1 Sakonɔ 14 - WE NU GALE 1995

Wa dɛa tɔa hã Davidi tɛ Yeruzalɛmɛ

¹ Hiramɛ, nwa kɔ le Tirɛ tumba Owele hã Davidi, nɛ a tombo do te sɛdrɛ, do owi sɛ te do Owi sɛ ta na, wa dɛ gã tɔa hã Davidi.

² Davidi nɛa we zɔ ni, nɛ a ĩ wá na, NWA do tɛ̃ a ngboo ia ɛ do nwa ngɔ nù Israɛlɛ, nɛ a dɛa 'bɔ na, dɔ̃lɔ̃ li nwa 'da ɛ ma yɛ'bɛ, we duzu kɛ obe Israɛlɛ wa a winɔ 'da a.

Obenɔ kɛ Davidi kua wa tɛ Yeruzalɛmɛ

³ Davidi hɔa Yeruzalɛmɛ i, nɛ a kala 'bɔ ogele wuko. Nɛ wa kua zi ombé gele bulu be do oboko be.

⁴ Lì obenɔ Davidi kua wa tɛ Yeruzalɛmɛ i ni ma kɛ: Samua, Sobabɛ, Natanɛ, Salɔmɔ,

⁵ Ibarɛ, Elisua, Elpelɛtɛ,

⁶ Noga, Nefɛgɛ, Yafia,

⁷ Elisama, Bɛeliada do Elifelɛtɛ.

Davidi nɛa ngɔ Ofilisti

⁸ Ofilisti wa zila na, wa ia Davidi do nwa ngɔ nù Israɛlɛ vɛ̃, nɛ wa vɛ̃ wa tɛa we bi a, takɔ wa ba a. Davidi zila we nɛ, nɛ a nɛ we bi do wa.

⁹ Nɛ Ofilisti wa hɔa kɔ gbangɔlɔ̃ 'da Orɛfa, nɛ wa 'danga mɛnɔ di ni ni.

¹⁰ Davidi nɛa we zɔ ni, nɛ a aka Gale na: “Mi wia we bi do Ofilisti nde? Mɔ dɛ sɛ na, mi nɛ ngɔ wa nde?” Nɛ NWA Gale gese na: “Mɔ nɛ́, hã mɔ bi do wa. Mi e sɛ wa dɛ kɔ̃ mɔ.”

¹¹ Nɛ Ofilisti wa la gbaa dɛ Bala-Pɛrasimɛ, nɛ Davidi bi wa i mɔ, nɛ a nɛ ngɔ wa. Nɛ a tɔ̃ na: “Gale fi gbongbo sanga Owi sɛnɛ mi, ɔ nɛ kɛ ngele lì gbini do ngbo ni.” Yolo dɛ di ni, nɛ wa sa li fala ni na Bala-Pɛrasimɛ, gulu nɛ na: “Gale wele gbini ngbo.”

¹² Ofilisti wa nɛa we yu nɛ, nɛ wa la okpikimanɔ 'da wa dɛ di ni. Nɛ Davidi ba nu a na, wa dɔ ma do'do.

¹³ 'Do nɛ là nyɛlɛ wena gɔ, nɛ Ofilisti wa nɛ 'bɔ mbé nɛ, nɛ wa 'danga mɛnɔ kɔ gbangɔlɔ̃ 'da Orɛfa.

¹⁴ Nɛ Davidi aka 'bɔ Gale mbé nɛ, nɛ Gale gese na: “Mɔ tɛ bì do wa do 'do wa gɔ. Mɔ nɛ́, kɔ mɔ yolo nyɛlɛ sĩ do dati wa, nɛ mɔ hala wa, nɛ mɔ hɔ dɛ 'da wa do mbee kulu zamɔ ote mikokulie.

¹⁵ Kɔ mɔ zele giti mɔ ɔ nɛ giti nyanga Owele tɛ la do zu tenɔ, nɛ mɔ bi wa do gbɛngɛ tɛ̃, we kɛ do 'da fala ni, nɛ nde mi kpe sɛ dati mɔ we bi osoda Filisti.”

¹⁶ Davidi dɛa ɔ nɛ kɛ Gale ba do nu ɛ ni, nɛ obe Israɛlɛ wa bi do Ofilisti, nɛ wa nɛ ngɔ wa. Nɛ wa ndaka wa yolo tɛ le Gabaoni gbaa we hɔ Gezɛrɛ.

¹⁷ Yolo dɛ di ni, nɛ dɔ̃lɔ̃ li 'da Davidi ma yɛ'bɛ zi do ngɔ gele nùnɔ vɛ̃. Nɛ NWA dɛa na, ogele winɔ vɛ̃, wa dɛ kili Davidi.