रोमी 13 - नेवाः बाइबलसरकारं धाःथें च्वनेमाः तीत ३:१-११ ; १ पत्र २:१३-१७ 1 फुक्क मनूत सरकारया अधीनय् च्वनेमाः। परमेश्वरं थुमित अधिकार बियातःगु खः, मेपिन्सं बियातःगु मखु। थौंकन्हय् थुपिं हाकिमतय्त नं परमेश्वरं हे ल्ययादीगु खः। 2 अय्जूगुलिं सुनां अधिकार दुपिं मनूतय्गु खँ मानय् याइ मखु, परमेश्वरयात मानय् मयाःगु ति ग्यनी। वय्कलं इमित सजाँय बियादी। 3 हाकिमत खनाः मभिंपिं मनूत जक ग्याइ। भिंपिं मनूत ग्याइ मखु। छिपिं हाकिमत खनाः मग्यासे च्वने मास्ति वः ला? अय्सा भिंगु भिंगु ज्या जक याना च्वँ, अले हाकिमतय्सं छिमित स्याबास बी। 4 इपिं छिमित भिंगु यायेत तयातःपिं परमेश्वरया सेवकत खः। अय्नं छिमिसं मभिंगु ज्या याना जुल धाःसा इपिं खनाः छिपिं ग्याये माली, छाय्धाःसा सुनानं म्वाय्कं तरवार घाना वइ मखु। इपिं मभिंगु ज्याखँ यानाजुइपिन्त सजाँय बीत तयातःपिं परमेश्वरया सेवकत खः। 5 थथे जूगुलिं परमेश्वरया तंपाखें जक बचय् जुइत मखु, थःगु विवेकयागु निंतिं नं हाकिमतय्सं धाःथें च्वनेमाः। 6 उकिं हे ला खः नि, छिमिसं कर पुलेमाःगु। हाकिमत फुक्कं थज्याःगु हे ज्या यायेत तयातःपिं परमेश्वरया सेवकत खः। 7 उकिं इमित पुलेमाःगु फुक्कं पुलाब्यु, कर पुलेमाःपिन्त कर पु, भन्सार पुलेमाःपिन्त भन्सार पु। अथे हे मानय् याये माःपिन्त मानय् या। छम्हं मेम्हय्सित यायेमाःगु माया 8 थःथवय् माया यायेगु बाहेक सुयाकें छुं त्याये काये मते। मेपिन्त माया याइपिन्सं व्यवस्था पूवंकी। 9 व्यवस्थाय् थुकथं धयातःगु दु – व्यभिचार याये मते, सुयातं स्याये मते, खुयाकाये मते, लोभ याये मते। अले मेगु आज्ञा फुक्कं थुकी दुने हे लाः – “थः जःलाखःलापिन्त थःत थें हे माया या।” 10 मायां मेपिन्त स्यंकी मखु, उकिं माया यायेगु हे व्यवस्था पूवंकेगु खः। 11 छिमिसं थ्व संसारय् गज्याःगु ई वयाच्वंगु दु बांलाक बिचाः याना च्वँ, द्यनेगु त्वःताः दनेगु ई वये धुंकल। उद्धार कायेगु ई न्हापा झीसं विश्वास यानाबलय् स्वयाः नं न्ह्यःने थ्यने धुंकल। 12 चा फुइन, आः न्हि वइन। उकिं खिउँबलय् यायेगु ज्या त्वःताः जःयागु ल्वाभः ज्वनाः तयार जु। 13 थुकथं झीगु चालचलन जलय् च्वंपिनिगु थें याये माल, उकिं झीसं मोजमज्जा यायेगु, अय्लाः त्वना जुइगु, व्यभिचार यायेगु, लाः लाः थे सना जुइगु, ल्वापु यायेगु, नुगः मुइकेगु त्वःताछ्वये माल। 14 थथे मयासें बरु न्ह्यागु याःसां प्रभु येशू ख्रीष्टयात यय्क जक याना च्वँ। थः यःथें जक याना जुइ मते। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.