जकरिया 10 - नेवाः बाइबलपरमप्रभुं थः मनूतय्त वास्ता यानादी 1 बसन्त ऋतुया इलय् परमप्रभुयाके वा वय्का ब्यू धकाः फ्वँ। छाय्धाःसा वा वय्कीगु सुपाँय् दय्कादीम्ह परमप्रभु हे खः। वय्कलं मनूतय्गु निंतिं वा वय्कादी। अले फुक्कसिगु क्यबय् बुँ ह्वइ। 2 मूर्तितय्सं ध्वंलाइगु खँ ल्हाइ, तन्त्रमन्त्र याइपिन्सं मखुगु दर्शन खनी। म्हगसया अर्थ कनीपिन्सं सान्त्वना मबीगु मखुगु खँ ल्हाइ। उकिं जिमि मनूत तंपिं फैत थें उखेलाः थुखेलाः मदइ। जवाः मदयाः इमिसं दुःख सी। 3 “जिगु तं फैजवाःतय्के लाइ। जिं नायःतय्त सजाँय बी। दक्व शक्ति दुम्ह परमप्रभुं थःगु बथां, यहूदाया घरानायात स्वयादी। अले वय्कलं इमित लडाइँलय् छम्ह घमण्डी सल थें यानादी। 4 यहूदापाखें मू ल्वहं, वपाखें हे पालया नकिं, अले वपाखें हे लडाइँया धनुष, वपाखें हे फुक्क शासकत पिहां वइ। 5 इपिं लडाइँलय् थः शत्रुतय्त लँया धुलय् न्हुत्तु न्हुइपिं बल्लाःपिं सिपाइँत थें जुइ। परमप्रभु इपिं लिसे दीगुलिं इमिसं सल गयाः वइपिं सिपाइँतय्त नं बुकी। 6 “जिं यहूदाया घरानायात बल्लाकाबी अले योसेफया घरानायात बचय् याये। जिं इमित हाकनं लित ब्वनाहय्। छाय्धाःसा जितः इपिं प्रति दया दु। जिं इमित गुबलें नं मत्वःतागु थें च्वंक इपिं न्हापा गथे खः अथे हे यानाबी। छाय्धाःसा जि इमि परमप्रभु परमेश्वर खः, अले जिं इमिगु प्रार्थनाया लिसः बी। 7 एफ्राइमयापिं मनूत वीर सिपाइँत थें जुइ, दाखमद्य त्वनाः लय्ताःगु थें इमिगु मन जुइ। इमि मस्त थ्व खनाः लय्ताइ। परमप्रभुयाके इमिगु नुगः लय्ताइ। 8 जिं इमित सुलि पुयाः सःते, अले इमित छथाय् मुंके। जिं इमित लिफ्यानाः न्हापा गुलि दुगु खः उलि हे दय्काबी। 9 जिं इमित थीथी मनूतय्थाय् छ्यालब्याल यानाः ब्यूसां, इमिसं जितः लुमंका हे च्वनी। इपिं व इमि मस्त बचय् जुइ। अले इपिं लिहां वइ। 10 जिं इमित मिश्र देशं लित हये, अले इमित अश्शूरं मुंकाः हये। जिं इमित गिलाद व लेबनान देशय् हये, अले अन इमिगु निंतिं गाक्क थाय् दइ मखु। 11 इपिं दुःखकष्टया समुद्र छिनावनी। समुद्रया किसिद्वम्बः तनावनी। नील खुसिया लः फुक्क सुनावनी। अले अश्शूरया घमण्ड चूर जुइ, मिश्रया शासन फुनावनी। 12 जिं थःम्हं हे थः मनूतय्त बल्लाके, अले इपिं जिगु नामं जिगु लँपुइ जुइ।” जि परमप्रभुं थ्व खँ धयाच्वना। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.