भजनसंग्रहया सफू 137 - नेवाः बाइबलयरूशलेमयात गुबलें ल्वःमंके मखु 1 बेबिलोनया खुसिया सिथय् च्वनाः सियोनयात लुमंकाः जिपिं ख्वया। 2 अन लिक्क दुगु सिमाय् जिमिसं थथःगु वीणा यख्खानाबिया। 3 जिमित ज्वनायंकूपिंन्सं जिमित म्ये हाय्कल, जिमित सास्ती ब्यूपिन्सं “जिमित लसताया म्ये हा!” धकाः धाल। इमिसं “जिमित सियोनया म्ये हा!” धकाः धाल। 4 तर थन परदेशय् जिमिसं गथे परमप्रभुया म्ये हाले फइ धकाः? 5 हे यरूशलेम, जिं छन्त गुबलें ल्वःमंकागु दुसा जिगु जव ल्हाः गनावनेमा। 6 जिं छन्त लुमंकागु मदुसा, जिं यरूशलेमयात जिगु दकलय् तःधंगु लसता भाःपियागु मदुसा जिगु मे थक्वय् प्यपुनेमा। 7 हे परमप्रभु, बेबिलोनयापिन्सं यरूशलेम त्याका काःबलय् एदोमीतय्सं छु ज्या यात लुमंकादिसँ। इपिं थथे धयाः हाल, “थुकियात थुनाब्यु, जगंनिसें हे थुकियात नाश यानाब्यु।” 8 हे नाश जुइगु बेबिलोन छं जिमित छु छु यात उकिया लागि छन्त बदला काइम्ह धन्य खः। 9 छिमि चिचीधिकपिं मस्तय्त ज्वनाः ल्वहँतय् बस्वाइम्ह धन्य खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.