भजनसंग्रहया सफू 143 - नेवाः बाइबल

दुःखया इलय् ग्‍वाहालिया लागि प्रार्थना

दाऊदया भजन

¹ हे परमप्रभु, जिगु प्रार्थना न्‍यनादिसँ, दयाया लागि जिं यानागु इनाप न्‍यनादिसँ। छाय्‌धाःसा छि थःमनूतय्‌गु लागि धर्मीम्‍ह व विश्‍वास याये बहःम्‍ह खः। जिगु इनाप न्‍यनाः ग्‍वाहालि यानादिसँ।

² थः दासयात इन्‍साफय् हयादी मते, छिगु न्‍ह्यःने सुं नं धर्मी मदु।

³ शत्रुं जितः लित्तुली, वं जितः बँय् न्‍हुत्तुमत्तु न्‍हुइ। यक्‍व न्‍हापा हे सी धुंकूपिं थें यानाः वं जितः खिउँगु थासय् तःगु दु।

⁴ उकिं जि निराश जुयागु दु, जिगु नुगः ख्‍वःगु दु।

⁵ अले जिं वने धुंकूगु खँ लुमंके। जिं छिगु ज्‍याया बारे ध्‍यान याये। अले छिगु ल्‍हातं याःगु ज्‍याया बारे बिचाः याये।

⁶ जिं थःगु ल्‍हाः ल्‍ह्वनाः छितः प्रार्थना याये, गंगु बँ थें जि छिगु लागि प्‍याःचाःगु दु। सेला

⁷ हे परमप्रभु, याकनं लिसः बियादिसँ, जिगु नुगः हे क्‍वतुने धुंकल। थःगु ख्‍वाः जिपाखें फस्‍वय्‌कादी मते, मखुसा जि सीपिं थें जुइ।

⁸ सुथया इलं छिगु सदां दयाच्‍वनीगु दया मायाया वचन हयेमा, छाय्‌धाःसा छिके हे जिं भलसा तयागु दु। जि वनेमाःगु लँ क्‍यनादिसँ, जिं थःगु मन छिपाखे हे ल्‍ह्वने।

⁹ हे परमप्रभु, जितः जिमि शत्रुतपाखें बचय् यानादिसँ, जि सुलेत छिगु हे शरणय् वयागु दु।

¹⁰ छिगु इच्‍छा गथे यानाः पूवंकेगु खः व जितः स्‍यनादिसँ। छाय्‌धाःसा छि जिमि परमेश्‍वर खः। छिगु आत्‍मां जितः भिंगु लँपुइ यंकेमा।

¹¹ हे परमप्रभु, छिगु नांया लागि जिगु जीवनयात रक्षा यानादिसँ। छिगु धार्मिकताया कारणं जितः थ्‍व दुःखपाखें पित हयादिसँ।

¹² छिगु सदां दयाच्‍वनीगु दया मायां यानाः जिमि शत्रुतय्‌त नाश यानादिसँ। अले जितः दुःख बीपिं सकसितं नाश यानादिसँ, जि छिकपिनि दास हे खः।