भजनसंग्रहया सफू 24 - नेवाः बाइबलतःधंम्ह जुजु दाऊदया भजन 1 पृथ्वी व पृथ्वीइ च्वंगु फुक्कं परमप्रभुयागु खः। संसार व संसारय् च्वंपिं फुक्कं परमप्रभुयागु खः। 2 वय्कलं संसारयात पृथ्वीया तःलय् च्वंगु लःया च्वय् दय्कादिल। अले थुकिया जग समुद्रया क्वय् स्वनादिल। 3 सुनां परमप्रभुया पर्वत गये फइ? वय्कःया पवित्र थासय् सु दने फइ? 4 थथे इमिसं जक याये फइ, सुयागु नुगः व ल्हाः शुद्ध जुइ, सुनां मूर्तियागु पुजा याइ मखु, सुनां मखुगु बचं याइ मखु। 5 इमित बचय् यानादीम्ह परमप्रभुं इमित आशिष बियादी। अले दोष मदुपिं ठहरय् यानादी। 6 थज्याःपिन्सं जक छितः लुइके फइ। अले छिगु न्ह्यःने सेवा याये फइ, हे याकूबया परमेश्वर! सेला 7 पुलांगु ध्वाखात चालाहुँ! पुलांगु लुखात चालाहुँ! अले तःधंम्ह जुजुयात दुहां वयेब्यु! 8 तःधंम्ह जुजु सु खः? झी परमप्रभु, गुम्ह तसकं बल्लाः, लडाइँलय् सुनानं बुकेमफुम्ह झी परमप्रभु! 9 पुलांगु ध्वाखात चालाहुँ! पुलांगु लुखात चालाहुँ! अले तःधंम्ह जुजुयात दुहां वयेब्यु! 10 तःधंम्ह जुजु सु खः? दक्व शक्ति दुम्ह परमप्रभु! वय्कः तःधंम्ह जुजु खः। सेला |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.