1 Sakonɔ 18 - WE NU GALE 1995

Davidi bi lenɔ kɛ zã Israɛlɛ

¹ 'Do ki ni, nɛ nwa Davidi bi 'bɔ Ofilisti, nɛ a nɛ ngɔ wa. Nɛ a ba le Gatɛ do obe lenɔ kɛ zã nɛ ni, nɛ ma hã sape hã wa wena.

² A bi 'bɔ Omoabɛ, nɛ a nɛ ngɔ wa, nɛ a e wa ti mbula 'da a, nɛ wa futa tako hã a.

³ 'Do nɛ, nɛ a nɛ we bi 'bɔ do Hadadezɛrɛ, nwa ngɔ nù Soba, mbee 'bili tɛ nù Siri. Nùi ni ma la zi gbaa dɛ tɛ le Hamatɛ. 'Da fala kɛ Hadadezɛrɛ nɛa zi we ba nùi kɛ zã nu lì Efratɛ we e mbula ngɔ nɛ ni,

⁴ nɛ Davidi bi a, nɛ a kala ngilingilinɔ 'da a koto kpo li bole, mba do osoda kũ mbalatanɔ koto sambo, do osoda nyanga wi koto 'bu wa bɔa, nɛ a si do wa. A kala ongilingilinɔ, nɛ a kala 'bɔ ombalata ɔ nɛ kama kpo ni we gbɔtɔ ma, nɛ a 'bili fɛlɛ nzabele nyanga tala ombalatanɔ ni vɛ̃.

⁵ Osiri tɛ kɔ le Damasi, wa nɛa we zele we nɛ, nɛ wa tɛ we gasa bole zu Hadadezɛrɛ. Nɛ Davidi bi wa, nɛ a gbɛ osoda koto 'bu wa bɔa ngɔ wa bɔa sanga wa.

⁶ Nɛ a saka obe Israɛlɛ na, wa ɔ owi fɔmɔ ole ngɔ nù Siri. Na mɛ ni, Osiri wa lia ti mbula 'da Davidi, nɛ wa futa tako hã a. NWA dɛa zi na, Davidi nɛ ngɔ owi sɛnɛ a li bolonɔ vɛ̃.

⁷ Davidi kala Ongele mɔ mbalinɔ, kɛ owi zɔ mɔ tɛ Hadadezɛrɛ wa bi zi do bole ni, nɛ a si do ma dɛ Yeruzalɛmɛ i.

⁸ A kala 'bɔ ogili tũ mɔ bolo ngɔ nùi 'da Hadadezɛrɛ, tɛ kɔ le Tibatɛ do Kunɛ. Ma ɔa ni gbaa, nɛ Salɔmɔ kala tũ mɔ bolonɔ ni, nɛ wa dolo ma do gã sani korr, nɛ wa dɛ 'bɔ do bɛlɛduma, nɛ wa dolo mbe do sani kpi do kpi, we dɛ do to kɔ tɔa Tɛmpɛloe.

⁹ Tou, nwa ngɔ nù Hamatɛ zila na, Davidi bi sodanɔ 'da Hadadezɛrɛ, nwa ngɔ nù Soba, nɛ a nɛa ngɔ wa vɛ̃ ni,

¹⁰ nɛ a tombo be 'da a Hadoramɛ na, a fana Davidi, nɛ a dɔnggɔ 'bɔ a, we kɛ a bi Hadadezɛrɛ, nɛ a nɛa ngɔ a ni. Mba gɔ, Hadadezɛrɛ do Tou, wa sɛnɛ zi ngba wa wena. Hadoramɛ nɛa do mɔ mbali, fɛ̃a mɔ bolo, do tũ mɔ bolo, nɛ a hã ma hã Davidi.

¹¹ Nɛ Davidi hã mɛnɔ ni hã NWA Gale, ɔ nɛ kɛ a dɛa zi do fɛ̃a mɔ bole do tũ mɔ bole kɛ a kala ma kɔ gele lenɔ kɛ a bi zi ni. A kala zi mɛnɔ ni kɔ̃ Oedɔmɛ, Omoabɛ, Oamoni, Ofilisti do Oamalɛkɛ.

¹² Abisai, be 'da Sɛruya bi Oedɔmɛ tɛ kɔ gbangɔlɔ̃ Tɔ̃, nɛ a gbɛ wa koto 'bu ngɔ wa ngbɛ'dɛ'dɛ.

¹³ A ia Owi fɔmɔ le ngɔ Oedɔmɛ, nɛ wa le ti mbula 'da Davidi. Na mɛ ni, NWA Gale dɛa zi na, Davidi nɛ ngɔ Owi sɛnɛ a li bolonɔ vɛ̃.

Owi dɛa tonɔ 'da Davidi

¹⁴ Davidi dɛa to nwa 'da a ngɔ nù Israɛlɛ vɛ̃. A gɔnɔ zi we 'da winɔ vɛ̃ do bɔlɔ nɛ, nɛ nde a gɔ́nɔ́ zi ma we bula li wele gɔ.

¹⁵ Yoabɛ, be 'da Sɛruya, zi a gã wi ngɔ sodanɔ. Yosafatɛ, be 'da Ahiludɛ, zi a wi zɔ mɔ tɛ mbɛtinɔ 'da nwa Davidi.

¹⁶ Sadɔkɛ, be 'da Ahitubɛ, do Ahimelɛkɛ, be 'da Abiatarɛ, wa zi a onganga. Savɛsa zi a wi kɔma mbɛti 'da Davidi.

¹⁷ Bɛnaya, be 'da Yoyada, zi a wi kpe ti Okrɛtɛ do Opeleti, kɛ wa zɔ zi mɔ tɛ tɔa nwa ni. Obenɔ 'da Davidi, wa zi tɛ mɛ 'bɔ a ogã wi dɛa to dɛ ti nu baa wa.