भजनसंग्रहया सफू 16 - नेवाः बाइबल

जीवनया लँपु

दाऊदया भजन

¹ जितः रक्षा यानादिसँ, परमेश्‍वर, जि छिगु शरणय् वयागु दु।

² जिं परमप्रभुयात धयागु दु – “छि जिमि प्रभु खः। जिके दुगु फुक्‍कं भिंगु खँ छिगुपाखें हे वःगु खः।”

³ देशय्‌ दुपिं पवित्र मनूत फुक्‍कं तःधंके बहःपिं जू, इपिंलिसे च्‍वनेदयाः जि लय्‌ताः।

⁴ मेपिं द्यःतय्‌गु ल्‍यूल्‍यू ब्‍वाँय् जुइपिं मनूतय्‌सं थःगु दुःख थःम्‍हं अप्‍वय्‌काजुइ। जिं इमिगु बां बीगु ज्‍याय् ब्‍वति काये मखु अले जिं थःगु म्‍हुतुं इमिगु नां हे काये मखु।

⁵ परमप्रभु, छि हे जिगु सर्बय खः, जितः माःगु फुक्‍कं छिं बियादीगु दु। छिं जिगु भाग्‍य सुरक्षित तयादीगु दु।

⁶ जितः बियादीगु थाय् गुलि न्‍ह्याइपुसे च्‍वं गपाय्‌सकं तःजिगु सर्बय!

⁷ जितः लँ क्‍यनादीगुलिं जिं परमप्रभुयात तःधंके, चान्‍हय् नं जिगु नुगलं जितः न्‍वानाच्‍वनी।

⁸ जिं स्‍यू, परमप्रभु जिलिसें न्‍ह्याबलें दु। जितः छुकिं नं संके फइ मखु, छाय्‌धाःसा परमप्रभु जिलिसें दु।

⁹ उकिं जिगु नुगः लय्‌ताः, अले चंचं धाः। जिं थःत प्‍यखें सुरक्षित ताय्‌का,

¹⁰ छाय्‌धाःसा छिं जिगु आत्‍मायात सीपिनिगु दथुइ त्‍वःतादी मखु। अले छितः विश्‍वास याःम्‍हय्‌सित छिं सीगालय् ध्‍वगिकेबी मखु।

¹¹ छिं जितः जीवनया लँपु क्‍यनादी छिनापं च्‍वनाः जितः लय्‌ताय्‌केबी। अले थ्‍व लसता जितः सदां सदां बियादी।