जकरिया 5 - नेवाः बाइबल

खुगूगु दर्शन - ब्‍वयाच्‍वंगु थूतुलातःगु भ्‍वं

¹ हाकनं जिं थस्‍वयाबलय् छगू भ्‍वंया थु ब्‍वयाच्‍वंगु खना।

² स्‍वर्गदूतं जितः न्‍यन, “छं छु खना?” जिं लिसः बिया, “जिं छगू थूतुलातःगु भ्‍वं खना। उकियागु हाकः ९ मिटर व ब्‍या ४.५ मिटर ति दु।”

³ अले वं जितः धाल, “देशया दक्‍व थासय् लाये त्‍यंगु सराःया बारे उकी च्‍वयातःगु दु। उकिया छखेपाखे फुक्‍क खुँतय्‌त देशं पितिनाछ्वइ धकाः च्‍वयातःगु दु। अले मेखेपाखे मखुगु पाफइपिन्‍त नं पितिनाछ्वइ धकाः च्‍वयातःगु दु।

⁴ दक्‍व शक्ति दुम्‍ह परमप्रभुं धयादी, ‘जिं सराः छ्वयाहये, अले खुँयागु छेँ व जिगु नामय् पाफयाः मखुगु खँ ल्‍हाइम्‍हय्‌सिगु छेँ व दुहां वनी अले दुने च्‍वनाः उकियात नाश यानाबी, सिँ व ल्‍वहंयात तक नं नाश यानाबी।’”

न्‍हय्‌गूगु दर्शन - पिचाय् छम्‍ह मिसा

⁵ हाकनं जिलिसें खँ ल्‍हाःम्‍ह स्‍वर्गदूतं न्‍ह्यःने वयाः जितः धाल, “च्‍वय् स्‍व, छु वयाच्‍वंगु स्‍व।”

⁶ जिं न्‍यना, “व छु खः?” वं लिसः बिल, “व छगू पिचा खः, थ्‍व देश फुक्‍कभनंया मनूतय्‌गु पापं जाः।”

⁷ अले जिं म्‍हःया पुसा चाःगु अले छम्‍ह मिसा पिचाय् च्‍वनाच्‍वंगु खना।

⁸ स्‍वर्गदूतं धाल, “थ्‍व हे दुष्‍टता खः।” याकनं वं मिसायात घ्‍वानाः पिचाय् दुने तल। अले पुसा तित।

⁹ अले जिं थस्‍वयाबलय् निम्‍ह मिसा जिपाखे ब्‍वया वयाच्‍वंगु खना। उमिगु पपुलिइ फय् दु। उमिके सल्‍याँत्‍याः झंगःयागु थें पपू दु। इमिसं व पिचा कयाः आकाश व पृथ्‍वीया दथुइ ब्‍वय्‌का यंकल।

¹⁰ अले जिं जिलिसें खँ ल्‍हाःम्‍ह स्‍वर्गदूतयात न्‍यना, “थुमिसं थ्‍व पिचा गन यंकाच्‍वंगु?”

¹¹ वं जितः धाल, “इपिं बेबिलोनिया देशय् उकियागु निंतिं छगः देगः दय्‌केत वनाच्‍वंगु दु। देगः दय्‌के धुंकाः पिचायात अन थःगु हे थासय् तयाबी।”