1 Sakonɔ 12 - WE NU GALE 1995

Kuti osodanɔ 'da Davidi

¹ Do 'da fala kɛ Davidi usu zi tɛ̃ a tɛ Siklagɛ we yu Saulo, be 'da Kisi ni, nɛ Owele wa tɛa zi, nɛ wa mba do a we bi bolo fala nɛ kpo. Owinɔ ni wa zi a onga soda.

² Nɛ sanga wa ni, ombe wa zi a wi da nzabele, nɛ ombe zi a wi da lasi. Nɛ owinɔ ni, wa ĩ zi ti da lasi, tabi nzabele do kɔ̃ wa bɔa nɛ. Nɛ zélé li owinɔ kɛ wa yula zi kɔ nu kpala Bɛnzamɛ, kɛ mɛ a kpo nu kpala Saulo ngboo ni:

³ Ahiezɛrɛ kɛ a zi a gã wi ngɔ ongba a, do nya a Yoasi, be 'da Sɛma, wi Gibea, do Yɛziɛlɛ do Pelɛtɛ, obenɔ 'da Azmavɛtɛ, do Bɛraka, Yehu, wi Anatɔtɛ,

⁴ Isɛmaya, wi Gabaoni, kɛ a a mbe kpo sanga ogã wi ngɔ gili osodanɔ 'bu wa talɛ ni,

⁵ Irmeya, Yaziɛlɛ, Yohananɛ, Yozabadɛ, wi Gɛdera,

⁶ Eluzai, Yɛrimɔtɛ, Bealia, Sɛmaria, Sɛfatia, wi Harufɛ,

⁷ Ɛlkana, Isia, Azarɛlɛ, Yoezɛrɛ do Yasobamɛ, obe zã Kora,

⁸ mba do Yoela do Zebadia, benɔ 'da Yɛroamɛ, wi Gɛdɔrɛ.

⁹ Ombe winɔ kɔ nu kpala Gadɛ wa kulu ngɔ, nɛ wa nɛ we mba do Davidi tɛ fala a ɔ zi nɛ tɛ li gba zɔ̃ɛ we usu do tɛ̃ a ni. Owinɔ ni zi a onga soda kɛ wa ĩ ti bi bolo do dia nɛ, nɛ wa ĩ 'bɔ ti 'be ngele do sɛlɛ ni. Nɛ owinɔ ni wa nganda zi nɛ́ ogbɔgbɔ, nɛ tɛ wa gbɛngɛ zi 'bɔ ɔ nɛ tɛ odɛngbɛ kɛ wa ɔ ngɔ kalanɔ ni.

^10-14 Owinɔ ni zi vɛ̃ a Owele 'bu ngɔ wa kpo: Ezɛrɛ, Obadia, Eliabɛ, Misɛmana, Irmeya, Atai, Eliɛlɛ, Yohananɛ, Elzabadɛ, Irmeya do Makbanai.

¹⁵ Owi Gadɛnɔ ni zi a onga soda ngboo. Nɛ sanga wa ni, gɛnɛ kɔ wanɔ kɛ wa ngàndà gɔ ni, wele kpo nɛa zi ngɔ ogele soda kama kpo. Nɛ onga sodanɔ kɔ wa ni, wele kpo nɛa zi ngɔ ogele soda koto kpo.

¹⁶ Owinɔ ni wa kũ zi li Yɔrdanɛ do ngba soe hɛ̃a lì kɔ kuti zɛkɛ ni, nɛ wa ndaka owinɔ kɔ gbangɔlɛ̃ si 'biti gba wese do si ba gɔtɔ.

¹⁷ Ombe winɔ kɔ nu kpala Bɛnzamɛ do nu kpala Yuda wa nɛa 'bɔ 'da Davidi tɛ fala kɛ a usu do ma ni.

¹⁸ Davidi hɔa nza, nɛ a yolo dɛ dati wa ni, nɛ a tɔ̃ hã wa na: “Fala kɛ nɛ tɛa we kpa mi do dia sila, takɔ nɛ gala mi nde, nɛ mi kɔ̃ sɛ gɛnɛ nɛ do sila mi vɛ̃. Kɔ ni gɔ, hã fala kɛ nɛ tɛa we nɛ we tɔ̃ zu li mi hã Owi sɛnɛ mi, nɛ nde mi dɛ 'dã mɔ dɛ 'da nɛ gɔ, nɛ Gale 'da oyaa lɛ ɔ temɔɛ sanga lɛ, nɛ a hã etumbu hã nɛ.”

¹⁹ Nɛ Hi Wi 'da Gale lia kɔ Amasai, nwa ngɔ gili sodanɔ 'bu wa talɛ ni, nɛ a tɔ̃ hã a na: “Aa Davidi, be 'da Yɛse, lɛ fala nɛ kpo do mɔ. Lɛ si 'do mɔ. Mɔ ɔ́ do dungu fio, mba do owinɔ kɛ wa gala mɔ ni, we kɛ wi gbaka mɔ wi a NWA.” Davidi kala owinɔ ni, nɛ a a wa do gã wi ngɔ gili sodanɔ 'da a.

²⁰ Nɛ ombe winɔ kɔ nu kpala Manase wa si 'bɔ 'do Davidi, 'da fala kɛ a mba zi do Ofilisti, takɔ wa bi Saulo ni. Nɛ nde Davidi do owinɔ 'da a, wa gàlà zi Ofilisti gɔ, we kɛ ogã wi ngɔ osoda Filisti wa gisa zi wa, nɛ wa tɔ̃ na: “Davidi si sɛ 'do ã nwa 'da a Saulo, nɛ a a sɛ lɛ dɛ kɔ a.”

²¹ Nɛ do ngba soe kɛ Davidi kpula tɛ̃ a dɛ Siklagɛ i ni, nɛ ombe winɔ kɔ nu kpala Manase wa nɛ we mba do a. Owinɔ ni zi a Adna, Yozabadɛ, Yɛdiaɛlɛ, Mikaɛlɛ, Yozabadɛ, Elihu do Silɛtai. Wa vɛ̃ wa zi a ogã wi ngɔ sodanɔ 'da Manase,

²² nɛ wa vɛ̃ zi a onga soda. Wa gbaka zi Davidi do owinɔ 'da a, nɛ a a wa do ogã wi ngɔ sodanɔ 'da a.

²³ Nɛ tũ kpo kpo, Owele wa tɛa zi, nɛ wa mba do Davidi we gbaka a. Nɛ osodanɔ 'da a wa dɛlɛ zi la li ngele.

Osodanɔ 'da Davidi

²⁴ Kɛ gɛ mɛ a ngɔ gili sodanɔ kɛ wa nɛa zi 'da Davidi, tɛ fala a ɔ zi nɛ tɛ Hebroni i, takɔ wa gala a na, a hɔ nwa olo Saulo, ɔ nɛ kɛ NWA Gale ba zi do nu a ni.

²⁵ Kɔ nu kpala Yuda, osoda wa zi koto gazɛlɛ do kama ngbɛ'dɛ'dɛ. Nɛ wa zi do Ongele do osɛlɛ kɔ̃ wa.

²⁶ Nɛ kɔ nu kpala Simeoni, onga soda wa zi koto sambo do kama kpo.

²⁷ Nɛ kɔ nu kpala Levi, owi wili wa zi koto nalɛ do kama gazɛlɛ.

²⁸ Yoyada, gã wi kɔ nu fɛlɛ Aroni tɛa zi do Owi wili koto talɛ do kama sambo.

²⁹ Nɛ mbe be zagbãlã li a a Sadɔkɛ, kɛ a a nga soda ni, a tɛa do ogã wi kɔ nu fɛlɛ kula 'da a 'bu wa bɔa ngɔ wa bɔa.

³⁰ Nɛ kɔ nu kpala Bɛnzamɛ, kɛ wa 'bɔ a kpo nu kpala Saulo ni, wa zi a owi wili koto talɛ, ĩ na, ngɔ gili wa wena, wa zi a ã Owi tonɔ 'da Saulo.

³¹ Nɛ kɔ nu kpala Efraimɛ, onga soda wa zi Owele koto 'bu wa bɔa do kama ngbɛ'dɛ'dɛ (20.800). Nɛ owinɔ ni zi vɛ̃ a owi dĩ kɔ nu fɛlɛ kula 'da wa.

³² Nɛ kɔ mbee nu kpala Manase si ba gɔtɔ, wa zi owi wili koto 'bu ngɔ wa ngbɛ'dɛ'dɛ, nɛ wa saka zi wa na, wa nɛ we e Davidi ngɔ kpongbo nwa.

³³ Nɛ kɔ nu kpala Isakarɛ, ogã wi ngɔ osoda wa zi Owele kama bɔa, mba do sodanɔ kɛ wa zi a ti mbula 'da wa ni. Ogã wi ngɔ osodanɔ ni zi a owi kɛ wa ĩ ti ngba soe do tɛlɛ tɛ kɛ obe Israɛlɛ wa wia we bi do bole ni.

³⁴ Nɛ kɔ nu kpala Zabuloni, osoda wa zi koto 'bu wa mɔlɔ. Wa ĩ zi ti bi bolo, nɛ wa 'dafa zi tɛ wa we nɛ, nɛ wa zi do mɔ bi bolonɔ 'da wa kpi do kpi, nɛ wa bi zi bole do sila wa kpo.

³⁵ Nɛ kɔ nu kpala Nɛftali, ogã wi ngɔ osoda zi koto kpo, mba do osoda koto 'bu wa talɛ ngɔ wa sambo, kɛ wa zi do Ongele do osɛlɛ kɔ̃ wa ni.

³⁶ Nɛ kɔ nu kpala Danɛ, osoda kɛ wa wia zi nɛ bolo ni, wa koto 'bu wa bɔa ngɔ wa ngbɛ'dɛ'dɛ do kama gazɛlɛ (28.600).

³⁷ Nɛ kɔ nu kpala Asɛrɛ, wa zi osoda koto 'bu wa nalɛ. Wa ĩ zi ti bi bolo do dia nɛ, nɛ wa 'dafa zi tɛ wa we nɛ.

³⁸ Nɛ kɔ onu kpala winɔ kɛ mɔ yolo nu lì Yɔrdanɛ, nɛ nde wa si 'biti gba wese ni, nu kpala Rubɛnɛ, Gadɛ do mbee nu kpala Manase, wa zi owi wili koto kama do 'bu wa bɔa, nɛ wa do mɔ bi bolo kpi do kpi kɔ̃ wa.

³⁹ Osodanɔ ni vɛ̃ kɛ wa 'dafa zi tɛ wa we bi bole ni, wa nɛa zi tɛ Hebroni i do sila wa kpo, we e Davidi do nwa ngɔ obe Israɛlɛ vɛ̃. Nɛ tala mbe obe Israɛlɛ wa kɔ̃a zi na, wa hã to nwa hã Davidi.

⁴⁰ Owinɔ ni wa hã to nwa hã Davidi do'do, nɛ wa ɔ do a dɛ di ni tũ talɛ, tɛ nɔ dɔ̃ do nyɔngɔ mɛnɔ kɛ onya wa wa 'dafa zi ma hã wa ni.

⁴¹ Nɛ yolo 'da owinɔ wa ɔ zi tɛ ngɔ nùnɔ kɛ zã Hebroni, gbaa we hɔ 'da onu kpala Isakarɛ, Zabuloni do Nɛftali si gbãlã ngɔ, wa kala zi ngɔ gili nyɔngɔmɛnɔ tɛ̃ ɛ do tɛ̃ ɛ, nɛ wa a ma li 'do opunda do osamo, do ombalata do ongɔmbɔ, nɛ wa nɛ do ma dɛ Hebroni i. Nyɔngɔmɛnɔ ni zi a fũ, mukate kɛ wa dɛa ma do wala rɛsinɛ, do dɔ̃, do nɔ. Nɛ wa tɛa zi 'bɔ do ongɔmbɔ do obata. Mba gɔ, owinɔ ngɔ nùi ni vɛ̃ wa zi do yangga wena.