भजनसंग्रहया सफू 80 - नेवाः बाइबलइस्राएल परमेश्वरया दाखमा आसापया भजन, लय् तइम्हय्सिगु निंतिं – “बाचाया लिली स्वांया” रागय् 1 हे इस्राएलया फैजवाः, जिमिगु खँ न्यनादिसँ। छिं हे योसेफया सन्तानयात फैबथांयात थें ज्वयादीगु खः। पपू दुपिं करूबतय् दथुइ च्वनादीम्ह हे परमेश्वर, मनूतय्त थःगु जः क्यनादिसँ। 2 एफ्राइम, बेन्यामीन व मनश्शे कुलयापिन्त थःगु शक्ति क्यनाः जिमित बचय् यानादिसँ। 3 हे परमेश्वर, जिमित हाकनं छिपाखे लित ब्वनाहयादिसँ। जिमित थःगु ख्वाःया जलं खय्कादिसँ। अले जक जिपिं बचय् जुइ। 4 हे परमप्रभु, दक्व शक्ति दुम्ह परमेश्वर, छि गुबलय् तक थःमनूतय्गु प्रार्थना खनाः तंम्वयाच्वनादीगु? 5 छिं जिमित नयेत दुःख बियादिल। अले त्वनेत ख्वबि बियादिल। 6 छिं जिमित जःलाखःलाया जातितलिसे ल्वायेगु ल्वापु पुसा जक यानादिल। जिमि शत्रुतय्सं जिमित हेबाय्चबाय् याइगु। 7 दक्व शक्ति दुम्ह परमेश्वर, जिमित हाकनं छिपाखे लित ब्वनाहयादिसँ। जिमित थःगु ख्वाःया जलं खय्कादिसँ। अले जक जिपिं बचय् जुइ। 8 छिं जिमित दाखमा थें मिश्रं हयादिल। छिं मेमेगु जातियापिन्त पितिनाः जिमित थःगु देशय् पिनादिल। 9 छिं जिमित ब्वलनेत छिंकादिल। जिमिगु हा बल्लात, अले देशन्यंक न्यनावना। 10 जिमिगु किचलं गुँत त्वपुल, जिमिगु कचां ततःमागु देवदारुया सिमात नं त्वपुल। 11 जिमिसं थःगु कचा भूमध्यसागर तक न्यंका, अले चुलि यूफ्रेटिस खुसि तक थ्यंका। 12 अय्नं जिमिगु प्यखेंया पःखाः छाय् थुनादिया? आः थन न्ह्याम्हं दुहां वयाः दाख खुयाः यंके फु। 13 आः गुँफातय्सं वयाः न्हुयाः स्यंकाथके फु, अले गुँपशुतय्सं वयाः नयाः वने फु। 14 हे दक्व शक्ति दुम्ह परमेश्वर, जिपिंपाखे हाकनं लिफः स्वयादिसँ। स्वर्गं जिमित क्वःस्वयादिसँ, अले जिमिगु दुःख खंकादिसँ। थ्व दाखमाया सुसाःकुसाः यानादिसँ 15 छिं थःम्हं पिनादीगु दाखमायात बचय् यानादिसँ। छिं थःगु लागिं बल्लाकादीगु कचायात बचय् यानादिसँ। 16 शत्रुतय्सं छिगु दाखमायात ध्यनाब्यूगु दु, मि तयाः छ्वय्काब्यूगु दु। इमित तं क्यनादिसँ, अले नाश यानादिसँ। 17 छिं थःम्हं ल्ययादीपिं मनूतय्त सुसाःकुसाः यानाः बचय् यानादिसँ, छिं थःम्हं हे बल्लाकादीगु जातियात। 18 उकिं यानाः जिमिसं छितः गुबलें हे त्वःते मखु। जिमित न्हूगु जीवन बियादिसँ, जिमिसं छिगु नां काये। 19 हे परमप्रभु, दक्व शक्ति दुम्ह परमेश्वर, जिमित हाकनं छिपाखे लित ब्वनाहयादिसँ। जिमित थःगु ख्वाःया जलं खय्कादिसँ। अले जक जिपिं बचय् जुइ। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.