जकरिया 14 - नेवाः बाइबलपरमप्रभु झायाः राज्य यानादी 1 परमप्रभुया छगू दिं वयाच्वंगु दु। अबलय् छिमित लुतय् याइ अले लुतय् याःगु मालसामान छिमिगु हे न्ह्यःने इनी। 2 जिं फुक्क जातितय्त यरूशलेमलिसे लडाइँ यायेत मुंके, अले व शहरयात काइ, छेँ पतिकं लुतय् याइ। अले मिस्तय्त बलात्कार याइ। शहरयापिं बच्छि मनूतय्त ज्वनाः विदेशय् यंकी। ल्यंदुपिं मनूत धाःसा शहरय् हे च्वनी। 3 अनंलिपा लडाइँया इलय् थें परमप्रभु उपिं जातितलिसें लडाइँ यानादी। 4 उखुन्हु हे वय्कः यरूशलेमयागु पुर्बपाखे जैतून डाँडाय् दनादी। अबलय् जैतून डाँडा पुर्बंनिसें पच्छिम तक दथु दथुं चिरिबायाः तःधंगु गाः जुइ। बच्छि डाँडा उत्तरपाखे व बच्छि डाँडा दच्छिनपाखे चिलावनी। 5 छिपिं जिगु पहाडया गाः जुयाः बिस्युं वनी छाय्धाःसा व गाः आसेल तक थ्यनी। यहूदायाम्ह जुजु उज्जियाहया पालय् भुखाय् ब्वःबलय् मनूत बिस्युं वं थें छिपिं बिस्युं वनी। अबलय् परमप्रभु जिमि परमेश्वर थः पवित्रम्हनापं झाइ। 6 उखुन्हु तुयुजः दइ मखु, ख्वाँउसे च्वनी मखु अले पु नं गाइ मखु। 7 थ्व अजू चाइपुगु दिं जुइ। चा नं जुइ मखु, न्हि नं जुइ मखु। अले सन्ध्या ई जुइबलय् नं तुयुजः दया हे च्वनी। परमप्रभुं जक थ्व फुक्क स्यू। 8 उखुन्हु हे यरूशलेमं जीवन बीगु लः पिहां वइ। उकियागु बच्छि पुर्बय् मृत सागर अले बच्छि पच्छिमय् भूमध्यसागर पाखे न्ह्याइ। अले तांन्वलाबलय् व चिकुलाबलय् नं मदिक्क न्ह्याना च्वनी। 9 उखुन्हु हे परमप्रभु फुक्क पृथ्वीयाम्ह जुजु जुयादी। सकल मनूतय्सं वय्कःयात परमप्रभु धकाः आराधना याइ अले व हे नामं वय्कःयात म्हसीकी। 10 उत्तरय् गेबांनिसें दच्छिन यरूशलेमय् रिम्मोन तक फुक्क जमिन माथं वनी। यरूशलेम शहर धाःसा तःजाः जुयाः बेन्यामीनया ध्वाखांनिसें न्हापांगु ध्वाखाया थाय् तक, कुन्चाया ध्वाखा तक, अले हननेलया धरहरांनिसें जुजुयागु दाख तिसीगु थाय् तक थःगु हे थासय् च्वनी। 11 मनूत उकी च्वनी अले उकियात हाकनं गुबलें नाशयागु सराः लाइ मखु। यरूशलेम सुरक्षित जुयाच्वनी। 12 यरूशलेमलिसें लडाइँ याइपिं जातितय्थाय् परमप्रभुं छगू ग्यानापुगु ल्वय् हयाबी। इपिं दनाच्वंबलय् हे इमिगु म्हयागु ला ध्वग्गिनाः वनी। इमिगु मिखा इमिगु मिखा ग्वलय् हे ध्वग्गिनावनी अले इमिगु मे इमिगु म्हुतुइ ध्वग्गिनावनी। 13 उखुन्हु हे परमप्रभुं इमित भ्वय्भ्वय् कंकादी। इपिं छम्हय्सिनं मेम्हय्सिगु ल्हाः ज्वनी अले छम्हय्सिनं मेम्हय्सित हमला याइ। 14 यरूशलेमयात बचय् यायेत यहूदायापिं मनूतय्सं लडाइँ याइ। इमिसं जःखः च्वंपिं फुक्क जातितय्गु धन-सम्पत्ति अले यक्व लुँ, वहः व वसः लाका काइ। 15 सलत, खच्चरत, ऊँटत, गधात व शत्रुतय्गु छाउनीइ दुपिं फुक्क पशुतय्त नं थज्याःगु हे ल्वचं स्याइ। 16 अनं लिपा यरूशलेमय् हमला याःपिं जाति जातितपाखें म्वाःपिं सकलें दक्व शक्ति दुम्ह परमप्रभुयात जुजु भाःपियाः आराधना यायेत व बल्चाबाय्या नखः हनेत दँय्दसं यरूशलेमय् वनी। 17 पृथ्वीया जातित मध्ये छुं जाति जुजु दक्व शक्ति दुम्ह परमप्रभुयात आराधना यायेत यरूशलेमय् मवंसा इमिथाय् वा वइ मखु। 18 मिश्रयापिं मनूत च्वय् थाहां मवंसा इमिथाय् वा वइ मखु अले बल्चाबाय्या नखः हनेत च्वय् थाहां मवंपिन्थाय् छ्वयादीगु विपत्ति हे परमप्रभुं इमिथाय् नं छ्वयादी। 19 बल्चाबाय्या नखः हनेत यरूशलेमय् मवनीपिं मिश्र व फुक्क जातितय्गु निंतिं थ्व हे सजाँय जुइ। 20 उखुन्हु हे सलतय्गु गलय् नं “परमप्रभुया निंतिं पवित्र” धकाः कियातःगु दइ, अले परमप्रभुयागु देगःया थलबल वेदीया न्ह्यःने दुगु पवित्र ख्वलात थें जुइ। 21 यरूशलेम व यहूदाय् दुगु थलबल दक्व शक्ति दुम्ह परमप्रभुया निंतिं पवित्र जुइ। थ्व थलबल बां बीपिं मनूतय्सं बांया ला दय्केत छ्यली। उखुन्हुंनिसें दक्व शक्ति दुम्ह परमप्रभुया देगलय् सुं नं न्यायेमिइ याइपिं दइ मखु। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.