1 Sakonɔ 21 - WE NU GALE 1995

Davidi tɔlɔ obe Israɛlɛ

¹ Mbe ngba soe kpo, nɛ Satana kɔ̃a zi we hã ngamɔ hã obe Israɛlɛ. Nɛ a e linggamɔ kɔ sila nwa Davidi na, a tɔlɔ obe Israɛlɛ vɛ̃.

² Nɛ Davidi ba nu a hã Yoabɛ, do ombe gã wi ngɔ sodanɔ na: “Nɛ yɛ́nggɛ́ ngɔ nù Israɛlɛ vɛ̃, yolo ndɔti le, we hɔ Sɔkpɔ nɛ, nɛ nɛ tɔ́lɔ́ winɔ. Nɛ tɔlɔ wa do'do, nɛ nɛ tɛ we tɔ̃ nu nɛ hã mi, we kɛ mi kɔ̃a we ĩ ti dɔa wa.”

³ Nɛ Yoabɛ gese hã a na: “Aa nwa, e kɔ NWA Gale dɛ na, ngɔ gili winɔ gɛ wa dɔ dɛ dati fala kama kpo! Obe Israɛlɛ vɛ̃ wa a Owi dɛa tonɔ 'da mɔ, nɛ gulu kɛ mɔ kɔ̃a we tɔlɔ wa, hã ma dɛ na, wa te li ngbangga 'da Gale we ge nde?”

⁴ Gɛnɛ kɔ na mɛ ni, nɛ nde nwa sula zi 'do we a tɔ̃a ni nganda wena, nɛ Yoabɛ wè zi we bɛ ma gɔ. A hɔa nza kɔ tɔa 'da nwa tɛ Yeruzalɛmɛ ni, nɛ a yɛnggɛ ngɔ nù Israɛlɛ vɛ̃ we tɔlɔ owinɔ. A tɔlɔ wa do'do, nɛ a kpolo tɛ̃ a,

⁵ nɛ a sa ngɔ gili winɔ ni hã nwa. Nù Israɛlɛ zi do owi wili kɛ wa wia we nɛ bolo ni miliɔ̃ kpo do koto kama kpo (1.100.000), nɛ nù Yuda do wa koto kama nalɛ do 'bu wa sambo (470.000).

⁶ Nɛ Yoabɛ tɔ̀lɔ̀ zi nu kpala Levi do Bɛnzamɛ gɔ, we kɛ mbula nwa ba ni, ma nɔ̃lɔ̃ zã a wena.

Gale hã etumbu hã Davidi

⁷ Mɛ kɛ Davidi dɛa ni, ma dè tɛ Gale gɔ, nɛ a hã etumbu hã obe Israɛlɛ.

⁸ Davidi nɛa we zɔ ni, nɛ a tɔ̃ hã Gale na: “Mi dɛa gã 'dã mɔ. Mi ĩ di ni na, mi dɛa mɔ yɔnda. Kɔ mɔ fó ku'da 'dã mɛ ni zu mi do'do.”

⁹ Nɛ NWA tɔ̃ hã Gadɛ, wi gba olo nu a, kɛ a 'bɔ a wi tɔ̃ mbula hã Davidi ni na,

¹⁰ a nɛ́, kɔ a kpa Davidi, nɛ a tɔ̃ hã a na: “NWA ia ongamɔ talɛ dati mɔ na, mɔ saka mbe kpo kɔ nɛ, nɛ a tombo sɛ ngamɛ mɔ saka ni dɛ ngɔ mɔ.”

¹¹ Nɛ Gadɛ nɛa 'da Davidi i, nɛ a tɔ̃ toe 'da Gale hã a. A aka Davidi na: “Mɔ kɔ̃a na,

¹² gba wɔ te ngɔ nùi 'da mɔ 'do sabɛlɛ talɛ, tabi wi sɛnɛ mɔ wa ndaka mɔ, nɛ mɔ yu wa 'do zɛkɛ talɛ, tabi Gale tombo anzɛ 'da a ngɔ nùi 'da mɔ, nɛ 'dã zɛlɛ te ngɔ owinɔ 'do tũ talɛ nde? Mɔ lengge ngɔ nɛ, hã mɔ gese nu nɛ hã mi, kɔ mi tɔ̃ hã NWA Gale, kɛ a tumba mi ni.”

¹³ Nɛ Davidi gese na: “Mi kɔ gã 'bako. Nɛ nde mi kɔ̃̀ na, Owele hã wa hã etumbu hã mi gɔ. Mi kɔ̃a na, NWA hã a hã etumbu hã mi, we kɛ a do 'bako li a boe.”

¹⁴ Nɛ NWA tumba 'dã zɛlɛ dɛ ngɔ nù Israɛlɛ. Nɛ zɛlɛ ni gbɛa Owi wili Israɛlɛ koto 'bu wa sambo.

¹⁵ 'Da fala NWA tumba anzɛ 'da a tɛ Yeruzalɛmɛ i na, a fi zɛlɛ tɛ owinɔ ni, nɛ NWA kpolo linggamɛ 'dɛ ɛ, nɛ a tɔ̃ hã anzɛ ni na: “Ma wia ia, mɔ bá kɔ̃ mɔ dɛ nù!” Do 'da fala ni, nɛ nde anzɛ 'da NWA zi dɔ̃ɔ do fala kɛ Ornanɛ, be Yebuzi 'dafa we zɛ do kpalɛ ble 'da ɛ ni.

¹⁶ Davidi nɛa we ba li ɛ ngɔ, nɛ a zɔ anzɛ li nza ngɔ i tɛ yaka gba du kɔya 'da a dɛ si 'biti Yeruzalɛmɛ nga. Nɛ Davidi do kumunɔ kɛ wa hi'da tulu gɛlanɔ ni, wa gu li wa nù.

¹⁷ Nɛ Davidi tɔ̃ hã NWA Gale na: “Mi a mi ba nu mi na, wa tɔlɔ owinɔ. Wi a mi hã mi tia do ngbangga, wi a mi hã mi dɛa 'dã mɔ. Nɛ nde owinɔ kɛ wa kpa 'bakoe gɛ, wa dɛ 'dã mɔ gɔ. Kɔ ma wia na, mɔ hã etumbu hã mi do nu fɛlɛ mi. Nɛ nde mɔ tɛ hã̀ ma hã owinɔ 'da mɔ gɔ.”

Davidi dɛa gbagala we dɔ do sa'de hã NWA

¹⁸ Nɛ anzɛ 'da NWA tɔ̃ hã Gadɛ na: “Mɔ bá nu mɔ hã Davidi na, a kṹ ngɔ kala kɛ Ornanɛ 'dafa we zɛ do kpalɛ 'da ɛ ni, nɛ a dɛ́ gbagala dɛ di ni we dɔ sa'de ngɔ nɛ hã NWA.”

¹⁹ Davidi dɛa ɔ nɛ kɛ NWA ba do nu ɛ hã a do wala 'da Gadɛ ni, nɛ a nɛ we dɛ gbagala.

²⁰ 'Da fala ni, nɛ nde Ornanɛ tɛ zɛ kpalɛ ble 'da a. A nɛa we ka mɔ, nɛ a zɔ anzɛ. Nɛ obulu benɔ 'da a nalɛ kɛ a zi fala nɛ kpo do wa ni, wa yu, nɛ wa usu tɛ wa.

²¹ Nɛ Davidi kũ dɛ 'da a i. Ornanɛ nɛa we zɔ Davidi, nɛ a kulu ngɔ, nɛ a gɔnɔ dati a, nɛ a gu li a nù dati a.

²² Nɛ Davidi tɔ̃ hã a na: “Mi do wɔ na, mi oso fala gɛ kɔ̃ mɔ. Mi kɔ̃a we dɛ gbagala tɛ dɛ, kɔ mi dɔ sa'de ngɔ nɛ hã NWA, takɔ 'dã zɛlɛ kɛ ma tia ngɔ owinɔ gɛ, ma e. Kɔ mɔ e fala gɛ hã mi, nɛ mi oso sɛ kɔ̃ mɔ.”

²³ Nɛ Ornanɛ tɔ̃ na: “Nwa, mɔ bá mɛ kɛ mɔ kɔ̃a ni, hã mɔ hã do dɔnggamɔ hã Gale. Ongɔmbɛnɔ 'da mi wa kɛ. Mɔ kálá wa, hã mɔ dɔnggɔ do Gale. Nɛ te ngilingili sɛ a gua, nɛ ble we hã do dɔnggamɛ ni, ma kɛ. Mi 'dɔla mɛnɔ ni vɛ̃ hã mɔ.”

²⁴ Nɛ nwa Davidi tɔ̃ hã Ornanɛ na: “Mɔ hã́ sɛ mɔ kpo hã mi hã iko gɔ. Mi kɔ̃a we oso ma kɔ̃ mɔ usa. Mi kɔ̃ we dɔnggɔ NWA Gale 'da mi do mɛ 'da mɔ, nɛ nde mi òsò ma usa gɔ ni gɔ.”

²⁵ Nɛ Davidi usa fala ni kɔ̃ Ornanɛ do gbãlã fɛ̃a mɔ mbali kama gazɛlɛ.

²⁶ A dɛa gbagala dɛ di ni, nɛ a dɔ sa'de ngɔ nɛ hã NWA Gale, nɛ a gbɛ ombe sa'denɔ we be dɛa na. 'Do nɛ, nɛ a sambala NWA, nɛ NWA zele sambala 'da a. Nɛ yolo do li nza i, NWA tumba nyɛa we, nɛ ma bɛlɛ dɔnggamɛ ngɔ gbagala ni.

²⁷ Na mɛ ni, nɛ NWA ba nu ɛ hã anzɛ na, a yulu gba du kɔya 'da a dɛ kɔ foko olo nɛ.

²⁸ Davidi nɛa we zɔ na, NWA zila sambala 'da a tɛ fala kɛ Ornanɛ, be Yebuzi 'dafa we zɛ do ble 'da a ni, nɛ a ma ngɔ hã dɔnggamɔ hã NWA dɛ di ni fai.

²⁹ Do ngba soe ni, nɛ nde tɔa Tande kɛ Mɔizɛ dɛa zi tɛ li gba zɔ̃ i, mba do ogbagalanɔ kɛ wa hã dɔnggamɛnɔ ngɔ nɛ ni, ma zi a Gabaoni, tɛ fala dɔnggɔ do Gale.

³⁰ Nɛ nde Davidi wè zi do nɛ i mɔ we aka Gale gɔ, we duzu kɛ kili gba du kɔya 'da anzɛ 'da NWA ba zi a wena.