भजनसंग्रहया सफू 2 - नेवाः बाइबल

परमप्रभुं अभिषेक यानादीम्‍ह जुजु

¹ जाति जातित छाय् ग्‍वसाः ग्‍वयाजुइ? मनूतय्‌सं छाय् म्‍वाःमदुगु जाः ग्‍वयाजुइ?

² पृथ्‍वीया जुजुत व शासकत परमप्रभुया विरोधय् व वय्‌कलं अभिषेक याःम्‍ह मनूयागु विरोधय् दं वइ, अले शासकत जानाः जाः ग्‍वयाजुइ।

³ इपिं हाला जुइ, “इमिगु सिखः चफ्‍फुना छ्व अले न्‍यवः इमिगु त्‍वयाः वान्‍छ्वया ब्‍यु।”

⁴ स्‍वर्गय् सिंहासनय् च्‍वंम्‍ह न्‍हिलादी, परमप्रभुं इमित च्‍यूताः तकं तइ मखु।

⁵ वय्‌कलं इमित तमं ख्‍यानादी, तमं वय्‌कलं इमित थरथर खाकादी।

⁶ “जिं थःम्‍ह जुजुयात थःगु पवित्र पर्वत सियोनय् पलिस्‍था याये धुनागु दु।”

⁷ जुजुं परमप्रभुं धयादीगु खँ न्‍ह्यथनी, “परमप्रभुं जितः धयादिल, ‘छ जिमि काय् खः, थनिनिसें जि छिमि बाः जुल।

⁸ जिके फ्‍वँ जक, फुक्‍क जातितय्‌त जिं छंगु सर्बय यानाबी, फुक्‍क पृथ्‍वीयात छंगु यानाबी।

⁹ छं नँया दण्‍डीं इमित शासन याइ, छं इमित चाया थलयात थें तछ्याइ।’”

¹⁰ उकिं, हे जुजुपिं, बुद्धि दय्‌कि! पृथ्‍वीया शासकत, होश या!

¹¹ परमप्रभुया भय कयाः वय्‌कःयात तःधंकि। अले थरथर खानाः न्‍ह्यइपुकि।

¹² वय्‌कःया काय्‌यात हनाबना ति। मखुसा वय्‌कः तंम्‍वयादी अले वय्‌कलं छिमित नाश यानादी। वय्‌कःया शरणय् वंपिं धाःसा धन्‍य जुइ।