1 Sakonɔ 17 - WE NU GALE 1995

Gale kpua mbulu hã Davidi do nu fɛlɛ a

¹ Do 'da fala nwa Davidi si kɔ tɔa nwa 'da a ni, nɛ mbe ngba soe kpo, nɛ a tɔ̃ hã Natanɛ, wi gba olo nu Gale na: “Mi ɔ kɔ tɔa kɛ wa dɛa ma do te sɛdrɛ, nɛ Sanduku Gba Tɔkɛ 'da NWA ɔ kɛ 'dɛ ɛ ti tɔa tande iko. Kɔ mɔ lengge nɛ na ge nde?”

² Nɛ Natanɛ gese na: “Mɔ dɛ́ mɛ vɛ̃ kɛ zã mɔ kɔ̃a ni, we kɛ Gale fala nɛ kpo do mɔ boe.”

³ Nɛ do tũi ni, nɛ NWA Gale wila we do Natanɛ na:

⁴ “Mɔ nɛ́, hã mɔ kpa Davidi, wi toe 'da mi, nɛ mɔ tɔ̃ hã a na, a zélé we kɛ mi NWA, mi tɔ̃a gɛ: Mɔ a mɔ dɛ́ sɛ tɔa Tɛmpɛloe hã mi na, mi ɔ kɔ nɛ gɔ.

⁵ We kɛ yolo do ngba soe mi fua zi obe Israɛlɛ ngɔ nù Ezipeto gbaa we hɔ kɔ̃ tũi gɛ, mi ɔ̃ kɔ tɔa gɔ, mi ɔ zi ti tɔa tande. Nɛ mi ɔ zi fai ti tɔa tandenɔ do falanɔ vɛ̃ kɛ wa yɛnggɛ zi nɛ ni.

⁶ Dɛ ngɔ nɛ, 'da falanɔ vɛ̃ kɛ mi yɛnggɛ do owinɔ 'da mi, obe Israɛlɛ, nɛ mi ia zi owi kpe dati wa we zɔ mɔ tɛ wa, nɛ nde mi àkà wele kpo kɔ wa na, gulu kɛ nɛ dɛ̀ tɔa Tɛmpɛlo hã mi do te sɛdrɛ gɔ, we ge nde ni gɔ.

⁷ “We duzu ma, mɔ tɔ̃ sɛ 'bɔ hã Davidi na, a zélé we kɛ mi NWA Gale 'da nɛ obe Israɛlɛ, mi tɔ̃a gɛ: 'Da fala mɔ zi a wi dala obata iko ni, nɛ mi ba mɔ nu ba'de we e mɔ do nwa ngɔ owinɔ 'da mi, obe Israɛlɛ.

⁸ Mi zi fala nɛ kpo do mɔ kɔ mɛnɔ vɛ̃ kɛ mɔ dɛa ma ni, nɛ mi gbɛa owi sɛnɛ mɔ dati mɔ vɛ̃. Nɛ mi dɛ sɛ na, sako li mɔ dɔ̃lɔ̃ ɔ nɛ kɛ 'da ogã winɔ nù gɛ.

⁹ Mi hã sɛ fala tɔa hã owinɔ 'da mi, obe Israɛlɛ, nɛ wa 'bana sɛ dɛ di ni, nɛ wa dɛ́ sɛ kili gɔ. O'dã winɔ wa zɛ́lɛ́ sɛ 'bɔ tɛ wa ɔ nɛ kɛ zi dati,

¹⁰ 'da fala mi ia zi Owele ngɔ wa na, wa kpe dati wa ni gɔ. Mi amba sɛ zu mɔ ti kɔ̃ owi sɛnɛ mɔ vɛ̃. Do Sɔkpɔ nɛ, mi tɔ̃ 'bɔ hã mɔ na, mi NWA, mi hã sɛ odɔa be hã mɔ, nɛ nu tɔa 'da mɔ ma 'bɔ.

¹¹ Hã fala kɛ tũ fio 'da mɔ ma we, hã mɔ fe, nɛ mi saka sɛ mbe kpo kɔ benɔ 'da mɔ ngboo na, a dungu nwa olo mɔ. Nɛ mi dɛ sɛ na, to nwa 'da a nganda.

¹² Nɛ a hã a dɛ sɛ tɔa Tɛmpɛlo hã mi. Nɛ mi hã sɛ ngawi hã a na, dɛa to nwa 'da a 'bana fai.

¹³ Mi sɛ a baa a, nɛ a sɛ a be 'da mi. Nɛ nde mi dá sɛ sila mi ngɔ a gɔ. Mi dɛ́ sɛ do a ɔ nɛ kɛ mi dɛa do nwa zi dati mɔ ni gɔ.

¹⁴ Mi e sɛ a do nwa ngɔ owinɔ 'da mi fai, nɛ to nwa ma 'bana sɛ dɛ kɔ nu fɛlɛ a fai.”

¹⁵ Natanɛ nɛa, nɛ a gba nu wenɔ NWA tɔ̃a hã a ni vɛ̃ hã Davidi.

Sambala 'da Davidi

¹⁶ Nɛ nwa Davidi lia kɔ tɔa tande 'da NWA Gale, nɛ a yolo dati a, nɛ a tɔ̃ na: “NWA Gale 'da mi, mi do nu fɛlɛ mi, lɛ wè zi do kɛ na mɔ dɛ dia mɛnɔ gɛ vɛ̃ do lɛ gɔ.

¹⁷ Ĩ na, mɔ NWA, mɔ zɔa lá ni li mɔ bi sĩ iko, nɛ mɔ kpua 'bɔ mbulu hã nu fɛlɛ mi 'do gba dɔa sabɛlɛ. Nɛ mɔ dɛ mɔ do mi ɔ nɛ kɛ mi a gã wi ni. Aa NWA Gale 'da mi,

¹⁸ mbé we kɛ mi nɛ tɔ̃ 'bɔ ngɔ dɔ̃lɔ̃ li kɛ mɔ hã ma hã mi gɛ ni a ge nde? Mɔ ĩ ti mi, wi dɛa toe 'da mɔ.

¹⁹ NWA, mɔ dɛa dia mɛnɔ gɛ hã mi, we be gã wi 'da mɔ kɛ ma do ndɔti nɛ bina ni, we duzu kɛ mɔ kɔ̃ gɛnɛ mi wena.

²⁰ NWA, fo wi we kɔ̃ do mɔ bina. Mɔ zu mɔ kpo a Gale, ɔ nɛ kɛ lɛ zele fai ni.

²¹ Nɛ fo ombe gele wele ngɔ nù gɛ, kɛ wa wia kɔ̃ do lɛ obe Israɛlɛ ni bina. Mɔ fua 'dikita lɛ obe Israɛlɛ zu lɛ kpo kɔ ngbá ti kɔ̃ Owi Ezipeto do ogalenɔ 'da wa na, lɛ hɔ owinɔ 'da mɔ. Mɔ dɛa ogba mɔ, do oɔngbamɔ we ndaka onu kɔnggɔnɔ dati lɛ owinɔ 'da mɔ, nɛ mɔ kpa dɔ̃lɔ̃ li we nɛ.

²² Mɔ dɛa na, lɛ 'bana owinɔ 'da mɔ fai, nɛ mɔ NWA, mɔ hɔa Gale 'da lɛ.

²³ “Ngangga ni, NWA, mɔ dɛ́ mɛ kɛ mɔ kpua mbulu nɛ hã mi do nu fɛlɛ mi ni. Mɔ dɛ́ kɛ mɔ tɔ̃a ni.

²⁴ Na mɛ ni, ma dɛ tɛ̃ ɛ, nɛ Owele wa dɔnggɔ sɛ zu li mɔ fai, nɛ wa tɔ̃ sɛ na: ‘NWA Gale ngɔ mɔ nyanga nza vɛ̃ a Gale 'da obe Israɛlɛ.’ Nɛ dɛa to nwa 'da mi do nu fɛlɛ mi ma hana sɛ fai.

²⁵ Gale 'da mi, mɔ a mɔ bia linggamɛ 'da mɔ hã mi na, onu fɛlɛ mi wa dungu sɛ nwa olo mi. Gulu nɛ a mi yolo dɛ dati mɔ we sambala mɔ ni.

²⁶ NWA, mɔ a Gale. Mɔ a mɔ kpua mbuli dia 'dɔkɔlɛ gɛ hã mi.

²⁷ E kɔ mɔ wele nu mɔ tɛ obe zã mi na, dɛa to nwa 'da onu fɛlɛ mi ma 'bana fai. NWA, mɔ a mɔ wila nu mɔ tɛ wa, nɛ wila nui 'da mɔ ma 'bana sɛ do wa fai.”