भजनसंग्रहया सफू 26 - नेवाः बाइबल

छम्‍ह भिंम्‍ह मनूया प्रार्थना

दाऊदया भजन

¹ हे परमप्रभु, जि दोष मदुम्‍ह खः धकाः सकसितं क्‍यनादिसँ। छाय्‌धाःसा जिं भिंगु व खःगु जक ज्‍याखँ यानागु दु। अले छफुति हे लिमच्‍युसे परमप्रभुयागु भलसा कयागु दु।

² हे परमप्रभु, जि गज्‍याःम्‍ह खः धकाः जिगु नुगः व बिचाःयात जाँचय् यानादिसँ।

³ छिगु तःधंगु दया माया न्‍ह्याबलें जिगु नुगलय् दु। अले छिगु हे विश्‍वासय् जि न्‍ह्याःवनाच्‍वनागु दु।

⁴ जि कर्पिन्‍त हय्‌काजुइपिं मनूतलिसे मजुया, जि निपा ख्‍वाःपाः दुपिं मनूतलिसे नं मजुया।

⁵ जि मभिंगु ज्‍या यानाजुइपिनिगु पुचलय् नं मवना, अले दुष्‍ट मनूतलिसे नं मजुया।

⁶ जिं थः दोष मदुम्‍ह धकाः क्‍यनेत ल्‍हाः सिले, हे परमप्रभु! छिगु वेदीइ वयाः चाःहुलाः

⁷ जिं ततःसलं छितः तःधंकाः म्‍ये हाले अले छिगु अजू चायापुगु ज्‍यायागु खँ कने।

⁸ हे परमप्रभु, जितः छिगु महिमा झःझः धाय्‌क खनेदइगु छि च्‍वनादीगु पबित्र थाय् यः।

⁹ जितः पापीतय्‌त थें नाश यानादी मते। अले ज्‍यानमारातय्‌त थें जितः सजाँय बियादी मते।

¹⁰ इमिगु ल्‍हातिं ला मभिंगु ज्‍या जूगु दु, अले इमिसं घुस कायेगु ज्‍या नं यानाच्‍वंगु दु।

¹¹ तर जि ला अथे मखु, भिंगु व खःगु ज्‍या जक जिं यानागु दु। उकिं जितः दया यानाः बचय् यानादिसँ।

¹² जि माथंवंथाय् दनाच्‍वनागु दु, अले जिं सभाया न्‍ह्यःने परमप्रभुया प्रशंसा याये।