1 Sakonɔ 11 - WE NU GALE 1995

Davidi hɔa nwa ngɔ nù Israɛlɛ

¹ 'Do nɛ, nɛ obe Israɛlɛ vɛ̃ wa nɛa, nɛ wa kpa Davidi tɛ Hebroni, nɛ wa tɔ̃ hã a na: “Lɛ gɛ a kili tɛ mɔ ngboo.

² Do 'da fala Saulo zi a nwa ngɔ lɛ ni, nɛ nde mɔ zi a mɔ kpe dati osoda Israɛlɛ. Nɛ NWA Gale 'da mɔ tɔ̃a zi hã mɔ na, mɔ a mɔ zɔ sɛ mɔ tɛ obe Israɛlɛ, winɔ 'da ɛ, nɛ mɔ sɛ a nwa ngɔ wa.”

³ Wa tɔ̃a ni do'do, nɛ okumu Israɛlɛ vɛ̃ wa wele we do Davidi dɛ Hebroni ni, nɛ a gba tɔkɔ do wa dati NWA Gale. Nɛ wa a nɔ zu a, takɔ a hɔ nwa ngɔ nù Israɛlɛ, kpasaa ɔ nɛ kɛ NWA Gale tɔ̃a zi do wala 'da Samuɛlɛ, wi gba olo nu a ni.

Davidi ba le Yeruzalɛmɛ

⁴ 'Do nɛ, nɛ Davidi do obe Israɛlɛ vɛ̃ wa nɛa we bi Oyebuzi tɛ kɔ le Yeruzalɛmɛ. Wa sa zi li Yeruzalɛmɛ dati na Yebuzi, we kɛ Oyebuzi wa ɔ zi di ni.

⁵ Nɛ Oyebuzi wa tɔ̃ hã Davidi na: “Mɔ lé sɛ kɔ le gɛ gɔ!” Gɛnɛ kɔ na mɛ ni, nɛ Davidi bi le Yeruzalɛmɛ, nɛ a ba gba ngbo Sioni. Sɔɛ gɛ, wa sa li gba ngboe ni na: “Gba Ngbo nwa 'da Davidi.”

⁶ Davidi tɔ̃a zi na, kuti wi kɛ a gbɛ be Yebuzi ni, nɛ ɛ e sɛ a do gã wi ngɔ sodanɔ 'dɛ ɛ. Nɛ Yoabɛ, be 'da Sɛruya, zi a wi dati we gbɛ be Yebuzi, nɛ a hɔa gã wi ngɔ sodanɔ.

⁷ Davidi kulu dɛ kɔ gba ngboe a ba ni, ma hã wa ia li nɛ na: “Gba Ngbo nwa 'da Davidi.”

⁸ 'Do nɛ, nɛ a ba nu a, nɛ wa yolo tɛ fala wa sa li nɛ na Milo ni, nɛ wa dɛ ogba'da kɛ zã gba ngboe ni zĩ takpa. Nɛ Yoabɛ 'dafa tala le dɛ olo nɛ.

⁹ Na mɛ ni, ngawi 'da Davidi kũ zi dɛ dati kũ fai, we kɛ NWA Gale ngɔ mɔ nyanga nza vɛ̃ zi do a boe.

Onga sodanɔ 'da Davidi

¹⁰ Kɛ gɛ mɛ a li onga sodanɔ 'da Davidi. Wa mba zi do obe Israɛlɛ vɛ̃, nɛ wa saka Davidi do nwa 'da wa, ɔ nɛ kɛ NWA Gale ba do nu a hã wa owinɔ 'da a ni. Nɛ wa dɛa zi mbula 'da Davidi kɔ sabɛlɛnɔ vɛ̃ kɛ a dɛa zi do to nwa 'da a ni.

¹¹ Wi kɛ dati kɔ onga sodanɔ ni a Isɛbalɛ, be 'da mbe wi Hakmoni. A zi a nwa ngɔ “Ogili soda 'bu wa talɛ.” Mbe ngba soe kpo, nɛ a ba sɛlɛ 'da a, nɛ a gbɛ Owele kama talɛ li bolo kpo.

¹² Wi kɛ bɔa a Elazarɛ, be 'da Dodo, kɛ a a be yaa mbe wi Ahoa. Elazarɛ a mbe kpo kɔ nwa bolonɔ 'da Davidi talɛ ni.

¹³ A kã zi Davidi tɛ Pasi-Damimɛ, do 'da fala Ofilisti wa mba ngba wa, nɛ wa bi do obe Israɛlɛ, nɛ obe Israɛlɛ wa yu dati wa ni. Fɔ kpalɛ ɔrzɛ zi fala wa bi do bole ni boe.

¹⁴ Nɛ Elazarɛ do owinɔ 'da a wa mba ngba wa dɛ gbogbo fɔɛ ni, nɛ wa bi Ofilisti, nɛ wa gbɛ wa. Tɛlɛ tɛ kɛ NWA hã zi ngawi hã obe Israɛlɛ, nɛ wa nɛa ngɔ Owi sɛnɛ wa gã wena gɛ a ni.

¹⁵ Nɛ mbe tũ kpo, nɛ onga sodanɔ talɛ kɔ ngɔ gili wanɔ 'bu wa talɛ ni, wa nɛa, nɛ wa kpa Davidi tɛ kɔ ta dɔ̃ɔ do Adulamɛ. 'Da fala ni, nɛ nde Ofilisti wa 'dafa fala ɔi 'da wa tɛ kɔ gbangɔlɔ̃ 'da Orɛfa,

¹⁶ nɛ ombe wa zi tɛ Bɛtleɛmɛ. Nɛ Davidi zi a tɛ fala usu do tɛ wi 'da a i,

¹⁷ nɛ a ma ngɔ lengge le 'da a Bɛtleɛmɛ, nɛ wɔ tɛ le 'da a ba a wena, nɛ a aka na: “Wi wia we nɛ we so lì nɔ nɔa kɔ kɔ̃̀ lì tɛ nu ngba le Bɛtleɛmɛ i hã mi a wio nde?”

¹⁸ Nɛ onga sodanɔ talɛ ni wa nɛa, nɛ wa gbo do kɔ Ofilisti ni, nɛ wa so lì kɔ kɔ̃ɛ ni, nɛ wa si do ma hã Davidi. Davidi nɛa we zɔ ni, nɛ a bɛ̃ we nɔ lì ni, nɛ a a ma nù, we dɔnggɔ do NWA Gale.

¹⁹ Nɛ a tɔ̃ na: “NWA, mi wè we nɔ lì gɛ fala kpo gɔ. Ma ɔ nɛ tɔkɔ tɛ winɔ kɛ wa nɛa we so ma ni, we kɛ wa hɔa fɛna fio.” Nɛ a bɛ̃a we nɔ lì wa tɛa nɛ ni. Ki ni a gba mɛ kɛ onga sodanɔ talɛ ni wa dɛa gɛ a ni.

²⁰ Abisai, nya Yoabɛ zi a nwa ngɔ gili osoda 'bu wa talɛ. Abisai ba zi sɛlɛ 'da a, nɛ a bi do owi sɛnɛ wa, nɛ a gbɛ wa kama talɛ. Nɛ a kpa dɔ̃lɔ̃ li sanga onga sodanɔ 'bu wa talɛ ni.

²¹ Sanga osodanɔ ni, Abisai zi kɔ wanɔ sako sɔ̃a gbãlã tɛ 'da wa yɛ'bɛ wena ni. Nɛ a zi 'bɔ a nwa ngɔ ongba a, nɛ nde a wè kɔ̃ do nwa bolonɔ 'da Davidi talɛ ni gɔ.

²² Bɛnaya, be 'da Yoyada, wi kɔ le Kabseɛlɛ, a zi 'bɔ a be yaa mbe nganga bolo kpo, nɛ a dɛ zi mɔ sɔ̃a gbãlã tɛ wena. Bɛnaya gbɛa zi Oariɛlɛnɔ bɔa ngɔ nù Moabɛ ni. Nɛ mbe ngba soe kpo, nɛ a zĩlĩ kɔ kɔ̃̀ lì, nɛ a gbɛ gbɔgbɔ. Do 'da fala ni, nɛ nde gɛ̃ɛ ba wena, nɛ be sɛsɛ kolo tɛ ala do omɔ ɔ nɛ gbãlã mũlũ ni.

²³ A gbɛa zi 'bɔ mbe du soda Ezipeto kpo, kɛ 'da ngala a mɛtrɛ bɔa do dɔ nɛ. Soda ni zi do gba gbɛlɛ sɛlɛ kɔ̃ a, nɛ Bɛnaya bi a do te, nɛ a ba sɛlɛ kɔ̃ a, nɛ a gbɛ do a.

²⁴ Ki ni a gba mɛnɔ kɛ Bɛnaya dɛa zi, nɛ a kpa do dɔ̃lɔ̃ li sanga onga sodanɔ 'bu wa talɛ gɛ a ni.

²⁵ Sanga osodanɔ ni, Bɛnaya zi kɔ wanɔ gbãlã tɛ wa sɔ̃ wena ni, nɛ nde a wè kɔ̃ do nwa bolonɔ 'da Davidi talɛ ni gɔ. Davidi ia zi a do nwa ngɔ osodanɔ wa zɔ mɔ tɛ̃ a ni.

^26-47 Kɛ gɛ a li ombe kɔ onga sodanɔ 'bu wa talɛ ni. Wi zi a: Asaɛlɛ, nya Yoabɛ Elananɛ, be 'da Dodo, wi Bɛtleɛmɛ Samɔtɛ, wi Harɔrɛ Helɛsi, wi Paloni Ira, be 'da Ikɛsi, wi Tekoa Abiezɛrɛ, wi Anatɔtɛ Sibkai, wi Husa Ilai, wi Ahoa Marai, wi Nɛtofa Helɛdɛ, be 'da Baana, wi Nɛtofa Itai, be 'da Ribai, wi Gibea, kɛ ma ngɔ nù 'da Bɛnzamɛ Bɛnaya, wi Piratoni Hurai, wi Gasɛ, le kɛ ma do osulu lì Abiɛlɛ, wi Bɛtɛ-Araba Azmavɛtɛ, wi Bahurimɛ Eliaba, wi Salboni Obenɔ 'da Hakɛmɛ, wi Gizoni Yonatanɛ, be 'da Sage, wi Hararɛ Ahiamɛ, be 'da Sakarɛ, wi Hararɛ Elifalɛ, be 'da Urɛ Hefɛrɛ, wi Mɛkera Ahia, wi Paloni Hɛsro, wi Karmɛlɛ Narai, be 'da Ezbai Yɔɛlɛ, nya Natanɛ Mibarɛ, be 'da wi Hagri Selɛkɛ, be Amoni Narai, wi Bɛerɔtɛ, wi 'be mɔ bi bolonɔ 'da Yoabɛ, be 'da Sɛruya Ira do Garɛbɛ, kpo wi nu fɛlɛ Yetɛrɛ Uri, be Hiti Zabadɛ, be 'da Alai Adina, be 'da Siza, a zi a mbe kpo kɔ ogã winɔ kɔ nu kpala Rubɛnɛ. A zi do osoda 'bu wa talɛ. Hananɛ, be 'da Maaka Yosafatɛ, wi Metɛnɛ Uzia, wi Asɛtarɔtɛ Sama do Yeiɛlɛ, benɔ 'da Hotamɛ, wi Arɔɛrɛ Yɛdiaɛlɛ, be 'da Simri, do nya a Yoha, wi Tisi Eliɛlɛ, wi Mahava Yɛribai do Yosavia, benɔ 'da Elnamɛ Itama, wi ngɔ nù Moabɛ, mba do Eliɛlɛ, Obɛdɛ do Yasiɛlɛ, Owi Soba.