1 Sakonɔ 19 - WE NU GALE 1995

Owi olo li Davidi wa kpa sape

¹ 'Do nɛ là nyɛlɛ gɔ, nɛ Nahasi nwa 'da Oamoni fe, nɛ be 'da a Hanunɛ dungu nwa olo a.

² Davidi nɛa we zele ni, nɛ a tɔ̃ na: “Mi nɛ be dia zã hã Hanunɛ, be 'da Nahasi, ɔ nɛ kɛ baa a dɛa zi do mi ni.” Nɛ a tombo ombe owi olo li a na, wa nɛ, kɔ wa ɔ do Hanunɛ olo fio baa a. Owi olo li Davidi wa nɛa we hɔ ngɔ nùi 'da Oamoni i,

³ nɛ obenɔ 'da Hanunɛ wa tɔ̃ hã baa wa na: “Mɔ lénggé na, Davidi tumba Owi olo li a na, wa tɛ, kɔ wa ɔ do mɔ olo fio baa mɔ iko nde? Wa tɛa ɔ nɛ owi miã, takɔ mbe ngba soe kpo, nɛ wa bi le 'da lɛ.”

⁴ Hanunɛ nɛa we zele ni, nɛ a ba nu a na, wa kala owi olo li Davidi. Wa kala wa, nɛ wa kɛlɛ nzɛlɛ wa vɛ̃, nɛ wa 'bili nu tulu tɛ wa dɛ ti ka go'do wa, nɛ wa gese wa na, wa si.

⁵ Davidi zila we nɛ, nɛ a tombo Owele dati owi olo li a, kɛ wa kpa zi gã sape ni. Wa kpa wa, nɛ wa tɔ̃ toe 'da a hã wa na, wa 'bana dɛ Yeriko ni gbaa na, nzɛlɛ wa dulu dɛ olo nɛ, sɛ nɛ wa ĩ ti si nɛ de.

Davidi bi Oamoni do Osiri

⁶ Oamoni wa zɔa na, mɛ lo dɛa ni ma hã dã hã Davidi. Nɛ nwa 'da wa Hanunɛ tumba fɛ̃a mɔ bolo tɔnɛ 'bu nɛ talɛ tɛ Siri na, wa kala ongilingili do osoda kũ mbalata, hã wa bi bolo zu lo. Osodanɔ ni wa yula ngɔ nù Mezopotami si gbãlã ngɔ, do le Maaka do Soba.

⁷ Ongilingili bolonɔ kɛ Oamoni wa tumba zi we nɛ ni, ma zi koto 'bu nɛ talɛ ngɔ nɛ bɔa. Nɛ wa hã 'bɔ mbili hã nwa kɔ le Maaka na, a nɛ bole zu lo fala nɛ kpo do osodanɔ 'da a. Osodanɔ ni do osoda Siri wa nɛa, nɛ wa dɛ fala ɔi 'da wa dɛ 'do le Medɛba. Nɛ wa mba li ngba wa do Oamoni, kɛ wa hɔa nza kɔ lenɔ 'da wa ni we bi do Davidi.

⁸ Davidi nɛa we zele ní, nɛ a sa mɔ hã Yoabɛ, gã wi ngɔ sodanɔ 'da a, nɛ a tombo a do osodanɔ tɛ fala ni we bi do wa.

⁹ Nɛ osoda Amoni wa hɔa nza kɔ gã le 'da wa, nɛ wa 'dafa tɛ wa we bi bole. Nɛ Onwanɔ kɛ wa tɛa we bi zu Oamoni ni, wa usu si do gele fala do zamɔ i.

¹⁰ Yoabɛ ĩ na, ɛ nɛ bi bolo do ngɔ gili osoda bɔa, wanɔ dati ɛ, do wanɔ 'do ɛ. Ma kɛ a saka onga soda Israɛlɛ ngboo, nɛ a a wa dati osoda Siri.

¹¹ Nɛ a kala tala sodanɔ hã nya a Abisai, nɛ a a wa dati osoda Amoni we bi do wa.

¹² Nɛ Yoabɛ tɔ̃ hã nya a na: “Fala kɛ osoda Siri wa nganda nɛ ngɔ mi nde, nɛ mɔ tɛ we gala mi. Kɔ ni gɔ, hã Oamoni wa nganda nɛ ngɔ mɔ, nɛ mi nɛ sɛ we gala mɔ.

¹³ Mɔ bí do sɔ̃a gbãlã tɛ, nɛ mɔ kpala sila mɔ. Lɛ bí nganda we duzu owinɔ 'da lɛ, do olenɔ 'da Gale 'da lɛ. E kɔ NWA Gale dɛ mɛ kɛ zã a kɔ̃a we dɛ nɛ ni!”

¹⁴ Yoabɛ do sodanɔ 'da a, wa nɛa we bi osoda Siri, nɛ osoda Siri wa yu.

¹⁵ Osoda Amoni wa nɛa we zɔ kɛ osoda Siri wa yu ni, nɛ wa yu tɛ mɛ 'bɔ dati Abisai, nɛ wa si. Nɛ Yoabɛ la fala bi osoda Amoni, nɛ a si dɛ Yeruzalɛmɛ i.

¹⁶ Osoda Siri wa nɛa we zɔ na, osoda Israɛlɛ wa bi lo, kɔ wa nɛa ngɔ lo ni, nɛ wa tombo Owele tɛ kulu gà lì Efratɛ na, wa nɛ kɔ wa sa mɔ hã onya lo kɛ wa ɔ i mɔ ni. Osodanɔ ni wa hɔa, nɛ wa le dɛ ti Sofakɛ, gã wi ngɔ sodanɔ 'da Hadadezɛrɛ.

¹⁷ Nɛ Davidi zila we nɛ, nɛ a mba tɛ mɛ 'bɔ li osoda Israɛlɛ vɛ̃. Nɛ wa nɛ, nɛ wa kũ lì Yɔrdanɛ, nɛ wa gɔnɔ dati osoda Siri, nɛ wa 'dafa tɛ wa we bi bole. Nɛ osoda Siri wa nɛ, nɛ wa bi osoda Israɛlɛ,

¹⁸ nɛ osoda Israɛlɛ wa ndaka wa. Nɛ Davidi do sodanɔ 'da a, wa gbɛ ombalatanɔ wa gbɔtɔ ngilingilinɔ ni koto sambo, nɛ wa gbɛ 'bɔ osoda kũ mbalatanɔ koto 'bu wa nalɛ. Nɛ wa gbɛ 'bɔ Sofakɛ, gã wi ngɔ osoda Siri dɛ di ni.

¹⁹ 'Da fala Onwanɔ kɛ wa zi ti mbula 'da Hadadezɛrɛ, wa nɛa we zɔ na, osoda Israɛlɛ wa bi wa, nɛ wa nɛa ngɔ wa ni, nɛ wa dɛ na do Davidi, nɛ wa le ti mbula 'da a. Nɛ osoda Siri wa bì zi 'bɔ zu Oamoni mbé nɛ gɔ.