Lúkɩ 1 - Neyo

Lúkɩ a bɔ́gʋ̀ɔ̀ a gba

¹ Cémʋ́ nyʋa kɔ́kɔ́mnɩ́ ya wá wɔlɩ́ɛ́ ɩ̀ plɩ́ɩ àmɔ̀ nyièdɩ a, bɔ́gwɩ jɩ̀ a jɩ́jrɛ̀ kʋ́ cíe a,

² lé tányɩɛ́ mʋ́ ɩ́ bhɔ̀ a, ɩ́ nyʋaá fɩ́ɛ́ à yɛ́ wá ɩ dá a, bhè à ŋwɔ́ɔ ɩ ŋwɔ́nɩ́srɩ̀nyʋa lé à kà zɩmnɛ́ Lagɔ a tɔ́gɩ̀sɩ a pápʋ́ a tobhu a, ámá à srʋ àmɔ̀.

³ Naa, ná plɔ́plɔnyɔ Teofílɩ, ná sɛ́fʋ gbàa mʋ́ ɩ́ bháa ɩ mʋ́mɔɛ kʋ́, dɩgàsa dɩgàsa, lé cémʋ́ ɩ́ plɩ́plɩ mʋ́ a, ɩ́ yɛ́ ɩ cɩ́cása. Ɩ́mɩ́ kà ŋnɩ́ a zà ɩ́ jɩ́jrà mɔ̀ bɔ́gʋ̀ɔ̀ lɩ̀à lé ká mɔ̀ námasa ɩ́mɩ́ mʋ́ sɩsa à,

⁴ bhʋ́alɛ́ wɔlɩ́ɛ́ fɩ́ɛ́ á cɩ́a wá mɔ̀ a, kà ɩ cɩ́cása ka à.

Zakalíi yà ɔ ŋwnɔ́ Elizabétɩ sɔ́ nɩ́ yʋ́ ka a

⁵ Zudée a lóo á wlele wá Elódʋ a, ɔ tányɩ a nyʋaá à zrɩ wá Lagɔ̀nɔ̀nʋ a, á nyièdɩ a nyɔ ɔ̀ ŋwɔ́ɔ wá Zakalíi, ɔ́ kʋ wá Lagɔ̀bʋ̀bɔ̀nyʋa a jrèè Abía tíele wá a, a mnɩ́, ɔ ŋwnɔ́ á wlele wá Elizabétɩ. Elizabétɩ ŋwɔ́ɔ wá sáà Lagɔ̀bʋ̀bɔ̀nyɔ Alɔ́ɔ a lɔ́lɔ́kpa a mnɩ́ a ŋwnɔ́.

⁶ Zakalíi yà ɔ ŋwnɔ́ Elizabétɩ sɔ́ a nɩnɩgbɩ srí wá Lagɔ a drɩ̀ sá, lé á ŋwʋ́ɛ́ wá sáà ʋ́ námasa ɔ́ jràmáá.

⁷ Mà cémʋ́ Elizabétɩ nɩ́ va a, áa sɔ́ɔ́ nɩ́ yʋ́ va lé á plɩ́ nyɩkpakɩ́.

Kplɔkplɔzùzu srʋ Zakalíi mà ɔ́ yi yʋ́ va

⁸ Yruú kʋ ʋ́ a, nyʋaá yà Zakalíi sɔ́ zrɩlɛ kʋ́ a, á nɩ zrɩzrɩtanyɩ ŋnɩ, ɩ́mɩ́ fa Zakalíi Lagɔ̀wlʋ̀ɔ̀ a mnɩ́ bʋbɔ̀ kà.

⁹ Máà ámá Lagɔ̀bʋ̀bɔ̀nyʋ̀àà, á jràmáá a mnɩ́, nɩ̀gbɩ á pá, mɔ̀ɔ jɩ̀ ɩ́ na ká bhli a, mɔ̀ pla Lagɔ̀wlʋ̀ɔ̀ a mnɩ́ lé ɔ̀ ŋwʋ́ɛ́ nɔ́nʋ́ nyokwi klʋ́ bʋbɔ̀tèbhlèè jɩ̀.

¹⁰ Mà bhʋ́ a yruó kʋ́, nyʋa ànàà lɔ̀fɩ́ɛ́ kʋ jrùkʋ́ á bhibhie.

¹¹ Bhè Lagɔ̀wlʋ̀ɔ̀ a mnɩ́ mɔ̀, Lagɔ á kplɔkplɔzùzu ya Zakalíi yɩ́ flʋ, ʋ́ nynʋ́vʋ̀ bʋbɔ̀tèbhlèè a lilie kʋ́.

¹² Zakalíi a yɩ́ bhlilʋʋ́ jɩ̀ a, duo wlʋ́ɔ́ mnɩ́, lé ŋanɩmɛɛ́ yiloó kʋ́.

¹³ Mà kplɔkplɔzùzùò srʋ ɔ́ mà: «Zakalíi, ŋanɩmɛ ná bhlá mɔ̀, Mà Lagɔ ya nà bhibhiewɔlɩɛ́ nú! Nà ŋwnɔ́ Elizabétɩ yi mɔ̀ yuwliyʋ va à. Mà ŋnɩ́ɛ́ nà kɔ̀ɔ̀ ŋwʋ́ a, ɩ́mɩ́ ɩ̀ ŋwɔ́ɔ Záan.

¹⁴ Yʋ́ɔ́ a vavawɔlɩ yi kɛ́zɔ̀ mɔ̀ lɔlɔ kʋ́ kaà, Lé ɩ́ yi sáà kɛ́zɔ̀ ʋ́ nà klʋ́ gbláà, Lé nyʋa kɔ́kɔ́mnɩ́ yi ɔ́ lɔlɔ nɩ.

¹⁵ Yʋ́ɔ́, Lagɔ a nɔnʋzrɩ̀nyɔ̀kádɔ ɔ́ na ká plɩ́. Ɔ nɩ́ ka duváa mná, ŋwʋ́ yɩ́ nɔtɔ́tʋ́ʋ̀. Ɔ nɛ́ a mnɩ́ mʋ́ ɔ́ na ká kʋ lé Blɔ̀blɔ̀zùzùò kɔ́ɔ́ jɩ̀ kwlíi.

¹⁶ Ɔ́mɔ́ nà kà kɛ́zɔ̀ nɩ, Lé Izrayɛ́lɩnyʋa kɔ́kɔ́mnɩ́ ká sɔ́kʋ́ a Kanyɔ Lagɔ klʋ́ gà.

¹⁷ Lagɔ a cíecíenyɔ bhísakʋ́ ɔ́ na ká kɛ́zɔ̀ yi, Lé ɔ nɩ yi a, Lagɔ a nékʋ́cinyɔ Elíi a zuzu Yà ɔ pɔ́wa sɔ́ ɔ́ ka wá a, ɩ́mɩ́ ɔ́ na ká laa, Lé ɔ ká yúó yà á vanyʋa sɔ́ glaà. Ɔ́ ká nyʋaá à nɩ́ ŋwʋ́ ʋ́ Lagɔ a, á di yrɩ́bha, Bhè á nɩnɩgbɩ ká sá srí. Bhʋ́ a tányɩɛ́, Nyʋaá nà kà kɛ́zɔ̀ ghlɩ̀lɩ̀ Kanyɔ a zà a, Ɔ ká á kʋ́ gʋ́gwlà.»

¹⁸ Mà tányɩɛ́ mʋ́ kplɔkplɔzùzùò bhɩa cícíé zɔ̀ a, Zakalíi yrʋ́ʋ́ mà: «Cégbá mʋ́ ná ká saá yɩbhlɩ mà wɔlɩ́ɛ́ ɩ̀ cí lɛ́ a, ɩ́ ŋwɔ́ɔ cɩ́cása á? Yáa nyɩkpakɩ́ pla, lé ná ŋwnɔ́ a sɛ́fʋ ya sáà ŋnɩ́kpaká plɩ́.»

¹⁹ Lé kplɔkplɔzùzùò srʋ ɔ́ mà: «Mɔ́ɔ á wlele kplɔkplɔzùzu Gablɩɛ́lɩ, mɔ́ɔ kʋ̀ lɛ́ kɔ́ɔ̀kɔ́ Lagɔ á drɩ̀ a, mɔ́ɔ lɛ̀. Ɔ́ɔ cíe mɔ́ɔ mɔ̀ gɔ̀ ká mɔ̀ námadìè lɩ̀à sa a.

²⁰ Naa, bháa yɩ́ lɛ́ zɩmnɛ́ jɩ́ a nɩ̀ ka yɩ́ cí, lé wɔlɩɛ́ ɩ́ srʋɛ lɛ́ mɔ̀ a yruó kʋ́ ɩ́ na ká kɛ́zɔ̀ ŋnɩ a, bhʋ́ nà kà cí. Máà ná cícíwɔlɩɛ́ nɩ̀ɩ́ cɩ́cása kʋ́ bhá ɩ̀ pɩ́ɩ́ kpɔkplá, bhè sɩ́tɛ̀ ɩ́ kʋ bhè ɩ́ yi ŋnɩ.»

²¹ Bhè bhʋ́ a tányɩɛ́, nyʋaá kʋ kɔ́ɔ̀kɔ́ jrùkʋ́ á gláa Zakalíi, ɔ nɩ́ flʋ yɩ́ lɛ zɔ̀, di gbláalaá nyú, ɔ́ ya kpanyɩ Lagɔ̀wlʋ̀ɔ̀ mnɩ́ gwlɛɛ̀.

²² Mà ɔ́ flʋ zɔ̀ a, ɔ nɩ́ míi ɔ ká á gɔ̀ cíi, nyʋaá à kʋ̀ jrùkʋ́ a, bhʋ́ á yɩbhlɩ saá mà wɔlɩ́ flʋlɔɔ́ Lagɔ̀wlʋ̀ɔ̀ a mnɩ́ yɩ́. Ɔ́ɔ pápalɛ, ɔ nɩ́ míi ɔ ká cí.

²³ Mà tányɩɛ́ mʋ́ ɔ́ nɩ nɔnʋzrɩ̀yrìè ŋnɩlɔ̀ wlú a, ɔ́ɔ mʋ gbó.

²⁴ Tányɩ mʋ cɩ́cása plɩ́ ka a, Zakalíi a ŋwnɔ́ Elizabétɩ ka nɩkplaá. Ɔ́ pla nɩkplaá, ɔ́ zúzùò nyʋa yɩ́ kplala cɩ́ a gbɩ́, fɩ́ɛ́ lé ɔ́ cí cɩɩ mà:

²⁵ «A dʋdʋ̀ cémʋ́ mʋ́ Kanyɔ nɩ ná zà a! Wɔlíɛ́ ɩ̀ ŋwɔ́ɔ wá ná zɩkpa zɔ̀ a zʋ̀ a, ɔ́ bhá yruú a múó lé ɔ́ sa mɔ́ɔ mɩ́ gɔ̀.»

Kplɔkplɔzùzu anɩ́ Malíi yi yʋ́ va

²⁶ Elizabétɩ a nɩkplaá a gbɩ́flɔ́ cʋɔ́ a mnɩ́, Lagɔ cíe ɔ kplɔkplɔzùzu Gablɩɛ́lɩ, Galiléebhlɩ a dúó á wlele Nazalɛ́tɩ a mnɩ́,

²⁷ ŋníkeyʋdɔ̀gbáá á wlele Malíi, a nyɛ́ Zɔ̀zɛ́fʋ bháda gɔ̀. Zɔ̀zɛ́fʋ ŋwɔ́ɔ lóo Davídɩ a lɔ́lɔ́kpa a mnɩ́ a nyɔ.

²⁸ Kplɔkplɔzùzùò pla ɔ gbó lé ʋ́ srʋ ɔ́ mà: «Àyúó Malíi jɔ̀lɔ̀ŋwnɔ̀ Lagɔ ya mɔ̀ nyú pá!»

²⁹ Mà Malíi nú wɔlɩ́ɛ́ kplɔkplɔzùzùò cí a, ɔ́ bhobhoé cákalɔ mʋ́, lé ɔ́ yrá ɔ́ nyoku mà: «Bhè bhʋ́anɩ yúó a gba áa?»

³⁰ Lé kplɔkplɔzùzùò srʋ ɔ́ mà: «Malíi, nàa gú mà Lagɔ a glɔ̀gbá kʋ mɔ̀ jɩ̀, jɔ̀lʋ ya mɔ̀ plaà!

³¹ Ɩ̀ yi nɩkpla pla, lé ɩ̀ yi yʋ́ va. Mà ŋnɩ́ɛ́ nà kà yʋ́ɔ́ ŋwʋ́ a, ɩ́mɩ́ ŋwɔ́ɔ Zozíi.

³² Ɔ́ yi nyɩ́kpɔkádɔ plɩ́. Lé á yi kɛ́zɔ̀ mɔ́ Lagɔ̀ɔ̀ ʋ̀ zi kʋ́ a Yuwliyʋ wleè. Lé Kanyɔ Lagɔ yio kɛ́zɔ̀ ɔ tɩtɔ Davídɩ a léyikpoó nyɛ́.

³³ Ɔ́mɔ́ nà kà kɛ́zɔ̀ Izrayɛ́lɩnyʋa káma kɔ́ɔ̀kɔ́ a zà lé ɔ pɔ́waá nɩ́ ka kɛ́ bhɩada ka.»

³⁴ Lé Malíi yrá kplɔkplɔzùzùò mà: «Cégbá mʋ́ ɩ́ na ká mʋ́ plɩ́plɩ áa? Nɩ́ à zà yʋwlɩ yɩbhlɩ.»

³⁵ Kplɔkplɔzùzùò anɩ́: «Blɔ̀blɔ̀zùzùò yì mɔ̀ jɩ̀ kwlíi, lé Lagɔ a pɔ́waá yi mɔ̀ zuzu bhísakʋ́ jɩ̀ gbí. Ɩ́ yi nɩ lé yʋ́ɔ́ nà kà va a, ɔ́ yi kplɔɔ̀, lé á yió Lagɔ a Yuwliyʋ wleè.

³⁶ Dʋdʋ̀ʋ̀ ɩ̀ nɩ́ayʋ Elizabétɩ, ŋwnɔ́ɔ́ á cí wá mà ɔ̀ nɩ ka wá yʋ́ va a, ɔ́ ka nɩkplaá. Ɔ́ ŋnɩ́kpakɩ́ anɔ ya nɩkplaá pla, ɔ́ nɩkplaá á gbɩ́flɔ́ cʋ mʋ́ à kʋ̀ lɛ́.

³⁷ Lɛ́bhɛɛ, lɛ́ nɩ́ kɔ́ kʋ, lé ɛ́ ká Lagɔ sɩa.»

³⁸ Malíi anɩ́: «Kanyɔ a cóŋwnɔ ɩ́ ŋwɔ́ɔ. Cémʋ́ ɩ̀ cí lɛ́ ná zà a, ɩ́ kʋ saá!» Ɔ́ cí lɛ́ saá a, kplɔkplɔzùzùò ʋ́ʋ wlʋ́ɔ́ yɩ́.

Malíi yi Elizabétɩ yɛ́ ka

³⁹ Bhʋ́ a yrié a mnɩ́, Malíi vʋ́vʋ̀à kʋ́ lé ɔ́ fa bhlɩ́ɛ́ mnɩ́ kíkíé kʋ a, lé ɔ́ mʋ Zudáabhlɩ a dú a múó a mnɩ́.

⁴⁰ Mɔ̀ɔmɔ̀ Zakalíi sí, ɔ́ pla ɔ gbó lé ɔ́ pá Elizabétɩ yúó.

⁴¹ Mà Elizabétɩ nú kɔ́ɔ̀kʋ́ Malíi a yúópawɔlɩɛ́ a, yʋ́ɔ́ kʋ̀ ɔ mnɩ́ a, ɔ́ crí. Lé Blɔ̀blɔ̀zùzùò kwlíi Elizabétɩ jɩ̀

⁴² lé ɔ́ bhɩa wɔlɩ́, ɔ́ anɩ́: «Malíi, Lagɔ ya mɔ̀ nyú pá, ŋwnáá fɩ́ɛ́ a nyièdɩ! Lé yʋ́ɔ́ ɔ̀ kʋ̀ mɔ̀ mnɩ́ a, Lagɔ a pápányu yɔɔ́ kʋ́ ŋnɩ!»

⁴³ Lé ɔ́ srʋɔ́ sɔ́kʋ́, ɔ́ anɩ́: «Siiá! Lɛ́gbá ɩ́ ŋwɔ́ɔ bhè ná Kanyɔ ɔ nɛ́ pla ná gbó à?

⁴⁴ Dʋdʋ̀ʋ̀, tányɩɛ́ mʋ́ ɩ́ nú nà yúópawɔlɩɛ́ a, lɔlɔ ka ŋnɩ́ lé yʋ́ɔ́ ʋ̀ kʋ̀ mɔ́ɔ mnɩ́ a, ɔ́ crí.

⁴⁵ Jɔ̀lʋ pla mɔ̀, wɔlɩ́ɛ́ Kanyɔ srʋ mɔ̀, lé nɩ̀ɩ́ duo bɩ́ sa, lé ɩ̀ yà ŋnɩ a, jɔ̀lʋ pla mɔ̀!»

Malíi bhlɩ lé ɔ́ fa Lagɔ ŋwnú

⁴⁶ Malíi anɩ́: «Ná zuzu falɛ Kanyɔ ŋwnú!

⁴⁷ Ná Lagɔ! Ná ʋ́neésanyɔɔ̀! Ná wúgɔ nie lɔlɔ nà zà!

⁴⁸ Ɔ cóŋwnɔɔ́ ɔ̀ nɩ́ dá ka a, Ɔ nɩ́ ɔ́ yɩ́ gɔ̀ sa. Naa bhá yɩ́ lɛ́ zɩmnɛ́ jɩ̀ a, Lé kɔ́ɔ̀kɔ́ a zà, Jànyɩ̀ɛ̀ fɩ́ɛ́, Mɔ́ɔ á na ká jɔ̀lʋ̀ŋwnɔ wleé,

⁴⁹ Máà Lagɔ̀ɔ̀ ʋ̀ zi kʋ́ a, Ʋ́ nɩ ná zà wɔlɩ́ kádɩ, Ʋ ŋnɩ́ɛ́ ɩ blɔ̀ kɔ́ɔ̀kɔ́.

⁵⁰ Nyʋaá à ŋwʋ́ɛ́ Lagɔ kpá a, Ʋ nɩ́ sa á kɔ́ɔ̀kɔ́ glɔ̀gbá jɩ̀.

⁵¹ Ʋ glɔ̀gbá a fɩ́ a ŋnɩ́ mʋ́ Nyʋaá fɩ́ɛ́ kà wázɔ̀ nyɩkɩ́ a, ʋ́ ya á sá jɛ̀.

⁵² Ʋ́ ya léyuo léyikpi zɔ̀ sa. Nyʋaá à kwléle a nyoku sá a, Ámá ʋ́ gbláa lé ʋ́ ŋwʋ́ɛ́ kpá.

⁵³ Nyʋaá kleé bhlá a, Ámá ʋ́ pláalɛ léyri kʋ́, Ɩ́zà léyuo ámá ʋ́ jɩ́lɛ Lé à fa glɔ̀gbɩkɔfɩ́ lé à mnɛ.

⁵⁴ Izrayɛ́lɩ ŋwɔ́ɔ ɔ cóyʋ, Lé ɔ̀ zrɩlɔɔ́ gà a, Ɔ́ luo ɔ́ duo a námɛ kʋ́ Lé ɔ́ ya ʋ́ mɔ́ neé sa,

⁵⁵ Sɩ́tɛ̀ tɛ̀ɛ̀ ɔ́ cí wá à tinyʋa gɔ̀ Mà ɔ́ nɩ́ ká wá kɔ́ɔ̀kɔ́ à tɩtɔ Ablaámʋ Yà ɔ lɔ́lɔ́kpa sɔ́ kʋ́ drʋ.»

⁵⁶ Malíi zi Elizabétɩ gɔ̀ yuosa cɩ́ a ta fɩ́ɛ́ lé ɔ́ yrɩ́bha ɔ́ sabɔ̀da.

Zán Batísɩ a vavatanyɩ

⁵⁷ Elizabétɩ a vavatanyɩɛ́ ŋnɩ a, ɔ́ va yuwliyʋ.

⁵⁸ Nyʋa ɔ yà sɔ́ sí dáamúó a, lé ɔ wlʋ́nyʋa, á nú mà Kanyɔ ya Elizabétɩ nyú pá a, á yio gɔ̀, lé a yɔ̀sɔ́ nɩ lɔlɔ.

⁵⁹ Yʋ́ɔ́ a gbàáta yruó kʋ́, tányɩɛ́ mʋ́ á yio kʋ dì kà a, á anɩ́ a kɔ́ɔ́ ɔ tʋ́ Zakalíi ŋnɩ́ ŋwʋ́.

⁶⁰ Bhʋ́ ɔ nɛ́ srʋ á mà: «Ʋ́ʋ̀n! A wleloó Záan.»

⁶¹ Nyʋa anɩ́: «Ɔ́ɔ́ɔ́! Nà lɔ́lɔ́kpa kʋ́ a nyɔ nɩ́ ŋnɩ́ɛ́ lɩ̀à ka!»

⁶² Lé á pápa a, lé á yrá Zakalíi, cégbá mʋ́ ɔ́ yrá lé a nɩ wle yʋ́ɔ́ à?

⁶³ Zakalíi anɩ́, a nyɛ́ ɔ́ kplipá, lé ɔ́ jɩ́jrà kplipáá jɩ̀ mà: Ɔ́mɔ́ ŋwɔ́ɔ Záan. Mà nyʋa fɩ́ɛ́ kʋ a, neé mnaá.

⁶⁴ Á kʋ àyɩ dáamúó lé Zakalíi wlée né, ɔ́ mɩɔ́ vlulò lé ɔ́ cí, ɔ́ cíé bhè ɔ́ falɛ Lagɔ ŋwnú.

⁶⁵ Nyʋa ɔ yàsɔ́ sí dú lé nyʋa ànàà kʋ̀ díé kʋ̀ ʋ́ gɔ̀ a mnɩ́ a, ŋanɩmɛ yilaá kʋ́. Lé nyʋa ànàà à sí Zudéebhlɩ a kíkíé a mnɩ́ a, á bháʋ́ wɔlɩ́ɛ́ a dí ŋwʋ̀ŋwʋ́ɛ́ kʋ́.

⁶⁶ Lé nyʋa fɩ́ɛ́ à nú wɔlɩ́ɛ́ a, á ŋwʋ́ ɩ́ duo kʋ́, lé á yrá a nyoku mà: «Bhè bhʋ́anɩ yʋ́ɔ́, cégbá mʋ́ ɔ́ na ká kʋ áa?» Máà cɩ́cása lé Lagɔ a pɔ́wa kʋɔ́ jɩ̀.

Zakalíi fa Lagɔ ŋwnú

⁶⁷ Blɔ̀blɔ̀zùzùò kwlíi yʋ́ɔ́ ɔ tʋ́ Zakalíi jɩ̀, lé Lagɔ cíloó neé,

⁶⁸ ɔ́ anɩ́: «Kanyɔɔ̀, pápányu ŋnɩ mɔ̀ kʋ́, Izrayɛ́lɩnyʋa á Lagɔ̀. Cémʋ́ ɩ̀ nɩ lé ɩ̀ yi nà nyʋa kʋ́, Lé ɩ̀ sa ʋ́ má neé lé á ya flíi a, ɩ pápányu ŋnɩ mɔ̀ kʋ́.

⁶⁹ Lé ɔ́ kwlée àmɔ̀ à pʋ́anyɔ nyièdɩ Ɔ cóyʋ Davídɩ a lɔ́lɔ́kpa a mnɩ́ a nyɔ.

⁷⁰ Ɩ́mɩ́ yà wá sɩsɔɔ́ a tányɩɛ́ Nà nékʋ́cinyʋa a nékʋ́ ŋwʋ́, lé á ya wá cí mà:

⁷¹ Ɔ́ɔ yi wá lé ɔ ká àmɔ̀ àa gblɩ̀nyʋa Yà nyʋa fɩ́ɛ́ yrà àmɔ̀ mʋ́ a sɔ́ neé saà.

⁷² Ɔ́ luo ɔ́ Kplɔkplɔmɛnʋ́ a tányɩɛ́ kʋ́ Lé ɔ́ nɩ à tinyʋa námɛɛ́.

⁷³ Wɔlɩ́ɛ́ ɔ́ sɔ́lɩ wá, Lé ɔ́ srʋ wá à tɩtɔ Ablaámʋ a mà

⁷⁴ Ɔ́ yi àmɔ̀ àa gblɩ̀nyʋa neé sa a, Naa à nɩ yi bʋbɔ̀ kà a, à bʋbɔ̀, À ná gú, ŋanɩmɛ ná bhlá sáà àmɔ̀.

⁷⁵ Bhʋ́ tányɩɛ́ fɩ́ɛ́ à nà kà zɩkpa zɔ̀ zi a, À kà kplɔɔ̀, lé à nɩnɩgbɩ ká sá srí.»

⁷⁶ Zakalíi cí sɔ́kʋ́ mà: «Bhè mɔ̀, ná yʋ́ʋ̀, Mɔ̀ á na ká Lagɔ a nékʋ́cinyɔ wleè. Mɔ̀ nà kà bhlà plɩ́ Lé ɔ̀ kà Kanyɔ a nyúzɔ kʋ́ gɩglà,

⁷⁷ Lé kà ɔ́ nyʋaá à ŋwɔ́ɔ Izrayɛ́lɩnyʋa srʋ, Lé a ká saá yɩbhlɩ mà, Ɔ́ɔ yie lé ɔ ká a nyumoé ciè Lé ɔ ká ʋ́ má neé saà.

⁷⁸ À Lagɔ á duo kʋ́ namɛɛ́ plɩ́ gɔ̀. Ʋ́ duo kʋ́ namɛɛ́ a ŋnɩ́ɛ́ mʋ́ Yrʋ́gàvlà na ká lagowlú kʋʋ̀ Lé a ká àmɔ̀ kʋ́ ŋanà.

⁷⁹ Yrʋ́gàvlàà ká nyʋaá kʋ̀ cúcú a mnɩ́ Lé à kʋ̀ kwɩ́ a kalɩmɛɛ́ a kʋ́ ŋanà, Lé a ká àmɔ̀ kʋ́wɔtɔmanyùzɔ kʋ́ ŋwʋ́.»

⁸⁰ Bhè cémʋ́ yʋ́ɔ́ nie lé ɔ́ nynile a, sɩ́tɛ̀ mʋ́ ɔ wúgɔ̀ɔ̀ nie lé ʋ́ glɛ́. Zɩkpɩkɔfʋ́ a mnɩ́ ɔ́ sí. Mɔ̀ɔmɔ ɔ́ kʋ àààn lé ɔ́ bhá yruú lé ɔ́ flʋ Izrayɛ́lɩnyʋa yɩ́.