1 Sakonɔ 22 - WE NU GALE 1995

¹ Gulu nɛ a Davidi na: “Fala dɔnggɔ do NWA Gale, do gbagala kɛ obe Israɛlɛ wa dɔ sɛ sa'de ngɔ nɛ ni, ma sɛ dɛ dɛ.”

Davidi 'dafa we dɛ tɔa Tɛmpɛlo

² Davidi ba nu a na, wa mba li ogele winɔ kɛ wa ɔ sanga obe Israɛlɛ ni. Nɛ a hã dɛa to gba ta hã wa, nɛ a tɔ̃ na, wa sɛ ma ɔ dia, takɔ wa dɛ do tɔa Tɛmpɛlo 'da Gale.

³ A ngɛmɛ li omɔ bolo dɛlɛ wena we dolo do Sɛtɛ, takɔ wa bɛ̃lɛ̃ do gbangga nu tɔa, mba do mɛnɔ kɛ wa kpe sɛ do nu tɔa, nɛ wa kã nɛ ni. Nɛ a ngɛmɛ 'bɔ tũ mɔ bolo dɛlɛ wena,

⁴ mba 'bɔ do gba gili ote sɛdrɛ, kɛ Owi Sidoni do Owi Tirɛ wa tɛa zi do ma hã a ni.

⁵ Davidi dɛa na mɛ ni, we kɛ a tɔ̃ zi do kɔ sila a na: “Be 'da mi Salɔmɔ a 'bana be zagbãlã iko, nɛ li a tɛ ĩ̀ mɔ ngboo gɔ. Ĩ na, tɔa Tɛmpɛlo kɛ wa nɛ dɛ hã NWA gɛ, ma wia na, dɔ̃lɔ̃ li ma do lɛnggɛ dia nɛ, ma yɛ'bɛ ngɔ nùi vɛ̃. Kɔ mi nɛ fa omɔ dɛ do tɔa ni.” Na mɛ ni, nɛ Davidi ngɛmɛ zi li omɔ dɛlɛ wena dati kɛ na a fe ni.

Davidi hã to dɛ tɔa Tɛmpɛloe hã Salɔmɔ

⁶ Davidi sa mɔ hã be 'da a Salɔmɔ, nɛ a ba nu a hã a na, a dɛ tɔa Tɛmpɛlo hã NWA Gale 'da obe Israɛlɛ.

⁷ A tɔ̃a hã a na: “Be 'daa, mi zi do linggamɔ we dɛ tɔa Tɛmpɛlo hã NWA Gale 'da mi.

⁸ Nɛ nde a tɔ̃a hã mi na: ‘Mɔ gbɛa Owele kɔ ogã bolonɔ kɛ mɔ bi ni wena. Kɔ we duzu tɔkɔ tɛ owinɔ ma a nù dati mi ni, wi nɛ dɛ sɛ tɔa Tɛmpɛloe na wa dɔnggɔ mi kɔ nɛ, wi a mɔ gɔ.

⁹ Nɛ nde mɔ ko sɛ bulu be, nɛ be ni sɛ a wi gɛ̃a dungu. Nɛ mi dɛ sɛ na, a kpa gɛ̃a dungu do Owi sɛnɛ a, kɛ wa ɔ kɔ lenɔ kɛ zã a ni, nɛ wa 'dángá sɛ gɛ̃a dungu 'da a gɔ. Nɛ li a sɛ a Salɔmɔ. Gulu nɛ na: Wi gɛ̃a dungu. We duzu kɛ, kɔ dɛa to nwa 'da a, mi zɔ sɛ mɔ tɛ obe Israɛlɛ, nɛ wa kpa sɛ gɛ̃a dungu.

¹⁰ Nɛ a sɛ hã a nɛ dɛ tɔa Tɛmpɛloe hã mi. Nɛ mi sɛ a baa a, nɛ a sɛ a be 'da mi. Nɛ mi dɛ sɛ na, to nwa 'da a ngɔ nù Israɛlɛ ma 'bana fai.’ ”

¹¹ Nɛ Davidi tɔ̃ 'bɔ na: “Be 'daa, e kɔ nwa ɔ do mɔ, hã mɔ dɛ tɔa Tɛmpɛlo, nɛ ma e, ɔ nɛ kɛ a kpua mbulu nɛ hã mɔ ni.

¹² 'Da fala kɛ nwa a e sɛ mɔ do gã wi ngɔ obe Israɛlɛ ni, nɛ e kɔ a hã sɛ ĩ ti gɔnɔ sanga mɔ do hã zã hã mɔ, takɔ mɔ dɛ mbula nu a.

¹³ Fala kɛ mɔ dɛ mbulanɔ kɛ NWA hã zi ma hã Mɔizɛ na, a hã ma hã obe Israɛlɛ ni vɛ̃, nɛ mɛnɔ kɛ mɔ dɛ sɛ ma ni, ma la sɛ vɛ̃ do dia nɛ. Mɔ kpala sila mɔ, nɛ mɔ ɔ do ngawi, nɛ mɔ tɛ dɛ̀ kili gɔ.

¹⁴ Nɛ nde we tɔa Tɛmpɛloe, mi kpa ngamɔ we ngɛmɛ li mɔ mbali nɛa ngɔ tɔnɛ koto talɛ, do tɔnɛ fɛ̃a mɔ bolo koto 'bu nɛ talɛ, mba do tũ mɔ bolo, do omɔ bolo dɛlɛ wena. Nɛ mi 'dafa 'bɔ otenɔ do otanɔ. Nɛ nde ma wia 'bɔ na, mɔ a mbe nɛ 'da nɛ.

¹⁵ Mɔ kala sɛ Owi dɛa to, owanɔ kɛ wa ĩ ti to sɛ ta, do sɛ te, nɛ wa ĩ 'bɔ ti gele dɛa to de wena ni.

¹⁶ Mɔ do ogili mɔ mbali, do fɛ̃a mɔ bolo, do tũ mɔ bolo do mɔ bolo ma dɛlɛ wena, nɛ ma é sɛ gɔ. Hã mɔ ndó dɛ toe, nɛ e kɔ NWA ɔ fala nɛ kpo do mɔ.”

¹⁷ 'Do ki ni, nɛ Davidi ba nu a hã ogã wi ngɔ obe Israɛlɛ na, wa gbaka be 'da a Salɔmɔ.

¹⁸ Nɛ a tɔ̃ hã wa na: “NWA Gale 'da nɛ do nɛ boe. Yolo do ngba soe kɛ a a zi owinɔ ngɔ nùi gɛ ti mbula 'da mi ni, nɛ a hã dungu fio hã nɛ tɛ falanɔ vɛ̃. Kɔ di dɔ̃ ni, owinɔ ni wa a ti mbula 'da NWA do nɛ owinɔ 'da a.

¹⁹ Nɛ nde nɛ dɛ́ mbula nu NWA Gale 'da nɛ do kɔ sila nɛ, do kili tɛ nɛ vɛ̃. Nɛ é tɛ nɛ fala dɛa to 'da NWA Gale, nɛ nɛ dɛ́ fala we dɔnggɔ do a. 'Do nɛ, nɛ nɛ ba Sanduku Gba Tɔkɛ 'da NWA, nɛ nɛ kala mɛnɔ kɛ ma santo ni, nɛ nɛ a ma kɔ tɔa kɛ nɛ dɛ sɛ we dɔ̃lɔ̃ li 'da a ni.”