1 Sakonɔ 10 - WE NU GALE 1995

Saulo fia (1 Sam. 31.1-13)

¹ Mbe ngba soe kpo, nɛ Ofilisti wa tɛa, nɛ wa bi obe Israɛlɛ tɛ ngɔ kala Gilboa. Nɛ wa gbɛ obe Israɛlɛ wena, nɛ tala wa wa yu.

² Ofilisti wa ndaka 'do Saulo do obenɔ 'da a gbaa, nɛ wa kpa obenɔ 'da a Yonatanɛ, Abinadabɛ do Malkisua, nɛ wa gbɛ wa.

³ Nɛ wa linggi Saulo, nɛ wa bi a, nɛ ngawi bole vɛ̃ ma si dɛ ngɔ a. Nɛ Owi da nzabele wa hɔ ngɔ a, nɛ kili ba a nganda wena.

⁴ A nɛa we zɔ ni, nɛ a tɔ̃ hã wi 'be mɔ bi bolonɔ 'da a na: “Mɔ bá du kɔya 'da mɔ, kɔ mɔ gbɛ́ mi, we kɛ mi kɔ̃̀ na, Ofilisti kɛ wa a manda'ba iko ni, wa mɔmɔ mi gɔ.” Nɛ kili ba wi 'be mɔ bi bolonɔ ni wena, nɛ a bɛ̃ we gbɛ a do'do. Ma kɛ Saulo ba du kɔya 'da a, nɛ a te dɛ li nɛ, nɛ a fe.

⁵ 'Da fala wi 'be mɔ bi bolonɔ zɔa na, nwa 'da a fia do'do ni, nɛ a ba tɛ mɛ 'bɔ du kɔya 'da a, nɛ a te dɛ li nɛ, nɛ a fe.

⁶ Tɛlɛ tɛ kɛ Saulo do obulu benɔ 'da a talɛ, wa fia zi gɛ a ni. Nɛ nu fɛlɛ nwa Saulo kumu zi vɛ̃.

⁷ Obe Israɛlɛ kɛ wa ɔ zi tɛ mbee kulu gbangɔlɔ̃ Yizreɛlɛ ni, wa nɛa we zele na, onya wa wa yu bole do'do, nɛ Saulo do obenɔ 'da a wa fia 'bɔ ni, nɛ wa yu. Nɛ wa la lenɔ 'da wa, nɛ Ofilisti wa nɛ, nɛ wa kala ma do mɔ́ wa, nɛ wa kulu dɛ kɔ nɛ.

⁸ Fala sa 'do bole, nɛ Ofilisti wa yɛnggɛ we kala mɔ tɛ ofionɔ, nɛ wa kpa wɔlɔ Saulo do obenɔ 'da a dɛ ngɔ kala Gilboa ni.

⁹ Nɛ wa kala mɔ tɛ wa, nɛ wa 'bili gɛlɛ Saulo, nɛ wa ba zu a mba do mɔ bi bolonɔ 'da a. Nɛ wa tombo Owele tɛ ngɔ nù Filisti, we tɔ̃ dia sakoe ni tɛ kɔ tɔa dɔnggɔ kpikimanɔ 'da wa, do sanga owinɔ.

¹⁰ Nɛ wa a mɔ bi bolonɔ olo Saulo ni kɔ tɔa tɛmpɛloe 'da mbe kpo kɔ galenɔ 'da wa, nɛ wa bɛ̃lɛ̃ kpongbolo zu Saulo kɔ tɔa tɛmpɛloe 'da gale Dagoni.

¹¹ Owi Yabɛsi, tɛ ngɔ nù Galadɛ, wa zila tɛlɛ tɛ kɛ Ofilisti wa dɛa do Saulo ni.

¹² Nɛ mbe Owi kpã silanɔ kɔ le ni, wa nɛ, nɛ wa ba wɔlɔ Saulo, nɛ wa kala 'bɔ wɔlɔ obenɔ 'da a, nɛ wa si do ma dɛ Yabɛsi, nɛ wa mi gbãlã wa dɛ ti mbe gba gbɛlɛ te kɔ le ni. Nɛ wa bɛ̃ nyɔngɔmɔ 'do tũ sambo.

¹³ Saulo fia, we duzu kɛ a dɛ̀ zi mbula 'da NWA Gale gɔ. A bɛ̃a zi we dɛ mbulanɔ 'da a, nɛ a wele zi we do obɔzɔ, we ĩ ti mɛnɔ kɛ ma hɔ sɛ 'do ni,

¹⁴ olo li kɛ na a aka NWA ni. Ma kɛ NWA Gale gbɛa zi a, nɛ a hã to nwa olo a ni hã Davidi, be 'da Yɛse.