भजनसंग्रहया सफू 18 - नेवाः बाइबलछुत्काराया भजन दाऊदया भजन, लय् तइम्हय्सिया निंतिं – शत्रुत व शाऊलया ल्हातिं छुत्कारा जूगुलिं 1 हे परमप्रभु! जिं छितः गुलि यय्का। छि जिगु बल खः। 2 परमप्रभु जिगु निंतिं ल्वहंधी थें खः, परमप्रभु जिगु किल्ला खः, जितः उद्धार याइम्ह खः। जिमि परमेश्वर जिगु निंतिं ल्वहंधी थें खः, गुकिं जितः रक्षा याइ। वय्कः जिगु ढाल खः, जितः बचय् याइगु शक्ति खः, शरण कायेगु थाय् खः। 3 जिं परमप्रभुयात प्रार्थना याये। वय्कलं जितः जिमि शत्रुतय्पाखें बचय् यानादी। वय्कःया प्रशंसा याये। 4 कालया खिपतं जितः स्वतुमतु स्वय्कल। दुःखया खुसिबालं जितः चुइके यंकल। 5 नरकया खिपतं जितः प्यखें हीन। कालया म्हुतुं जितः पियाच्वन। 6 दुःख जूबलय् जिं परमप्रभुयात लुमंका, जिं ग्वाहालिया लागि परमेश्वरयात प्रार्थना याना। जिगु प्रार्थना वय्कःया देगलय् थ्यन वय्कलं न्हाय्पं बियाः जिगु सः न्यनादिल। 7 परमेश्वर तम्वयादिल, अले उबलय् भ्वखाय् ब्वल, पृथ्वी खात, पहाडया जग हे वारावारा सन। 8 वय्कःया न्हाय्प्वालं कुँत्याः पिहां वल। वय्कःया म्हुतुप्वालं भस्म याइगु मित्याः व च्यानाच्वंगु कोइला पिहां वल। 9 वय्कः आकाश ह्वखनाः कुहां झाल। वय्कःया पालि तःलय् हाकुगु सुपाँय् दु। 10 वय्कः करूबया म्हय् च्वनाः ब्वयाः झाल। वय्कः फय्या पपुतिइ च्वनाः ब्वयाः झाल। 11 वय्कलं थःत खिउँनं त्वपुयातःगु दु। अले हाकुगु सुपाँचं थःत भुनातःगु दु। 12 वय्कःया न्ह्यःने हाकुगु सुपाँय् तज्यानाः हावलासा त्वल, अले प्वँवा व मिवा गात। 13 अले स्वर्गं परमप्रभु हालाहयादिल, दक्वसिबय् तःधंम्हय्सिगु सः ताये दत। 14 वय्कलं थःगु वाण त्वःताः थः शत्रुतय्त उखेंथुखें यानादिल। वय्कलं मलखं कय्काः इमित बुकादिल। 15 हे परमप्रभु! छिं तमं ब्वःबियादीगुलिं अले छिगु न्हाय्प्वालं पिहां वःगु मित्यालं समुद्रया बँ व पृथ्वीया जग खनेदत। 16 वय्कलं स्वर्गं कुहां वयाः जितः ज्वनादिल। वय्कलं जितः तःजाःगु समुद्रं थकयादिल। 17 वय्कलं जितः जिमि बल्लाःपिं शत्रुतय्पाखें बचय् यानादिल, अले जितः महीपिं जि स्वयाः बल्लाःपिं फुक्कपाखें नं बचय् यानादिल। 18 जितः थाकुगु इलय् इमिसं जितः हय्क्काः वल, अय्नं परमप्रभुं जितः बचय् यानादिल। 19 वय्कलं जितः सुरक्षित थासय् यंकादिल, छाय्धाःसा वय्कः जिलिसें लय्तायादीगु दु। 20 जिं भिंगु यानाजुयागुलिं परमप्रभुं नं जितः भिंगु यानादिल। अले जि दोष मदुम्ह जूगुलिं वय्कलं जितः आशिष बियादिल, 21 छाय्धाःसा जि परमप्रभुया लँय् जुयाच्वनागु दु। अले जि जिम्ह परमेश्वरपाखें गुबलें नं फहिलामवना। 22 जिं न्ह्याबलें वय्कःया व्यवस्था मानय् यानागु दु, वय्कःया उजंयात न्ह्याबलें न्यनागु दु। 23 जि दोष मदुम्ह धकाः वय्कलं स्यू अले पापं चिलाच्वनागु दु। 24 जि दोष मदुम्ह धकाः स्यूगुलिं व जिं भिंगु यानाजुयागुलिं परमप्रभुं नं जितः भिंगु यानादिल। 25 हे परमप्रभु! भलसा दुपिंलिसे छि थः नं भलसा दुम्ह हे जुयादी। अले इमान्दारपिंलिसे इमान्दार हे जुयादी। 26 शुद्ध नुगः दुपिं मनूतय्त छिं दया माया क्यनादी, अले परमेश्वरया आज्ञा मानय् मयाइपिनि छि विरोधी जुयादी। 27 क्वमिलुपिन्त छिं बचय् यानादी, तःधंछुया जुइपिन्त धाःसा क्वह्यंकादी। 28 हे परमप्रभु परमेश्वर! छिं जिगु निंतिं मत च्याकादी छिं खिउँ मदय्काः जितः जः क्यनादी। 29 हे परमप्रभु! छिगु ग्वाहालिं जिं शत्रुतय्गु पुचलय् नं हय्काये फु अले परमेश्वरया ग्वाहालिं जिं न्ह्याथें ज्याःगु पःखाः नं गये फु। 30 परमेश्वरया लँपु सिद्धगु लँपु खः। वय्कःया वचन सत्य खः। वय्कःया शरणय् वंपिनिगु निंतिं वय्कः ढाल खः। 31 परमप्रभु बाहेक मेम्ह सु परमेश्वर दु? झी परमेश्वर बाहेक मेम्ह सु ल्वहंधी दु? 32 व हे परमेश्वर, सुनां जितः बल्लाकल, अले सुनां जिगु लँपुयात तप्यंकाबिल। 33 वय्कलं जिगु तुतियात चल्लायागु तुति थें यानादी। अले जि ततःजाःथाय् नं तुतिं चुयाच्वने फइ। 34 वय्कलं जिगु ल्हाःयात ल्वायेगु कलाः स्यनादी वय्कलं जिगु लपुयात कँय्यागु धनु साले फय्केत बल्लाकादी। 35 हे परमप्रभु! छिं जितः थःगु ढाल बियाः बचय् यानादीगु दु। छिगु जव ल्हातिं जितः तिबः बियाच्वंगु दु। छिगु ग्वाहालिं जितः तःधंकादीगु दु। 36 छिं जिगु तुतिया निंतिं गाक्क थाय् बियादीगु दु। अले जि गुबलें नं क्वःदःगु मदु। 37 जिं थः शत्रुतय्त लित्तुलिनाः ज्वने अले इपिं फुक्कसित नाश मयातले जि लिहां वये मखु। 38 जिं इमित दने हे मफयेक क्वथले इपिं जिगु तुतिइ क्वदली। 39 छिं जितः ल्वायेत बल बियादीगु दु। अले जिमि शत्रुतय्त जिगु तुतिइ तयादीगु दु। 40 छिं जिमि शत्रुतय्त जिगु न्ह्यःनें ख्यानाछ्वत। जितः महीपिन्त जिं नाश याना। 41 इपिं ग्वाहालिया निंतिं हाल, अय्नं इमित सुनानं बचय् याः मवः। इमिसं परमप्रभुयात सःतल, अय्नं वय्कलं लिसः बियामदी। 42 जिं इमित धू जुइक दाया। मनूतय्सं लँय् ध्याचःयात न्हुत्तुन्हुगु थें जिं इमित न्हुत्तुन्हुया। 43 छिं जितः विद्रोहीतय्पाखें बचय् यानादिल, जाति जातितय् जुजु यानादिल। जिं म्हमस्यूपिं मनूत नं आः जिगु अधीनय् जुल। 44 मेगु जातियापिं मनूत नं जिगु न्ह्यःने क्वछुइ अले जिं धाःथें च्वनी। 45 थःगु साहस तंकाः इपिं थःपिनिगु किल्लां ग्याग्यां पिहां वल। 46 जिगु किल्ला परमप्रभुया प्रशंसा या, वय्कः म्वानाच्वंम्ह परमप्रभु खः। जितः बचय् यानादीम्ह परमेश्वरयात तःधंकि। 47 वय्कलं जितः जिमि शत्रुतलिसे बदला कयादी। वय्कलं जाति-जातियात जिगु अधीनय् तयादी। 48 अले जितः जिमि शत्रुतय्पाखें त्वःतकादिल। जितः जिमि शत्रुत स्वयाः तःधंकादिल। जितः मनू स्याना जुइपिनिपाखें बचय् यानादिल। 49 उकिं जिं जात जातियापिनि दथुइ छिगु प्रशंसा याये। छिगु नामय् भजन हाले। 50 छिं थःम्हं ल्यःम्ह जुजुयात ततःधंगु ल्वापु त्याके बियादिल। छिं थःम्हं अभिषेक यानादीम्हय्सित न्ह्याबलें माया यानादी – दाऊदयात व वया सन्तानतय्त। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.