Matíe 1 - Neyo

Zozi Klísɩ a lɔ́lɔ́kpaá a wɔlɩ́
( Lúkɩ 3.23‑38 )

¹ Zozi Klísɩ ŋwɔ́ɔ Ablaámʋ yà Davídɩ sɔ́ a lɔ́lɔ́kpa a mnɩ́ a nyɔɔ̀. Zozíi a lɔ́lɔ́kpaá ámá lɛ̀:

² Ablaámʋ va Izákɩ, Izákɩ va Zakɔ́bʋ, Zakɔ́bʋ va Zudáa yà ɔ nɩ́ayúó sɔ́.

³ Zudáa yà ɔ ŋwnɔ́ Tamáa sɔ́ va Falɛ́zɩ lé Zaláa. Falɛ́zɩ va Esrómʋ, Esrómʋ va Alámʋ.

⁴ Alámʋ va Aminadábʋ, Aminadábʋ va Naasɔ́ɔ, Naasɔ́ɔ va Salɩmɔ́ɔ.

⁵ Salɩmɔ́ɔ yà ɔ ŋwnɔ́ Wlaábʋ sɔ́ va Boózʋ, Boózʋ yà ɔ ŋwnɔ́ Wlútʋ sɔ́ va Yobédɩ, lé Yobédɩ va Jesée.

⁶ Jesée va lóo Davídɩ. Ulíi a tɩtɩŋwnɔɔ́ lóo Davídɩ bhá lɛ́ a, ɔ yɔ̀sɔ́ va Salomɔ́ɔ.

⁷ Salomɔ́ɔ va Wloboámʋ, Wloboámʋ va Abía, lé Abía va Azáfʋ.

⁸ Azáfʋ va Zozafátɩ, Zozafátɩ va Zolámʋ, lé Zolámʋ va Ozíásɩ.

⁹ Ozíásɩ va Zotámʋ, Zotámʋ va Akázɩ, lé Akázɩ va Ezekíásɩ.

¹⁰ Ezekíásɩ va Manasée, Manasée va Amɔ́ɔ, lé Amɔ́ɔ va Zozíásɩ.

¹¹ Zozíásɩ va Jekoníásɩ yà ɔ nɩ́ayúó sɔ́. Bhʋ́ a tányɩɛ́ Babɩlɔ́nʋnyʋa bhli lɛ́ Izrayɛ́lɩnyʋa kʋ́ lé á faa géyilɛ kʋ́.

¹² Babɩlɔ́nʋnyʋa fa yɩ́ fɩ́ɛ́ Izrayɛ́lɩnyʋa géyilɛ kʋ́, lé Jekoníásɩ va Salatɩ́ɛ́lɩ, lé Salatɩ́ɛ́lɩ va Zɔlɔbabɛ́lɩ.

¹³ Zɔlɔbabɛ́lɩ va Abiyúdʋ, Abiyúdʋ va Eliakímʋ, lé Eliakímʋ va Azɔ́ɔ.

¹⁴ Azɔ́ɔ va Sadɔ́kɩ, Sadɔ́kɩ va Akímʋ, lé Akímʋ va Eliyúdʋ.

¹⁵ Eliyúdʋ va Eleazáa, Eleazáa va Matánɩ, lé Matánɩ va Zakɔ́bʋ,

¹⁶ lé Zakɔ́bʋ va Zɔ̀zɛ́fʋ, Zɔ̀zɛ́fʋ bhá Malíi. Malíi va Zozíi. Zozíi ɔ́mɔ́ á wlele lɛ́ Kláyɩ́sɩ.

¹⁷ Bháa Ablaámʋ a jànyɩ̀ɛ̀ jɩ̀, lé kà Davídɩ a jànyɩ̀ɛ̀ jɩ̀ ŋnɩ a, ɩ́ nie jànyɩ a cí a kʋ́gbá mɔ̀na. Bháa Davídɩ a jànyɩ̀ɛ̀ jɩ̀ lé kà tányɩɛ́ mʋ́ Izrayɛ́lɩnyʋa kʋ wá Babɩlɔ́nʋ géyilɛ kʋ́ a ŋnɩ a, ɩ́ nie jànyɩ a cí a kʋ́gbá mɔ̀na. Bháa tányɩɛ́ mʋ́ Izrayɛ́lɩnyʋa nɩ wá géyilɛɛ́ Babɩlɔ́nʋnyʋa jɩ̀ lé kà Kláyɩ́sɩ a tányɩɛ́ ŋnɩ a, ɩ́ nie jànyɩ a cí a kʋ́gbá mɔ̀na.

Zozíi a vavatanyɩ á wɔlɩ́
( Lúkɩ 2.1‑7 )

¹⁸ A lɛ́bhɛɛ cémʋ́ Zozi Klísɩ a vavawɔlɩɛ́ plɩ́plɩ mʋ́ a, Zozíi ɔ nɛ́ Malíi ŋwɔ́ɔ wá ŋnɩ́keyʋdɔ̀gbá, ɔ nɩ́ àyɩ wá yuwle yɩbhlɩ, lé á nyɛ́ ɔ́ Zɔ̀zɛ́fʋ bháàda, mà áa sɔ́ɔ́ nɩ́ àyɩ dáamúó pʋ́ʋ lé Lagɔ a Blɔ̀blɔ̀zùzùò kwlíi Malíi jɩ̀ lé ɔ́ pla nɩkplaá.

¹⁹ Mà cémʋ́ Zɔ̀zɛ́fʋ ŋwɔ́ɔ wázɔ̀ námanyɔ a, ɔ nɩ́ yrá lé ɔ ká Malíi gbʋ́ jɩ̀ bhle a, ɩ́ ka ŋnɩ́ lé ɔ́ pláa wɔlɩ́ɛ́ dɩgàlɩ mʋ́ lé ɔ ká Malíi a gbʋ́ wlʋ́.

²⁰ Zɔ̀zɛ́fʋ kʋ wɔlɩ́ɛ́ a bhobhoda lé ɔ́ ŋwɔ́ɔ̀, ɔ́ kʋ yrá lé ɔ́ yra, yraá a mnɩ́ Lagɔ a Kplɔkplɔzùzu srʋ ɔ́ mà: «Zɔ̀zɛ́fʋ, Davídɩ a yʋ́ʋ̀! Wɔlɩ́ ná bhlá mɔ̀! Bháʋ́ Malíi lé fɔɔ́ nà gbó! Mà yʋ́ɔ́ ɔ̀ kʋ̀ ɔ mnɩ́ a, Lagɔ a Blɔ̀blɔ̀zùzùò ʋ́mʋ́ ʋ̀ ŋwʋ́ ɔ̀ mɔ́ mnɩ́.

²¹ Yʋ́ɔ́ ɔ na ká va a, ɔ́mɔ́ nà kà Zozíi ŋnɩ́ ŋwʋ́, ɔ́mɔ́ nà kà ɔ bhlɩ́ɛ́ a mnɩ́ a nyʋaá a nyumoé ciè lé ɔ̀ kà ʋ́ ámá neé sa à.»

²² Wɔlɩ́ɛ́ fɩ́ɛ́ lɩ̀à, ɩ́ ŋnɩ lé cémʋ́ Kanyɔ Lagɔ a nékʋ́cinyɔ cí wá a, ɩ ká neé sralɔɔ̀:

²³ Ŋnɩ́keyʋɔ́ ɔ̀ nɩ́ à zà yʋwlɩ yɩbhlɩ a, Ɔ́ yi nɩkplaá pla lé ɔ́ yi yuwliyʋ va à. Yʋ́ɔ́ ɔ́mɔ́ á na ká Ɛmanʋ́ɛ́lɩ wleè. Ɛmanʋ́ɛ́lɩŋnɩɛ́, ɩ́ gba ŋwɔ́ɔ mà: Lagɔ kʋ àmɔ̀ nyièdɩ.

²⁴ Zɔ̀zɛ́fʋ wlʋ́ yrá a, ɔ́ nɩ wɔlɩ́ɛ́ Lagɔ a Kplɔkplɔzùzùò srʋɔ́ a. Ɔ́ bháʋ́ Malíi lé ɔ́ fɔɔ́ ɔ gbó.

²⁵ Ɔ yɔ̀sɔ́ nɩ́ gɔ̀ mʋmʋ àààn lé ɔ́ vaà. Ɔ́ va cícása yuwliyʋ. Ɔ́mɔ́ á ŋwʋ́ Zozíi ŋnɩ́.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan