भजनसंग्रहया सफू 68 - नेवाः बाइबलबिजयया म्ये दाऊदया भजन, लय् तइम्हय्सिगु निंतिं – छपु म्ये 1 परमेश्वरं दनाः थः शत्रुतय्त छ्यालब्याल यानादीमा। वय्कःयात महीपिं मनूत वय्कःया न्ह्यःनें बिस्युं वनेमा। 2 फसं कुँयात ब्वय्कू थें वय्कलं इमित ब्वय्कादीमा, मिइ मैन नायावं थें परमेश्वरया न्ह्यःने दुष्टत नाश जुयावनेमा। 3 तर धर्मीत लय्तायाच्वनेमा। इपिं परमेश्वरया न्ह्यःने लय्तायेमा, अले लसतां हालाजुइमा। 4 परमेश्वरया भजन हा! वय्कःया नांयात तःधंकि! सुपाँय्या च्वं वइम्हय्सिगु निंतिं छपु भजन हा। वय्कःया नां परमप्रभु खः वय्कःया न्ह्यःने लय्ता। 5 पवित्र देगलय् च्वनीम्ह परमेश्वर मांबौ मदुपिनि बौ खः अले भाःत मदुपिन्त रक्षा यानादीम्ह खः। 6 याकःचापिन्त वय्कलं परिवार दय्कादी। वय्कलं कुनातःपिन्त त्वःतकादी, अले इमित लय्ताय्कादी। विद्रोह याइपिं धाःसा गंगु व लः मदुगु थासय् च्वनेमाली। 7 हे परमेश्वर, छि थः मनूतय् न्ह्यः न्ह्यः झाःबलय्, छि मरुभूमिया लँ जुयाः न्ह्यांवनादीबलय्, सेला 8 इस्राएलया परमेश्वर, सीनै पर्वतय् खनेदय्कः झाःम्ह परमेश्वरया न्ह्यःने पृथ्वी लिगिलिगि सन व स्वर्गं वा गात। 9 हे परमेश्वर, छिं गाक्क वा वय्काः गना च्वंगु थःगु सर्बययात वाउँसे च्वंकादिल। 10 छिकपिनि मनूत वयाः अन च्वन। अले गाक्क अन्न सय्काः छिं मगाःमचाःपिन्त लुधंक बियादिल। 11 परमप्रभुं आज्ञा बियादिल, तःम्ह हे मिसातय्सं थ्व खँयात न्यंका जुल। 12 “जुजु व सिपाइँत बिस्युं वन। छेँय् च्वंपिं मिसातय्सं इमिसं त्वःताथकूगु इना काल। 13 फैगलय् फै स्वयाच्वंपिन्सं नं वहःयागु सुकुभत्तु काये खन। थ्व सुकुभत्तुयागु पपू वहःयागु व पा लुँयागु खः।” 14 दक्वसिबय् बल्लाःम्हय्सिनं सल्मोन पहाडय् च्वापु गाः थें च्वंक जुजुतय्त छ्यालब्याल यानादिल। 15 बाशान पहाड गुलि तःधं, थ्व पहाडय् यक्व च्वकात दु। 16 हे छ्वांछ्वांवःगु पहाड, छं छाय् परमेश्वर थः च्वनेत ल्ययादीगु पर्वतयात नुगः मुइकाः स्वयेगु? परमप्रभु अन सदांया निंतिं च्वनादी। 17 परमेश्वर थःगु बबल्लाःगु द्वलंद्वः रथया दथुइ च्वनाः परमेश्वर सीनै पहाडं पवित्र थासय् झाइ। 18 हे परमप्रभु परमेश्वर, छि तःजाःथाय् थाहां झाःबलय् छिं कैदीतय्त ज्वनाः झाल। छिं मनूतय्गु देछा कयादिल, विद्रोहीतय्गु देछा तकं कयादिल, हे परमप्रभु परमेश्वर, छि अन सदांया निंतिं च्वनादी। 19 परमप्रभुयात तःधंकि, वय्कः झीत बचय् यानादीम्ह परमेश्वर खः। वय्कलं न्हियान्हिथं झीगु कु क्वबियादी। सेला 20 झी परमेश्वर झीत बचय् यानादीम्ह परमेश्वर खः। परमप्रभुं झीत मृत्युपाखें बचय् यानादी। 21 परमेश्वरं वय्कःया शत्रुतय्गु छ्यं चुंदंकाबी अले थःगु हे लँय् जुइपिं पापीतय्गु छ्यं नं। 22 परमप्रभुं धयादी, “जिं इमित बाशानं लित हये। जिं इमित समुद्रया दुनें नं लित हये। 23 थथे हे जिमि मनूतय्सं इमिगु हिं थःपिनिगु तुति सिली, इमि खिचातय्सं तकं ब्व कायेखनी।” 24 हे परमेश्वर, छिगु विजय यात्रा सकसिनं खंगु दु, परमेश्वर जिमि जुजुयागु पवित्र थासय् न्ह्याःगु विजय यात्रा। 25 म्ये हालीपिं न्ह्यःने न्ह्यःने, बाजं थाइपिं ल्युने ल्युने, दथुइ दम्फु थानावःपिं मिसात दु। 26 परमेश्वरयात वय्कःया मनूतय्गु सभाय् तःधंकि। याकूबया सन्तान फुक्कसिनं परमप्रभुयात तःधंकि। 27 दक्वसिबय् न्हापां दक्वसिबय् चिधंगु बेन्यामीन कुलयापिं मनूत, अनंलि यहूदा कुलया न्ह्यलुवाःत व इमिगु पुचः, वयां ल्यू जबूलून व नप्ताली कुलया न्ह्यलुवाःत। 28 हे परमेश्वर, छिं थःगु शक्ति क्यनादिसँ, न्हापा क्यनादी थें थःगु शक्ति क्यनादिसँ, 29 यरूशलेमय् दुगु छिगु देगःया कारणं जुजुपिन्सं छिगु निंतिं देछा हइ। 30 तिंकथिया दथुइ सुलाच्वंपिं पशुतय्त ब्वःबियादिसँ। द्वहंत व इमि मस्तय् बथां थें च्वंपिं जातियात ब्वःबियादिसँ, वहःया कुचात ज्वनाः तुति भ्वपू मवतले इमित ब्वःबियादिसँ। ल्वापुइ लय्ताइपिं जात जातितय्त उखेलाः थुखेलाः मदय्कादिसँ। 31 मिश्र देशं दूतत वइ कूशं परमेश्वरया न्ह्यःने पुलिं चुयाः इमिगु देछा बी। 32 पृथ्वीइ च्वंगु राज्यत फुक्कसिनं परमेश्वरयागु म्ये हा, परमप्रभुयागु भजन या। सेला 33 न्हापांनिसें दुगु आकाशय् जुइम्ह परमप्रभुयात तःधंकि। वय्कः थःगु शक्तिशाली सलं हाःगु न्यँ। 34 परमेश्वरयागु शक्तियागु बारे सकसिनं न्यंकि। इस्राएल न्यंक वय्कः च्वजाः। वय्कःयागु शक्ति आकाशय् थ्यंक न्यं। 35 इस्राएलया परमेश्वर वय्कःयागु देगलय् तसकं हनेबहःम्ह खः। वय्कलं थः मनूतय्त शक्ति व बल बियादी। परमेश्वरयात प्रशंसा या। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.