1 Sakonɔ 16 - WE NU GALE 1995

¹ Wa lia do Sanduki 'da Gale kɔ tɔa tande, kɛ Davidi zĩ zi ma we duzu nɛ ni, nɛ wa e ma dɛ gbogbo nɛ. 'Do nɛ, nɛ wa gbɛ sa'de, nɛ wa dɔ we dɔnggɔ do Gale, nɛ wa gbɛ mbe 'bɔ we be dɛa na.

² Davidi hã odɔnggamɛnɔ ni do'do, nɛ a wele nu a tɛ winɔ do zu li NWA.

³ Nɛ a kɛ̃ onyɔngɔmɔ hã obe Israɛlɛ. Wi wili kpo kpo do wuko kpo kpo kpa mapa kɛ wa 'bua ma korr ni, do mukate bɔa. Mbe mukate kpo, wa dɛa ma do wala te datɛ, nɛ mbe kpo, wa dɛ do kula wala vinɔ.

⁴ Davidi a ombe levitɛnɔ dɛ dati Sanduku Gba Tɔkɛ na, wa ga zuma we dɔnggɔ do NWA Gale 'da obe Israɛlɛ.

⁵ Asafɛ zi a nwa ngɔ wa, nɛ Zakaria zi a wi ti nu a. Nɛ Yaziɛlɛ, Sɛmiramɔtɛ, Yehiɛlɛ, Matitia, Eliabɛ, Bɛnaya, Obɛdɛ-Edɔmɛ do Yeiɛlɛ, wa zɛ zi gã kundu do be kundu. Nɛ Asafɛ zɛ zi kɛ 'da a a mbala mɔ bole kɛ wa zɛ do ngba ɛ ni.

⁶ Nɛ onganga Bɛnaya do Yaziɛlɛ, wa dama zi kɛ 'da wa fai a mɔtũlũ dɛ dati Sanduku Gba Tɔkɛ ni.

⁷ Ngba soe ni, mɛ zi a kuti tũi kɛ Davidi ba nu a hã Asafɛ do oyali ngba a na, wa ga zuma we dɔnggɔ do NWA.

Gale gba tɔkɔ do owinɔ 'da a

⁸ Nɛ dɔ́nggɔ́ NWA, nɛ nɛ tɔ̃́ de sako li a. Nɛ tɔ̃ lɛnggɛ gba mɛnɔ a dɛa ni hã ogele winɔ.

⁹ Nɛ gá zuma, nɛ nɛ zɛ́ biã we dɔnggɔ do a, nɛ nɛ tɔ̃ sako ɔngbamɛnɔ vɛ̃ a dɛa ni.

¹⁰ Nɛ, owinɔ 'da NWA, nɛ dɛ́ yangga, nɛ nɛ dɔ́nggɔ́ tɛ nɛ do a kɛ a santo.

¹¹ Nɛ síkí li nɛ dɛ 'da NWA kɛ a do nganda vɛ̃, nɛ nɛ lénggé do a 'da fala fai.

^12-13 Nɛ, obe zã Israɛlɛ, wi dɛa toe 'da Gale kɛ nɛ 'bɔ a obenɔ 'da Yakɔbɔ, kɛ Gale saka nɛ ni, nɛ lénggé ɔngbamɛnɔ kɛ Gale dɛa ni, do 'bili wenɔ kɛ a 'bili zi ni.

¹⁴ Gale 'da lɛ wi a NWA, a ia mbula ngɔ nù gɛ vɛ̃.

¹⁵ Ta zu nɛ tɛ èlè ngɔ mbuli kɛ a kpua ni gɔ, olo nu a ma 'bana sɛ kɔ sabɛlɛ do sabɛlɛ.

¹⁶ A gba zi tɔkɔ do Abrahama, nɛ a gbangba 'da nɛ hã Izaka,

¹⁷ nɛ a kpo mbulu hã Yakɔbɔ. Mbuli ni, ma 'bana sɛ we lɛ obe Israɛlɛ fai.

¹⁸ A tɔ̃a zi hã oyaa lɛ na: “Mi 'dɔla nù Kanana hã nɛ, nɛ ma 'bana sɛ do mɔ́ nɛ fai.”

¹⁹ Owinɔ 'da Gale wa dɛlɛ zi gɔ, nɛ wa zi a gɛnɛ tɛ ngɔ nù Kanana.

²⁰ Wa yɛnggɛ zi mba mba do ngɔ nù 'da owinɔ,

²¹ nɛ nde Gale amba zi zu wa na, wele tɛ zɛ̀lɛ̀ tɛ wa gɔ, nɛ a mbisa zi Onwanɔ we wa na:

²² “Nɛ tɛ 'bè tɛ owi tonɔ 'da mi gɔ, nɛ tɛ dɛ̀ 'dã mɔ do wa, owi gba olo nu mi gɔ.”

Gale a nwa ngɔ owinɔ vɛ

²³ Aa nɛ, owinɔ nyanga nza gɛ vɛ̃, nɛ gá zuma we dɔnggɔ do NWA. Nɛ sámbálá a tũ kpo kpo, nɛ nɛ tɔ̃́ dɛ nza na, a a wi kpasa wi.

²⁴ Nɛ bé dɔ̃lɔ̃ li 'da a sanga onu kɔnggɔ winɔ, nɛ nɛ tɔ̃́ sako ɔngbamɛnɔ a dɛa ni hã owinɔ vɛ̃.

²⁵ NWA a gã wi, ma wia na lɛ dɔnggɔ a. Ma wia na owinɔ wa yu kili a, a nɛa ngɔ ogele galenɔ vɛ̃.

²⁶ Ogalenɔ 'da ogele winɔ, wa vɛ̃ a mɔ yala iko. Nɛ nde NWA a dɛa li nza.

²⁷ Dɔ̃lɔ̃ li 'da a do gã wi 'da a yele kɛ zã a ngbaa, nɛ ngawi do dia wi 'da a dunu fala 'da a ngurr.

²⁸ Aa nɛ, owinɔ ngɔ nù gɛ vɛ̃, nɛ dɔnggɔ NWA, nɛ nɛ tɔ̃ sako dɔ̃lɔ̃ li, do ngawi 'da a.

²⁹ Nɛ tɛ́ hã nɛ dɔnggɔ dɔ̃lɔ̃ li 'da a. Nɛ kálá dɔnggamɛnɔ 'da nɛ, nɛ nɛ le do ma tɛ fala dɔnggɔ do a. Fala kɛ nɛ hɔ dati NWA kɛ a santo ni, nɛ nɛ bílí zu nɛ gbaa, nɛ ma to nù.

³⁰ Nɛ, owinɔ ngɔ nù gɛ vɛ̃, nɛ táná kili dati a. Nùi ma yula nganda, nɛ ma yáká gɔ.

³¹ E kɔ li nza do nùi wa dɛ yangga. Nɛ tɔ̃́ hã owinɔ vɛ̃ na, NWA Gale 'da lɛ a nwa.

³² E kɔ gba lì do omɛnɔ vɛ̃ ti lì gɛ, wa he mɔ do yangga. E kɔ ofɔnɔ do Okpalɛnɔ vɛ̃ wa te salangga.

³³ E kɔ te zamɛnɔ vɛ̃ wa zɛ kaliã, nɛ wa dɛ yangga dati NWA, kɛ a tɛ sɛ we 'bili ngbangganɔ ngɔ nù gɛ ni, we kɛ a dɛ sɛ to nwa 'da a do bɔlɔ nɛ.

³⁴ Lɛ dɔ́nggɔ́ NWA, we kɛ a a wi dia sila, nɛ kɔ̃a zã 'da a do ndɔti nɛ bina.

³⁵ Nɛ zɛ́ nu nɛ hã a na: “Aa NWA Gale 'da lɛ, mɔ kpásá lɛ. Mɔ fó lɛ ti kɔ̃ ogele winɔ, nɛ mɔ mbá li lɛ fala nɛ kpo. Na mɛ ni, nɛ lɛ gese sɛ iɔ̃nae hã mɔ, nɛ lɛ dɔnggɔ sɛ li mɔ kɛ ma santo.”

³⁶ Lɛ dɔ́nggɔ́ NWA Gale 'da lɛ obe Israɛlɛ, lɛ sámbálá a kɔ sabɛlɛ do sabɛlɛ. Wa ga zuma ni ia do'do, nɛ owinɔ vɛ̃ wa tɔ̃ na: “Amɛ, lɛ dɔ́nggɔ́ NWA fai.”

³⁷ 'Do nɛ, nɛ Davidi ba nu a hã Asafɛ do oyali ngba a na, wa 'bana dɛ kɛ zã Sanduku Gba Tɔkɛ 'da NWA, takɔ wa dɛ sambala. Nɛ a na, tũ kpo kpo, nɛ dɛ na mɛ ni, dɔ nɛ zɔlɔ gɔ.

³⁸ Nɛ a saka Obɛdɛ-Edɔmɛ, do onya a wili nɛ 'bu wa gazɛlɛ ngɔ wa ngbɛ'dɛ'dɛ, mba do Hosa do Obɛdɛ-Edɔmɛ, be 'da Yɛdutunɛ na, wa zɔ mɔ tɛ onu ngbo nu tɔa.

³⁹ Nɛ tɛ le Gabaoni i, Davidi saka nganga Sadɔkɛ do onganganɔ kɔ nu fɛlɛ a na, wa dɛ to dɛ fala dɔnggɔ do Gale.

⁴⁰ Ma wia na, wa dɔ sa'de ngɔ gbagala we dɔnggɔ do NWA titole kpo kpo, do gɛ̃a wese kpo kpo. Nɛ wa dɛ 'bɔ otonɔ vɛ̃ kɛ wa kɔma kɔ 'buku mbula, kɛ NWA hã zi ma hã obe Israɛlɛ ni.

⁴¹ Owinɔ ni wa zi fala nɛ kpo do Hemanɛ, Yɛdutunɛ do mbe 'bɔ ogele winɔ kɛ wa saka zi wa tati nɛ we dɔnggɔ NWA, we duzu kɔ̃a zã 'da a kɛ ndɔti nɛ bina ni.

⁴² Hemanɛ do Yɛdutunɛ wa zi a Owi zɔ mɔ tɛ mɔtũlũnɔ do mbala mɔ bole kɛ wa zɛ do ngba ɛ ni, mba do mbe ogele mɛnɔ kɛ wa zɛ ma 'da fala ga Zumanɔ we dɔnggɔ do Gale ni. Nɛ obenɔ 'da Yɛdutunɛ zi a Owi zɔ mɔ tɛ onu ngbo nu tɔa.

⁴³ 'Do nɛ, nɛ wele do wele si dɛ nu tɔa 'da ɛ. Nɛ Davidi si tɛ mɛ 'bɔ dɛ nu tɔa 'da a i, we fana owinɔ 'da a.