Bìoball air-loidhne

Málɩ́kɩ 1 - Neyo

Zán Batísɩ gɩglà Zozíi a zà dʋ̀dʋ kʋ́
( Matíe 3.1‑12 ; Lúkɩ 3.1‑18 ; Záan 1.19‑28 )

¹ A lɛ́bhɛ Lagɔ a Yuwliyʋ Zozi Klísɩ a Námadìè a bháàda.

² Lagɔ a nékʋ́cinyɔ Ezayíi a bɔ́gʋ̀ɔ̀ a mnɩ́, á jɩ́jrà mɔ̀ɔ mà: Lagɔ anɩ́: Ɩ́ yi ná cíecíenyɔɔ́ cíè,ɔ ká bhlà plɩ́, Ɔ ká nà nyúzɔ̀ɔ̀ gɩglà.

³ Nyɔ pá wɔlɩ́ zɩkpɩkɔfʋ́ a mnɩ́, Ɔ́ nie: A gɩglà Kanyɔ a nyúzɔ̀ɔ̀, Lé a srí ɔ nyízɛ̀ɛ̀ sá!

⁴ Ɩ́ zà Zán Batísɩ yi zɩkpɩkɔfʋ́ a mnɩ́ lé ɔ́ ŋwʋ́ɛ́ nyʋa nyú wlú. Ɔ́ pá wɔlɩ́, ɔ́ nie: «A cɩ́cɩ a nɩnɩgbɩ! Ká amɔ nyú wlú ŋwʋ́, bhè Lagɔ ká amɔ a nyumoé ciè!»

⁵ Zudéebhlɩɛ́ yà Zelízalɛ́mʋ a nyʋa a lɔ̀fɩ́ɛ́ sɔ́ yió gɔ̀, lé á sa á nyumoé mnɩ́, lé Záan ŋwʋ́ɛ́ á nyú wlú Zrʋdɛ́ɛnyié a mnɩ́.

⁶ Záan yrʋ́ʋ mnamneku ʋ́ jɩ̀ a mnekubɛ̀tʋ. Kpáàkpɩ́ ŋwɔ́ɔ ɔ́ lelilɩ, lé ɔ́ mɛlɛ lovúkpʋ.

⁷ Ɔ́ srʋɛ nyʋa, ɔ́ nie: «Nyɔɔ́ ɔ̀ yie lɛ́ mɔ́ɔ bɩ́ a, ɔ pɔ́wa pɩalɛ ná naá kʋ́. Nɩ́ ɔ síi a bhlí a tɔ́sɔɛ neé bhɩa.

⁸ Mɔ́ɔ, ɩ́ ŋwʋ́ɛ́ amɔ nyú wlú, mà ɔ́mɔ́ ɔ́ nɩ nyúó ɔ́ na ká amɔ wlú ŋwʋ́ a, Blɔ̀blɔ̀zùzùò mʋ́ ɔ́ na ká amɔ mʋ́ wlú ŋwʋ́.»

Zán Batísɩ ŋwʋ́ Zozíi nyú wlú
( Matíe 3.13‑17 ; 4.1‑11 ; Lúkɩ 3.21‑23 ; 4.1‑13 )

⁹ Bhʋ́ a tányɩɛ́, Zozíi wlʋ́ Galilée bhlɩɛ́ a dúó ʋ̀ ŋwɔ́ɔ Nazalɛ́tɩ a, lé ɔ́ yi lé Záan ŋwʋ́ ɔ́ Zrʋdɛ́ɛnyié a mnɩ́ nyú wlú.

¹⁰ Zozíi wlʋ́ɛ́ yɩ́ nyíé a mnɩ́, mà ɔ́ dʋdʋ̀ lagɔɔ́ a mɔ̀ɔ kalɔ klʋ́, lé Blɔ̀blɔ̀zùzùò kwlíloó jɩ̀ kpóòkpú bhísakʋ́.

¹¹ Lé niwɔlɩ wlʋ́ lagɔɔ́ lé ɩ́ kwlíi, ɩ́ anɩ́: «Ɩ̀ ŋwɔ́ɔ ná Wàwàyʋ, mɔ̀ ɩ́ gbázɩ̀ mʋ́.»

Dɩ́blʋ trányɩ Zozíi

¹² Tányɩɛ́ mʋ́, ɩ̀lɩa plɩ́ kɔ́ɔ̀kʋ́ a, Blɔ̀blɔ̀zùzùò fa Zozíi zɩkpɩkɔfʋ́ a mnɩ́,

¹³ ɔ́ zi mɔ̀ɔ yrií a gwlɩ̀ sɔ́. Mà bhʋ́ a tányɩɛ́, Dɩ́blʋ trányɩlɔɔ́. Ɔ́ kʋ klámna a nyièdɩ lé kplɔkplɔzìzi zrɩ lɔɔ́ gà.

Zozíi cí Lagɔ a Námadìè a wɔlɩ́
( Matíe 4.12‑22 ; Lúkɩ 4.14‑15 ; 5.1‑11 )

¹⁴ Á ŋwʋ́ fɩ́ɛ́ Záan jɩ̀ɩ, lé Zozíi mʋ Galilée bhlɩɛ́ a mnɩ́ Lagɔ a Námadìè a wɔlɩ́ cí ka, ɔ́ anɩ́:

¹⁵ «Tányɩɛ́ Lagɔ ŋwʋ́ wá ʋ́ a, ɛ́ ya ŋnɩ, Lagɔ a Léyibhlɩɛ́ a tányɩɛ́ ya ŋnɩ. Ɩ́zà ɩ́ srʋɛ amɔ lé, a ŋwnʋ́ʋ Lagɔ a Námadìè kʋ́ lé a cɩ́cɩ a nɩnɩgbɩ.»

Zozíi wle zrìbhlanyʋa a mɔ̀na

¹⁶ Yruú a múó kʋ́, Zozíi kʋ Galilée nyíplʋɔ́ a tʋtrʋda lé ɔ́ yɛ́ zrìbhlanyʋa a sɔ́. Simɔ́ɔ yà ɔ nɩ́ayʋ́ Adrée sɔ́, á pálɛ pílo.

¹⁷ Lé ɔ́ srʋ á, ɔ́ anɩ́: «A jɩ́ mɔ́ɔ kʋ́ bhè ká amɔ nyʋa fɩa nyʋa mʋ́ pláa.»

¹⁸ Zozíi cíí kɔ́ɔ̀kʋ́ a, á cíe a pilie sá lé á jɩ́ ɔ́ kʋ́.

¹⁹ Ɩ̀lɩa plɩ́ a, Zozíi sɩsa bhɩɩ́ jɩ̀ a, ɔ́ yɛ́ sɔ́kʋ́ Zebedée a yúó, Zákɩ yà Záan sɔ́, á kʋ gɔ́lʋ́ a mnɩ́, á sa a pílo jí.

²⁰ Ɔ́ wle kɔ́ɔ̀kʋ́ ámá a, á tɩ ʋ́ a tʋ́ Zebedée yà ɔ́ nɔnʋzrɩ̀nyʋ̀àà sɔ́ gɔ́lʋ́ a mnɩ́, lé á jɩ́ ɔ́ kʋ́.

Zozíi sa nyɔ a múó nyumozùzu jɩ̀
( Matíe 8.14‑17 ; Lúkɩ 4.31‑44 ; Nɩnɩgbɩ 10.38 )

²¹ Yruú a múó kʋ́ Zozíi yà ɔ́ kʋjɩ̀nyʋ̀àà sɔ́ mʋ Kapɛnayʋ́mʋ. Mà Zúfʋnyʋa a nyɔbhleyruó kʋ̀ʋ̀ lé Zozíi pla zúfʋcɛcɩwlʋɔ́ a mnɩ́ lé ɔ́ cíe cɩ́acʋ́ kʋ́.

²² Mà nyʋaá à pʋ ɔ nyúkwlí a, neé mnaá ɔ́ wɔlɩ́ yɩbhlɩɛ a zà. Ɔ nɩ́ cɩ́a lɔ̀ a másɛnyʋaá bhísakʋ́, mà pɔ́wakanyɔ bhísakʋ́ ɔ́ cɩ́alɛ.

²³ Nyɔ a múó kʋ la zúfʋcɛcɩwlʋɔ́ a mnɩ́, lé nyumozùzu kʋ ɔ́ la jɩ̀. Mà nyɔɔ́ sa yrè, ɔ́ nie:

²⁴ «Nazalɛ́tɩ a Zozíi, wɔlɩ́ gbá ɩ yrálɛ àmɔ̀ mʋ́ a? Nà yi lé kà àmɔ̀ bhusuu? Ɩ́ yì mɔ̀, mɔ̀ ŋwɔ́ɔ lɛ́ Lagɔ a Kplɔkplɔnyɔɔ́ ɔ́ cíe lɛ́ a.»

²⁵ Nyumozùzùò cí lɛ́ saá, Zozíi gáa lʋʋ́ kʋ́, ɔ́ anɩ́: «Bhli né kʋ́, lé wlʋ́ nyɔɔ́ jɩ̀!»

²⁶ Á kʋ dáamúó lé, nyumozùzùò vɔ́gɔ̀ nyɔɔ́ lé ɔ́ bhɩa wɔlɩ́, lé ʋ́ wlʋ́ ɔ́ jɩ̀.

²⁷ Mà nyʋaá fɩ́ɛ́ kʋ̀ ʋ́ a, neé mnaá. Á anɩ́: «À nɩ́ à zà saá wɔlɩ́ yɛ́! Cɩ́acʋ́ yalʋ cegbá ɔ́ la bhè ʋ̀ kà saá pɔ́wa a? Nyumozìzìè, ɔ́ jɩ́lɩɩ́ lé ɩ́ ŋwʋ́ɛ́ ʋ́ ɔ cícíwɔlɩ!»

²⁸ Ɔ ŋnɩ́ bhli kakamnɩ́lɛ́ Galilée bhlɩɛ́ a lɔ̀fɩ́ɛ́.

Zozíi yalɩma Simɔ́ɔ a ŋwʋ́trɔ lé gupuonyʋa kɔ́kɔ́mnɩ́
( Matíe 8.14‑17 ; Lúkɩ 4.38‑41 )

²⁹ Zozíi wlʋ́ kɔ́ɔ̀kʋ́ zúfʋcɛcɩwlʋɔ́ a mnɩ́ a, ɔ yà Zákɩ lé Záan sɔ́ mʋ Simɔ́ɔ yà Adrée sɔ́ a gbó.

³⁰ Mà á mʋ a, Simɔ́ɔ a ŋwʋ́trɔ pʋ́ la ʋ́, wɔtrɔkukó yɔɔ́ kla. Lé á srʋ Zozíi ŋwnɔ́ɔ́ a wɔtrɔɔ́ a wɔlɩ́.

³¹ Ɔ́ ŋnɩ ɔ́ gɔ̀ lé ɔ́ bhli ɔ́ glɔ̀gbá kʋ́ lé ɔ́ sɔɔ́ glù, á kʋ dáamúó lé wɔtrɔɔ́ dúò lé ŋwnɔ́ɔ́ nyɛ́ á lelilɩ.

³² Kosúgbòsa, yrʋ́ ya yɩ́ lagɔ bhɩa, gupuonyʋaá fɩ́ɛ́, lé nyʋa ànàà nyumozìzi kʋ jɩ̀ a, á la á lɔ̀fɩ́ɛ́ Zozíi gɔ̀.

³³ Dúó a mnɩ́ a nyʋa a lɔ̀fɩ́ɛ́ ŋnɩlɔ̀ gbinekʋ́ wlú.

³⁴ Zozíi yalɩma ʋ́ gupuonyʋa a cícící, lé ɔ́ jɩ́ɩ nyumozìzi kɔ́kɔ́mnɩ́. Cémʋ́ nyumozìzìè yìò a, ɔ nɩ́ɩ́ cíida nyɛ́.

Zozíi mʋ gbanyɩkʋ́ a dí a mnɩ́ Lagɔ̀wɔ̀lɩ̀ɛ̀ cí ka
( Lúkɩ 4.42‑44 )

³⁵ Zizìèda, cúcú kʋ àyɩ dʋ̀dʋ kʋ́, lé Zozíi soglù lé, ɔ́ flʋ zɔ̀. Ɔ́ wlʋ́ʋ dúó gwá lé ɔ́ mʋ dɛ́ɛ́ nyʋa nɩ́ plɩ́ɩ kpanyɩ a, bhibhie ka.

³⁶ Mɔ̀ɔ ɔ́ kʋ lé Simɔ́ɔ yà nyʋa àna sɔ́ mʋ ɔ́ mɔ̀ɔmɔ̀ mʋ́mɔ ka.

³⁷ Á yɛ́ ɔ́ a, á srʋ ɔ́ mà: «Másɛɛ̀! Mɔ̀ nyʋaá fɩ́ɛ́ mʋ́mɔ.»

³⁸ Bhʋ́ Zozíi srʋ á mà: «A yi à kà yígàdà da mʋ! Dɛ́ gbanyɩkʋ́ a dí a mnɩ́, à kà mɔ̀ɔ mʋ! Mà ɩ́ ka lé ɩ cí sáà mɔ̀ɔmɔ̀ Lagɔ̀wɔ̀lɩ̀ɛ̀, ɩ́zà ɩ́ flʋ lɛ́ zɔ̀.»

³⁹ Mà Zozíi plɩ́ɩ Galilée, lé ɔ́ cí mɔ̀ɔ a zúfʋcɛcɩghlɩ a mnɩ́ Lagɔ̀wɔ̀lɩ̀ɛ̀, lé ɔ́ jɩ́ɩ nyumozìzi.

Zozíi yalɩma kosugɔ̀bhànyɔ
( Matíe 8.2‑4 ; Lúkɩ 5.12‑16 )

⁴⁰ Kosugɔ̀bhlànyɔ a múó yi Zozíi gɔ̀, lé ɔ́ sra ɔ́ drɩ̀ koti sá, lé ɔ́ srʋ ɔ́ mà: «Másɛɛ̀, nɩ̀ wà a, ɩ̀ yi míi lé ɩ̀ yi mɔ́ɔ yalɩma, lé ɩ́ yi kplɔɔ̀.»

⁴¹ Ɔ́ cí saá, ŋazɩ kɔ́sɔ Zozíi wlú lé ɔ́ fa sɔɔ́ lé ɔ́ gbɔ́ nyɔɔ́ lé ɔ́ srʋ ɔ́ mà: «Ɩ́ yrá lé yalɩma!»

⁴² Dáamúó, kosugɔ̀gùò wlʋ́ nyɔɔ́ mʋ́, lé ɔ́ yalɩma.

⁴³ Mà Zozíi nyɛ́ ɔ́ tába, lé ɔ́ jɩ́ɩlɔɔ́.

⁴⁴ Ɔ́ srʋ ɔ́ mà: «Nɩ̀ mʋ a, nàa sa nyɔ dí, mà mʋ Lagɔ̀bʋ̀bɔ̀nyɔ gɔ̀, ɔ ká mɔ̀ yɛ́. Lé kà Moyízɩ a Jràmáá a bʋbɔ̀lɩ̀ɛ̀ sa à, bhè nyʋa fɩ́ɛ́ ká saá yɩbhlɩ mà yà yalɩma.»

⁴⁵ Mà nyɔɔ́ mʋ a, bhlɩ́ɛ́ fɩ́ɛ́ jɩ̀ ɔ́ plɩ́ a ɔ́ sa mɔ̀ɔ a nyʋa dí. Ɩ́ nɩ lé Zozíi a dí a mnɩ́ a plaplʋ́ ka yɩ́ la gbʋ́ nyʋa a klʋ́ jɩ̀. Ɔ́ wlʋ́lɛ díé gwá, mɔ̀ɔmɔ̀ ɔ́ kʋɛ lé nyʋa wlʋ́ɛ́ bhlɩ́ɛ́ fɩ́ɛ́ jɩ̀ lé á ŋnɩlɔɔ́ mɔ̀ɔ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan