भजनसंग्रहया सफू 29 - नेवाः बाइबलपरमप्रभुया सलं न्ह्यागु नं याये फु दाऊदया भजन 1 हे स्वर्गदूतत, परमप्रभुया प्रशंसा या! परमप्रभुया महिमा व शक्तिया प्रशंसा या। 2 परमप्रभुया नां तःधंगुलिं वय्कःयागु प्रशंसा या। परमप्रभु खनेदय्कः झाइबलय् वय्कःया न्ह्यःने वय्कःयागु पवित्रताय् पुलिं चुयाः वय्कःयात आराधना या। 3 परमप्रभुया सः समुद्रय् थ्वइ। तसकं तःधंम्ह परमेश्वर न न्याः थें हाली। वय्कःया सः समुद्रय् लिथ्वइ। 4 परमप्रभुया सलय् तःधंगु शक्ति दु। परमप्रभुया सः तसकं तःजि। 5 परमप्रभुया सलं देवदारुया सिमात नं क्वदली। लेबनानया देवदारुया सिमात नं क्वदली। 6 परमेश्वरं लेबनानया पहाडयात साया मचायात थें तिंन्हुकाबी फु। अले हेर्मोन पहाडयात द्वहंचायात थें तिंन्हुकाबी फु। 7 परमप्रभुया सलं हाबलासा त्वय्काबी फु 8 परमप्रभुया सलं मरुभूमियात क्वारा क्वारा संकाबी फु, परमप्रभुं कादेशया मरुभूमियात संकाबी फु। 9 परमप्रभुया सलं स्वंसिमायात संकाबी फु, उकिया हः हाय्काबी फु। अले वय्कःया देगलय् सकसिनं वय्कःया प्रशंसा याइ। 10 परमप्रभुं खुसिबाः वःगु लःयात कःघाये फु। परमप्रभुं जुजुं थें सदां सदांया निंतिं शासन याइ। 11 परमप्रभुं थः मनूतय्त बल बियादी परमप्रभुं थः मनूतय्त शान्तिया सुवाः बियादी। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.