnɔ ni a Owi ti mbulanɔ 'da obe zã Aroni, we duzu dɛ toe kɔ Tɛmpɛloe 'da NWA, do li fandanɔ, do kɔ tɔanɔ kɛ tɛ li Tɛmpɛloe. Nɛ wa fɔ́lɔ́ mɛnɔ kɛ ma santo ni, takɔ ma ɔ sa li Gale. Nɛ wa dɛ́ tonɔ vɛ̃ tɛ fala dɔnggɔ do Gale.

²⁹ Nɛ wa dɔ mapanɔ kɛ ma santo ni we hã ma hã Gale. Nɛ wa 'dáfá fũ we hã ma hã Gale. Nɛ wa dɛ́ omukate kɛ wa à ina hana mapa tɛ nɛ gɔ ni, do gato kɛ wa dɔa ma ngɔ mbala mɔ bolo do ogele mapa. Nɛ wa gã́lã́ dɔnggamɛnɔ nu kilo.

³⁰ Nɛ ma wia na, wa ga zuma, we dɔnggɔ NWA, titole do gɛ̃a wese fai.

³¹ Nɛ wa dɛ́ na mɛ ni 'da fala fai, do ngba soe wa dɔ sa'de we dɔnggɔ do NWA do kɔ̃ tũ kpe tɛ wi, do kuti tũ kɔ zɛkɛ, tabi do mbe ogele tũ ɛngganɔ. Nɛ kɔ tũnɔ vɛ̃ wa dɛ sɛ tonɔ 'da wa dati NWA.

³² Wa zɔ sɛ mɔ tɛ tɔa Tande do fala dɔnggɔ do Gale. Nɛ nde onya wa, obe zã Aroni, wa dɛ sɛ tonɔ 'da wa kɔ Tɛmpɛlo 'da NWA.