रुथया सफू 1 - नेवाः बाइबलमोआबय् एलीमलेक व वया परिवार 1 यक्व न्हापा, न्याय याइपिन्सं राज्य याःगु इलय् इस्राएलय् अनिकाल जूगुलिं यहूदाया बेथलेहेमं छम्ह मनू थः कलाः व निम्ह काय्पिं ज्वनाः मोआब देशय् च्वंवन। 2 व मनूया नां एलीमेलेक खः, वया कलाःया नां नाओमी अले वया निम्ह काय्पिनिगु नां महलोन व किल्योन खः। इपिं यहूदाया बेथलेहेमयापिं एप्रातीत खः। इपिं मोआब देशय् वनाः अन च्वन। 3 नाओमीयात वया निम्ह काय्पिं नापं त्वःता थकाः वया भाःत सित। 4 लिपा नाओमीया काय्पिन्सं मोआबी मिस्तलिसें ब्याहा यात, छम्हय्सिया नां ओर्पा व मेम्हय्सिया नां रूथ खः। अन इपिं झिदँ ति च्वने धुंकाः 5 महलोन व किल्योन सित। थुकथं व मिसा थः भाःत व काय्पिं मदय्क च्वनेमाल। रूथ व नाओमी बेथलेहेमय् लिहां वंगु 6 परमप्रभुं थः मनूतय्त हाकनं सुवाः बियादीगुलिं बुँइ अन्न बांलाक सःगु दु धयागु खँ न्यनाः नाओमीयात थः भौपिं नापं मोआबं थःगु देशय् लिहां वने मास्ति वल। 7 उकिं व थः च्वनाच्वंगु थासं भौपिं नापं पिहां वल, इपिं यहूदा देश लिहां वनेगु लँपुइ वन। 8 लँय् वं भौपिन्त धाल, “छिपिं निम्हं थःछेँय् लिहां हुँ, छिमिसं जि व जिमि काय्पिन्त माया याःगु थें परमेश्वरं छिमित नं माया यानादीमा। 9 परमप्रभुं हाकनं छिमित भाःत व छेँ बियादीमा।” वं इमित घय्पुल, इपिं ह्वाँय्ह्वाँय् ख्वल। 10 अले इमिसं वयात धाल, “मखु, जिपिं नं छिनापं हे छि मनूतय्थाय् वने।” 11 नाओमीं धाल, “हे जिमि म्ह्याय्पिं लिहां हुँ, छिपिं छाय् जिलिसें वयेगु? छिमि भाःत जुइत छु जिगु प्वाथय् मेपिं काय्पिं दु धकाः ला? 12 हे जिमि म्ह्याय्पिं, छेँय् लिहां हुँ। छाय्धाःसा हाकनं ब्याहा यायेत जि बुरी जुइ धुंकल। अज्याःगु छुं आशा दुसां अले थौं चान्हय् हे ब्याहा यानाः काय् बुके फुसां 13 इपिं तःधिक मजुतले छिपिं पियाच्वने फइ ला? छु छिपिं ब्याहा मयासें च्वनेगु ला? मखु, जिमि म्ह्याय्पिं, जिगु हालत छिमिगु स्वयाः बांमलाः, छाय्धाःसा परमप्रभुं जिगु विरोधय् ल्हाः ल्ह्वनादीगु दु।” 14 थ्व न्यनाः इपिं हाकनं ह्वाँय्ह्वाँय् ख्वल, माजुयात भागियानाः ओर्पा थःगु छेँय् लिहां वन। रूथ धाःसा थः माजुलिसे हे च्वनाच्वन। 15 नाओमीं वयात धाल, “स्व, छिमि क्यहेँ थः मनूतय्थाय् व थः द्यःतय्थाय् लिहां वन, छ नं वलिसें लिहां हुँ।” 16 तर रुथं लिसः बिल, “छितः त्वःता वनेत जितः कर यानादी मते। छि गन गन झाल जि अन वये, छि गन गन च्वनादिल जि नं अन च्वने, छि मनूत जिमि मनूत जुइ अले छि परमेश्वर जिमि परमेश्वर जुइ। 17 छि गन सी, जि नं अन हे सी, अले जितः अन हे थुनिगु जुइ। कालं बाहेक मेगु छुंकिं नं जितः छिपाखें फाःसा, परमप्रभुं जितः थथे हे, अज्ज थ्व स्वयाः बांमलाःगु व्यवहार यानादीमा।” 18 रुथं थःत त्वःती मखुत धयागु सीकाः नाओमीं वयात छुं हे मधाल। 19 इपिं निम्ह न्ह्यज्याना वनाः बेथलेहेमय् थ्यंकः वल। इपिं बेथलेहेमय् थ्यंबलय् फुक्क शहर अजू चाल, अन च्वंपिं मिस्तय्सं धाल, “छु थ्व धात्थें नाओमी हे खः ला?” 20 वं धाल, “जितः नाओमी धाये मते। जितः मारा धा, छाय्धाःसा दक्व शक्ति दुम्ह परमेश्वरं जिगु जीवन तसकं म्हाइपुका बियादीगु दु। 21 जि थनं वनाबलय् जितः माःगु फुक्क दुगु खः। तर परमप्रभुं जितः खालि ल्हातं लित हयादीगु दु। छिमिसं जितः छाय् नाओमी धायेगु? परमप्रभु जिगु विरोधय् दनादीगु दु। दक्व शक्ति दुम्ह परमेश्वरं जिके विपत्ति हयादीगु दु।” 22 थुकथं नाओमी थः मोआबी भौ रूथलिसें मोआव देशं लिहां वल। इपिं बेथलेहेमय् थ्यंबलय् तछ्व लयेगु ज्या नकतिनि शुरु जूगु खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.