श्रेष्ठगीत 6 - नेवाः बाइबलपासापिं 1 हे मिसात मध्ये तसकं हिसि दुम्ह, छिमि प्रिय गन वन? व गन वनाच्वंगु दु? वयात मालेत जिमिसं छन्त ग्वाहालि याये। ल्यासेम्ह मिसा 2 जिमि यःम्ह प्रिय नस्वाःगु मसलामा पिनातःगु क्यबय् वंगु दु, थःगु मन लय्ताय्केत अले लिली स्वां खायेत वनाच्वंगु दु। 3 जिमि यःम्ह प्रिय जिम्ह हे खः, जि वय्कःयाम्ह खः। व लिली स्वांया दथुइ चाः चाहुला जुइ। न्यागूगु म्ये ल्याय्मम्ह मिजं ६:४–८:४ 4 हे जिमि प्रिय, छ तिर्सा थें हिसि दु अले यरूशलेम थें तसकं बांलाः। छ झण्डा ब्वय्का च्वनीपिं सेना थें प्रतापी खः। 5 छंगु मिखा जिपाखें फहिकि, वं जितः हीमी चाय्कूगु दु। गिलाद डाँडां च्वलय्या बथां तिंतिंन्हुयाः क्वहां वयाच्वंगु थें छंगु सँ प्याखं हुलाच्वंगु दु। 6 छंगु वा नकतिनि म्वःल्हुइका तःम्ह फैतय्गु सँ थें तुइसे च्वं। उपिं फुक्कं ज्वः ला अले बांलाक मिलय् जू। छपु नं वा छुतय् जूगु मदु। 7 गाचां त्वःपुया तःगु छंगु न्यता बागः थलातःगु धालेग्वः थें च्वं। 8 जुजुया खुइम्ह रानीत दयेमा, अले चयम्ह मथ्याःपिं कलाः दयेमा, सके ल्यायेखाय् मफय्क ल्यासेपिं मिसात दयेमा। 9 तर जिम्ह सुकुभत्तु ज्वः मदुम्ह खः अले फुक्क पूवंम्ह खः, व वया माया तसकं यःम्ह म्ह्याय् खः। फुक्क मिसातय्सं वयात धन्य धकाः धाइ, रानीतय्सं व जुजुया मथ्याःपिं कलाःपिन्सं नं वयागु प्रशंसा याइ। 10 सुथय् निभाः लुया वः थें ज्याःम्ह थ्व सु खः? अले तिमिला थें तसकं बांलाःम्ह व सूर्य थें जः दुम्ह, नगुतय्सं जाःगु आकाश थें प्रतापी थ्व सु खः? 11 बरांया सिमा दुगु क्यबपाखे जि मैदानया न्हूगु फल सःगु स्वयेत क्वहां वना, दाखक्यबय् मुखू ह्वयाच्वंगु दु ला कि मदु अले धालेमाय् स्वां ह्वयाच्वंगु दु ला कि मदु धकाः जि स्वयेत वना। 12 जिं सिइके न्ह्यः हे जिगु इच्छायात जिमि मनूतय् जुजुतय्गु रथपाखे यंकल। पासापिं 13 हे शूलम्मी, लिहां वा, लिहां वा, लिहां वा अले जिमिसं छन्त बांलाक स्वये दयेमा। महानोमय् प्याखं हुगु थें जितः छिमिसं छाय् त्वलं स्वयाच्वनेगु? |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.