1 Sakonɔ 20 - WE NU GALE 1995

Yoabɛ ba le Raba

¹ Zɔlɔ ngangga 'do nɛ ni, do 'da fala kɛ Onwanɔ wa nɛ do bole fai ni, nɛ Yoabɛ kpia dati sodanɔ, nɛ wa nɛ we bi nù 'da Oamoni. Wa nɛa, nɛ wa bi wa, nɛ wa 'danga nùi 'da wa, nɛ wa linggi 'bɔ gã le 'da wa Raba. Nɛ nde Davidi 'bana kɛ 'da ɛ dɛ Yeruzalɛmɛ i. 'Da fala kɛ Yoabɛ ba le Raba, hã a nɛa we 'danga ma do'do,

² nɛ Davidi nɛa, nɛ a ba ndasa nwa zu kpikima Milkɔmɛ, gale 'da Oamoni. Ndasa ni, wa dɛa ma do mɔ mbali dĩ nɛ kilo 'bu nɛ talɛ, nɛ ma zi do ta olo gã gole tɛ nɛ. Nɛ wa ba ma, nɛ wa gu zu Davidi. Nɛ wa kala 'bɔ odia mɔ kɔ le ni wena.

³ Wa kala owinɔ kɔ lenɔ ni, nɛ Davidi a wa we dɛ kolofe. Owinɔ ni zi a Owi gba te, wi sɛ ta, Owi gɔmɔ te. A dɛa zi na mɛ ni do tala gele winɔ kɔ lenɔ 'da Oamoni vɛ̃. 'Do nɛ, nɛ Davidi si do sodanɔ 'da a vɛ̃ dɛ Yeruzalɛmɛ.

Obe Israɛlɛ wa bi 'bɔ Ofilisti

⁴ 'Do ki ni, nɛ mbé bolo te 'bɔ sanga Oisraɛlɛ do Ofilisti tɛ Gezɛrɛ. Do 'da fala ni, nɛ Sibkai, wi Husa gbɛ Sipai, mbe be zã Rɛfa, nɛ ma hã sape hã Ofilisti wena.

⁵ 'Do ki ni, nɛ mbé bolo tia 'bɔ sanga Oisraɛlɛ do Ofilisti, nɛ Elananɛ, be 'da Yairɛ, gbɛ Lami, nya Goliatɛ, wi Gatɛ. Te sɛlɛ 'da Goliatɛ ni gã zi ɔ nɛ te nyanga tɔa ni.

⁶ Mbé bolo tia 'bɔ tɛ Gatɛ. Nɛ mbe soda Filisti zi di ni, a dulu wena. Gbãlã zu kɔ̃ a gazɛlɛ gazɛlɛ tɛ kɔ̃ a bɔa nɛ, nɛ gbãlã zu nyanga a 'bɔ gazɛlɛ gazɛlɛ tɛ nyanga a bɔa nɛ. Ma mba vɛ̃ 'bu nɛ bɔa ngɔ nɛ nalɛ. A zi 'bɔ a be zã Harafa.

⁷ Soda ni dã obe Israɛlɛ, nɛ mbe nya Davidi, li a a Yonatanɛ, be 'da Sama gbɛa a.

⁸ Onga soda Filistinɔ ni, wa a obe zã Harafa, wi Gatɛ. Nɛ wa fia zi li bole 'da Davidi do osodanɔ 'da a.