श्रेष्ठगीत 1 - नेवाः बाइबल1 सोलोमनया दक्वसिबय् बांलाःगु म्येत थुपिं हे खः। न्हापांगु म्ये ल्यासेम्ह मिसा १:१–२:७ 2 वय्कलं जिगु म्हुतुइ चुपा नयेमा, छाय्धाःसा छिगु माया दाखमद्य स्वयाः नं भिं। 3 छिगु नस्वाःगु अत्तरय् तसकं लय्तायाः छिगु नां प्वंकातःगु नस्वाःगु अत्तर थें। अथे जुयाः ल्यासेपिन्सं छितः माया यायेगु अजू चायापुगु खँ मखु! 4 जितः छिनापं हे यंकादिसँ, झीपिं याकनं हे बिस्युं वनेनु! जुजुं जितः थः द्यनेगु कोथाय् यंकादीमा। जिपिं छिके लय्ताये अले खुशी जुये, अले दाखमद्य स्वयाः नं छिगु मायाया प्रशंसा याये। इमिसं छितः ल्वय्क माया याइ। पासापिं ल्यासेम्ह मिसा 5 जि हाकुसे च्वंम्ह खः अय्नं जि तसकं हिसि दु, हे यरूशलेमया मिसापिं, केदारया पालत थें जि हाकुसे च्वं, तर सोलोमनया देगःया पर्दा थें बांलाः। 6 जि हाकुसे च्वं धकाः अजू चायाः जितः मस्वये मते, छाय्धाःसा छाःगु निभालं जितः हाकुसे च्वंकूगु खः। जिमि मांया काय्पिं जिनापं तम्वःगुलिं जितः दाखक्यब स्वइम्ह यानाबिल। थःगु हे दाखक्यबया धाःसा जिं वास्ता यानागु मदु। 7 हे प्रिय, जितः धयाब्यु, थःगु फैच्वलय्या बथांत गन ज्वयेयंकीगु? अले न्हिनय् इमित गन तयेयंकीगु? छिकपिनि थः पासापिनि बथांया लिक्क जि छाय् थःगु छेनय् गाचां त्वपुयातःम्ह मिसा थें जुयेगु? पासापिं 8 हे मिसात मध्ये तसकं हिसि दुम्ह, छं थःम्हं हे थ्व खँ मस्यूसा, फैच्वलय्या बथांतय् ल्यूल्यू हुँ अले छं दुगुचातय्त फैजवाःतयेगु पाल लिक्क ज्वय्केब्यु। ल्याय्मम्ह मिजं 9 हे प्रिय, छ फारोया रथया सलत मध्येयाम्ह मिसाम्ह सल थें बांलाः। 10 न्हाय्पनय् तयेगु चाचां छंगु न्यताः व सिखलं समा यानातःगु छंगु गःपः गुलि बांलाः। 11 जिमिसं छंगु निंतिं वहलं स्वानातःगु लुँया चाचा दय्काबी। ल्यासेम्ह मिसा 12 जुजु थःगु तःधंगु सोफाय् फ्यतुनादीबलय्, जिं थःगु अत्तरं नस्वा वय्काबिया। 13 जिमि यःम्ह प्रिय, जिगु छातिइ यग्गायाच्वंगु मूर्रं जाःगु कापःया म्हिचा थें च्वं। 14 जिमि यःम्ह प्रिय, जितः एन-गदीया दाखक्यबय् ह्वयाच्वंगु मेहदीया ज्वाँय् थें च्वं। ल्याय्मम्ह मिजं 15 हे प्रिय, छ गुलि बांलाःम्ह खः! गुलि बांलाः! छंगु मिखा सुकुभत्तुया थें च्वं। खः धात्थें हे छ गुलि हिसि दु! ल्यासेम्ह मिसा 16 हे जितः यःम्ह प्रिय! छ तसकं हे बांलाःम्ह खः! छ धात्थें हे हिसि दुम्ह मिजं खः! अले झीगु लासा वाउँसे च्वंगु घाँय् थें च्वं। 17 झीगु छेँया धलिं देवदारु सिमाया जुइ अले सल्लाया सिमाया प्वलः जुइ। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.