भजनसंग्रहया सफू 96 - नेवाः बाइबलपरमेश्वर दकलय् तःधंम्ह जुजु 1 परमप्रभुया निंतिं छपु न्हूगु भजन हा, हे पृथ्वीयापिं सकल मनूत, परमप्रभुया निंतिं प्रशंसाया म्ये हा! 2 परमप्रभुया लागि भजन हा, वय्कःया नांया प्रशंसा या, न्हियान्हिथं वय्कलं यानादीगु उद्धारया भिंगु खँ न्यंकि। 3 जाति जातियात वय्कःया महिमाया बारे न्यंकि, सकल मनूतय्त वय्कःया अजू चायापुगु ज्याया बारे कं। 4 परमप्रभु तःधंम्ह व तसकं प्रशंसा याये बहःम्ह खः। मेपिं द्यःतय्त स्वयाः वय्कःयात अप्वः मानय् यायेमाः। 5 जाति जातियापिं द्यःत ला मूर्ति जक खः, तर परमप्रभुं ला स्वर्ग दय्कादिल। 6 वय्कःया जःखः प्यखेरं महिमा व गौरवं झःझः धयाच्वंगु दु, वय्कःया देगः शक्तिं जाः अले झःझः धाः। 7 अय् जाति जातिया छेँजःपिं, परमप्रभुया प्रशंसा या, वय्कःया महिमा व शक्तिया प्रशंसा या, 8 परमप्रभुया नांयात तःधंकेत वय्कःया प्रशंसा या, देछा ज्वनाः वय्कःया देगलय् वा। 9 पवित्रतां झःझः धाय्कः परमप्रभुया आराधना या। हे पृथ्वीयापिं सकल मनूत, वय्कःया ग्याःभय का! 10 फुक्क जातितय्त धा, “परमप्रभु जुजु खः,” संसार धिसिलाक्क च्वंगु दु उकियात संके फइ मखु। वय्कलं न्यायकथं मनूतय्गु इन्साफ यानादी। 11 पृथ्वी व आकाश लय्तायेमा, समुद्र व अन दुपिं फुक्क प्राणीत लय्तायाः तसकं हालेमा। 12 बुँ व उकी सःगु फुक्क लय्तायेमा, अले गुँयागु फुक्क सिमा परमप्रभुया न्ह्यःने लय्तायाः म्ये हालेमा, 13 परमप्रभु पृथ्वीइ राज्य यायेत झाइबलय् वय्कलं न्याय व धार्मिकताकथं संसारयापिं मनूतय्त राज्य यानादी। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.