1 Sakonɔ 15 - WE NU GALE 1995

Davidi 'dafa we si do Sanduku Gba Tɔkɛ dɛ Yeruzalɛmɛ

¹ Davidi dɛa otɔa kɔ Gba Ngbo nwa 'da a, nɛ a 'dafa fala, nɛ a zĩ tɔa tande dɛ di ni, we e Sanduku Gba Tɔkɛ 'da Gale ti nɛ.

² Nɛ a na: “Tati a olevitɛnɔ hã wa ba sɛ Sanduku Gba Tɔkɛ. Mba gɔ, nwa saka zi tati a wa na, wa ɔ Owi ba tolo nɛ, do fɔmɔ fala nɛ fai.”

³ Davidi sa mɔ hã obe Israɛlɛ vɛ̃ dɛ Yeruzalɛmɛ, takɔ wa ba Sanduki we e ma tɛ fala kɛ a 'dafa we nɛ ni.

⁴ Davidi mba li onganganɔ, kɛ wa a obe zã Aroni ni, mba do olevitɛnɔ.

⁵ Sanga olevitɛnɔ wi zi a Uriɛlɛ, gã wi ngɔ nu fɛlɛ Kehatɛ do Owele kama do 'bu wa bɔa,

⁶ Asaya, gã wi ngɔ nu fɛlɛ Mɛrari do Owele kama bɔa do 'bu wa bɔa,

⁷ Yɔɛlɛ, gã wi ngɔ nu fɛlɛ Gɛrsoni do Owele kama do 'bu wa talɛ,

⁸ Sɛmaya, gã wi ngɔ nu fɛlɛ Elisafanɛ do Owele kama bɔa,

⁹ Eliɛlɛ, gã wi ngɔ nu fɛlɛ Hebroni do Owele 'bu wa ngbɛ'dɛ'dɛ,

¹⁰ Aminadabɛ, gã wi ngɔ nu fɛlɛ Uziɛlɛ do Owele kama do 'bu ngɔ wa bɔa.

¹¹ Davidi sa mɔ hã nganga Sadɔkɛ do Abiatarɛ, nɛ a sa 'bɔ mɔ hã olevitɛnɔ gɛ: Uriɛlɛ, Asaya, Yɔɛlɛ, Sɛmaya, Eliɛlɛ do Aminadabɛ,

¹² nɛ a tɔ̃ hã wa na: “Nɛ, kɛ nɛ a ogã wi kɔ nu fɛlɛ kula 'da olevitɛnɔ ni, mba do onya nɛ, nɛ fɔ́lɔ́ tɛ nɛ, hã nɛ hɔ sa wi li NWA Gale 'da lɛ obe Israɛlɛ, takɔ nɛ nɛ we ba Sanduki 'da a, hã nɛ si do ma dɛ fala kɛ mi 'dafa we nɛ ni.

¹³ Kuti kɛ lɛ ba zi ma dati ni, fo zi nɛ bina, nɛ we duzu ki ni, NWA Gale 'da lɛ a hã etumbu hã lɛ, we kɛ lɛ dɛ̀ nɛ kɛ a kɔ̃a ni gɔ.”

¹⁴ Nɛ onganganɔ do olevitɛnɔ wa fɔlɔ tɛ wa, takɔ wa ba Sanduku Gba Tɔkɛ.

¹⁵ Nɛ olevitɛnɔ wa kala ote ngbangbo, nɛ wa a ti Sanduki, nɛ wa e ma zu 'baka wa. Wa dɛa kpasaa ɔ nɛ kɛ mbula 'da NWA, kɛ Mɔizɛ gba zi nu nɛ hã wa ni tɔ̃a ni.

¹⁶ Davidi ba nu ɛ hã ogã wi ngɔ olevitɛnɔ na, wa saka owinɔ kɔ nu fɛlɛ kulanɔ 'da wa we zɛ zuma do be kundu do ogã kundu, do mbala mɔ bolo kɛ wa zɛ do ngba ɛ ni, nɛ wa ga zuma we be yangga 'da wa.

¹⁷ Na mɛ ni, nɛ wa saka Hemanɛ be 'da Yɔɛlɛ, do onya a Asafɛ be 'da Berekia, do Etanɛ be 'da Kusaya, wi kɔ nu fɛlɛ Mɛrari.

¹⁸ Dɛ ti wa ni, a ombe olevitɛnɔ gɛ: Zakaria, Bɛnɛ, Yaziɛlɛ, Sɛmiramɔtɛ, Yehiɛlɛ, Uni, Eliabɛ, Bɛnaya, Maseya, Matitia, Eliflehu, Mikneya, Obɛdɛ-Edɔmɛ do Yeiɛlɛ, Owi zɔ mɔ tɛ ngbo nu tɔanɔ.

¹⁹ Owi ga Zumanɔ, Hemanɛ, Asafɛ do Etanɛ wa zɛ zi ombala tũ mɔ bole, kɛ ma wele nɛ ge nde ni.

²⁰ Nɛ Zakaria, Aziɛlɛ, Sɛmiramɔtɛ, Yehiɛlɛ, Uni, Eliabɛ, Maseya do Bɛnaya, wa zɛ zi obe kundunɔ kɛ ma wele do be gɛlɛ ni.

²¹ Nɛ Matitia, Eliflehu, Mikneya, Obɛdɛ-Edɔmɛ, Yeiɛlɛ do Azazia, wa zɛ zi a ogã kundunɔ kɛ ma wele do gba gɛlɛ, we 'dafa gɛlɛ zuma ni.

²² Kɛnania, gã wi ngɔ olevitɛnɔ kɛ toe 'da wa mɛ a ba Sanduku Gba Tɔkɛ ni, a zɔ zi mɔ tɛ Owi ba tolenɔ, we kɛ a ĩ ti toe ni de wena.

^23-24 Nɛ Berekia, Ɛlkana, Obɛdɛ-Edɔmɛ do Yehia wa zɔ mɔ tɛ Sanduki, nɛ onganganɔ gɛ: Sɛbania, Yosafatɛ, Nɛtaneɛlɛ, Amasai, Zakaria, Bɛnaya do Eliezɛrɛ, wa dama mɔtũlũ dati Sanduki 'da Gale.

Sanduku Gba Tɔkɛ ma hɔa Yeruzalɛmɛ

²⁵ Nɛ Davidi do okumunɔ ngɔ nù Israɛlɛ, do ogã wi ngɔ sodanɔ, wa nɛa 'da Obɛdɛ-Edɔmɛ we ba Sanduku Gba Tɔkɛ 'da NWA si do ma. Wa zi vɛ̃ do yangga.

²⁶ Gale fɔmɔ zi olevitɛnɔ kɛ wa ba Sanduki ni, ma kɛ wa gbɛa wili ngɔmbɔ sambo do wili dua sambo, nɛ wa hã ma do dɔnggamɔ hã NWA.

²⁷ Davidi he'de zi tulu kɛ wa dɛa ma do linɛ nɛ ma ɔ bɛndɛ bɛndɛ ni. Nɛ olevitɛnɔ kɛ wa ba zi Sanduku Gba Tɔkɛ, do Owi ga Zumanɔ, do Kɛnania, wi zɔ mɔ tɛ Owi ba Sanduki, wa vɛ̃ wa hi'da dia tulu linɛ. Dɛ ngɔ tulu linɛ, kɛ Davidi hi'da ni, a hi'da zi 'bɔ gbau tulu 'da onganganɔ kɛ wa dɛa 'bɔ ma do linɛ ni.

²⁸ Nɛ obe Israɛlɛ vɛ̃ wa la do Sanduku Gba Tɔkɛ dɛ Yeruzalɛmɛ i. Wa nɛa do ma fala nɛ kpo tɛ dama mbala, do dama mɔtũlũ, do zɛ mbala mɔ bolo do ngba ɛ. Nɛ wa zɛ 'bɔ obe kundunɔ do ogã kundunɔ.

²⁹ Do 'da fala kɛ Sanduki hɔa tɛ kɔ Gba Ngbo nwa 'da Davidi ni, nɛ Mikalɛ be 'da Saulo ka mɔ do li holo tɔa, nɛ a zɔ nwa Davidi tɛ yɔ yɔla yangga. Nɛ Mikalɛ nyɛ nu ɛ tɛ̃ a.