भजनसंग्रहया सफू 81 - नेवाः बाइबलनखःया भजन आसापया भजन, लय् तइम्हय्सिगु निंतिं – गित्तिया कथं 1 परमेश्वरयात तःधंकाः ततःसलं म्ये हा। वय्कः झीगु शक्ति खः। ततःसलं याकूबया परमेश्वरया जय या। 2 दम्फु व वीणा था, सारंगी कियाः भजन हा। 3 अमै व पुन्हिखुन्हु चान्हय् झीगु नखः हनेत तुरही पु। 4 थ्व इस्राएलयागु विधि खः, याकूबया परमेश्वरयागु उजं खः। 5 वय्कलं मिश्र देशय् हय्क्काः वंबलय् इस्राएलीतय्गु निंतिं थ्व नियम बियादीगु खः। जिं म्हमस्यूगु सलं थथे धयाच्वंगु ताल, 6 “जिं छिमिगु ब्वहलं कु चीकाबियागु दु, जिं छिमित थाकुगु ज्यापाखें छुत्काराबियागु दु। 7 छिमिसं थःपिन्त दुःख जूबलय् जितः सःतल, अले जिं छिमित बचय् यानाबिया। नँ न्याइगु सुपाँचं जिं छिमित लिसः बिया। अले मेरीबाया लखय् जिं छिमित जाँचय् याना। सेला 8 हे जिमि मनूत, न्यँ, जिं छिमित ख्याच्वः बिया थके। हे इस्राएल, छिमिसं न्यना जक ब्यूगु जूसां गाः 9 छिमिथाय् पिनेयापिं द्यःत गुबलें मदयेमाः छिमिसं पिनेयापिं द्यःतय्गु न्ह्यःने भ्वपुले हे मते। 10 मिश्र देशं छिमित लिगनाः हयाम्ह जि हे छिमि परमप्रभु परमेश्वर खः। छिमिसं थःपिनिगु म्हुतु चाय्कि, जिं जाय्काबी। 11 “तर जिमि मनूतय्सं जिगु खँ मन्यं। इस्राएलं जिगु आज्ञा मानय् मयाः। 12 उकिं जिं इमित इमि यत्थे जुइमा धकाः त्वःताबिया। जिं इमित इमि जिराहा इच्छा कथं याकेबिया। 13 “जिमि मनूतय्सं जिगु खँ न्यंगु जूसा इस्राएल जिं धाःथें जूगु जूसा 14 जिं इमि शत्रुतय्त धायेवं बुकाछ्वयेगु खः। जिं इमित धायेवं त्याकेगु खः। 15 जितः महीपिन्सं ग्यानाः जिगु न्ह्यःने भ्वपू वइगु खः। इमिगु सजाँय सदां सदांया निंतिं जुइगु खः। 16 इस्राएलीतय्त धाःसा दक्वसिबय् भिंगु छ्व नकेगु खः, ल्वहं कस्तिं छिमित लुधंकिगु खः।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.