भजनसंग्रहया सफू 51 - नेवाः बाइबल

क्षमा या निंतिं प्रार्थना

दाऊदया भजन, लय् तइम्‍हय्‌सिगु निंतिं, नातान अगमवक्तां ब्‍वःबी धुंकाः दाऊदया पश्‍चातापया निंतिं हाःगु भजन

¹ हे परमेश्‍वर! जितः दया यानादिसँ। छाय्‌धाःसा छि सदां दया यानादीम्‍ह खः। जिगु पाप हुयाछ्वयादिसँ! छाय्‌धाःसा छि सदां मदिक्‍क माया यानादीम्‍ह खः।

² जिगु फुक्‍क अधर्मयात सिलादिसँ, अले जिगु पापं जितः शुद्ध यानादिसँ।

³ जिं थःगु अपराध मानय् याये, अले जिगु पाप न्‍ह्याबलें जिगु हे न्‍ह्यःने दु।

⁴ हे परमेश्‍वर, छिं मभिं धकाः धयादीगु ज्‍या हे जिं यानागु दु, जिं छिगु विरोधय् जक पाप यानागु दु, उकिं छिं जिगु न्‍याय यानादीगु पाय्‌छि जू अले जितः दोषी ठहरय् यानादीगु पाय्‌छि ताय्‌के।

⁵ स्‍वः, जि बूबलय् हे पापी खः। मांया प्‍वाथय् दुबलय् निसें पापं जाःम्‍ह खः।

⁶ छितः बूसांनिसें भिं मनू जूगु यः। उकिं जितः छिगु बुद्धि बियादिसँ।

⁷ जि शुद्ध मजुतले जितः हिसप घाँय्‌नं सिलादिसँ, अले जि च्‍वापु स्‍वयाः तुयुसे च्‍वनी।

⁸ जितः लसता व आनन्‍दया खँ हाकनं न्‍यंकादिसँ अले छिं त्‍वाथुलादीगु क्‍वँय्‌त लय्‌तायेमा।

⁹ जिगु पापपाखें छिगु ख्‍वाः फहीकादिसँ, अले जिगु फुक्‍क अधर्म हुयाछ्वयादिसँ।

¹⁰ हे परमेश्‍वर, जिगु नुगःयात शुद्ध यानादिसँ। अले जिके हाकनं न्‍हूगु यानाः क्‍वातूगु आत्‍मा दय्‌कादिसँ।

¹¹ जितः छिगु न्‍ह्यःनं तापाक तयादी मते, अले थःगु पवित्र आत्‍मायात जिपाखें लित यंकादी मते।

¹² छिगु मुक्तिया लसता जितः हाकनं बियादिसँ। अले जितः छिगु आज्ञा मानय् यायेगु मन बियाः कःघानादिसँ।

¹³ अले जिं पापीतय्‌त छिगु लँ क्‍यने, इपिं छिपाखे लिहां वइ।

¹⁴ हे परमेश्‍वर, हे जिम्‍ह उद्धारकर्ता परमेश्‍वर, जितः मनू स्‍याःगु अपराधपाखें बचय् यानादिसँ। अले जिं छिं बियादीगु धार्मिकताया निंतिं लय्‌तायाः म्‍ये हाले।

¹⁵ हे परमप्रभु, जिगु म्‍हुतु चायेकादिसँ, अले जिं छितः प्रशंसा याये।

¹⁶ बलि छाःगुलिइ छि लय्‌तायादी मखु, होमबलिइ नं छि लय्‌तायादी मखु।

¹⁷ ख्‍वःगु नुगः हे परमेश्‍वरया निंतिं ल्‍वःगु बलि खः। हे परमेश्‍वर, ख्‍वःगु व पस्‍ताय् चाःगु नुगःयात छिं मयय्‌कादी मखु,

¹⁸ हे परमेश्‍वर, सियोनयात भिं यानादिसँ, उकियात ग्‍वाहालि बियादिसँ। यरूशलेमया पःखाः हाकनं दय्‌कादिसँ।

¹⁹ अले छि पाय्‌छिगु बां बीगुलिइ लय्‌तायादी, व होमबलि बीगुलिइ लय्‌तायादी, मनूतय्‌सं हाकनं छिगु वेदीइ द्वहं बां बी।