1 Sakonɔ 13 - WE NU GALE 1995

Davidi nɛa we ba Sanduku Gba Tɔkɛ tɛ Kiriatɛ-Yearimɛ

¹ Davidi wila zi we do ogã wi ngɔ sodanɔ, owanɔ ngɔ osoda koto, do owanɔ ngɔ osoda kama, mba do ombe kumunɔ.

² 'Do nɛ, nɛ a tɔ̃ hã obe Israɛlɛ vɛ̃ kɛ wa mba li ngba wa ni na: “Fala kɛ nɛ zɔ a dia, kɔ NWA Gale 'da lɛ kɔ̃ nde, nɛ lɛ tombo to dɔ̃ dɔ̃ hã tala onya lɛ kɛ wa 'bana tɛ ngɔ nù Israɛlɛ ni, mba do onganganɔ, do olevitɛnɔ kɔ lenɔ 'da wa na, wa tɛ́, hã wa mba do lɛ,

³ takɔ lɛ nɛ, hã lɛ ba Sanduku Gba Tɔkɛ 'da Gale 'da lɛ si do ma. Tua kɛ lɛ lènggè zi do ma do ngba soe dɛa to nwa 'da Saulo gɔ.”

⁴ Winɔ vɛ̃ wa zila we Davidi tɔ̃a ni, nɛ wa kɔ̃a gɛnɛ nɛ de wena, nɛ wa 'bili na, lo dɛ na mɛ ni.

⁵ Ma kɛ Davidi sa mɔ hã obe Israɛlɛ tɛ ngɔ nùi 'da wa vɛ̃, yolo tɛ li ngbala nù Ezipeto si ba gɔtɔ, gbaa we hɔ tɛ Lɛbo-Hamatɛ si gbãlã ngɔ, takɔ wa nɛ we ba Sanduku Gba Tɔkɛ tɛ Kiriatɛ-Yearimɛ i.

⁶ Nɛ Davidi la do wa tɛ Baala, kɛ mbe 'bɔ li nɛ a Kiriatɛ-Yearimɛ, nɛ ma ngɔ nù Yuda ni, we ba Sanduku Gba Tɔkɛ 'da Gale. Sanduki ni, mɛ a kɛ wa sa li NWA Gale zu nɛ, nɛ a dungu ngɔ nɛ tɛ sanga okerubinɛnɔ ni.

⁷ Do 'da fala ni, nɛ nde Sanduku Gba Tɔkɛ zi a kɔ tɔa 'da Abinadabɛ. Wa hɔa i mɔ, nɛ wa ba ma, nɛ wa e ma ngɔ mbé ngilingili, nɛ wa la do ma. Uza do Ahio hã wa kã zi ngilingili ni.

⁸ Nɛ Davidi do obe Israɛlɛ vɛ̃, wa kala omɔ ga zuma kpi do kpi, nɛ wa zɛ ma do ngawi 'da wa vɛ̃ we be yangga 'da wa dati NWA. Mɛ a mɔ ga zuma ɔ nɛ obe kundu, ogã kundu, be biã, do mbala mɔ bolo kɛ wa zɛ do ngba ɛ ni, do mɔtũlũ.

⁹ Wa nɛa we kɔlɔ do fala zɛ do kpalɛ tɛ Kidoni ni, nɛ ongɔmbɛnɔ wa dɛa ɔ nɛ wa nɛ fi Sanduki Gba Tɔkɛ nù fi ni. Kɔ Uza nɛa we zɔ ni, nɛ a ɛfɛ kɔ̃ a we 'be tɛ nɛ.

¹⁰ Nɛ zã NWA nɔ̃lɔ̃ dɛ tɛ̃ a, nɛ a gbɛ a dɛ di ni do ti, we kɛ a lingga we 'be tɛ Sanduku Gba Tɔkɛ ni. Nɛ Uza fia dɛ gbali NWA ni.

¹¹ Davidi nɛa we zɔ ni, nɛ zã a nɔ̃lɔ̃ wena, we kɛ Gale gbɛa Uza ni. Ma hã Davidi sa li fala ni na Perɛsi-Uza. Nɛ li ni 'bana gbaa tia do sɔɛ gɛ.

¹² Nɛ Davidi dɛa zi kili NWA do ngba soe ni, nɛ a tɔ̃ na: “Mi wè do kpɔ kɔ̃ mi ti Sanduki 'da NWA na, ma si dɛ 'da mi i gɔ.”

¹³ Ma kɛ a kɔ̃̀ zi we si do ma dɛ nu tɔa kɔ Gba Ngbo nwa 'da a tɛ Yeruzalɛmɛ i gɔ. Nɛ a ia ma kɔ tɔa 'da Obɛdɛ-Edɔmɛ, wi Gatɛ.

¹⁴ Nɛ Sanduki ɔa zi dɛ kɔ nu fɛlɛ kula 'da a ni zɛkɛ talɛ, nɛ NWA wila nu ɛ tɛ nu fɛlɛ kula 'da a do mɛnɔ 'da a vɛ̃.