भजनसंग्रहया सफू 129 - नेवाः बाइबल

इस्राएलया शत्रुतय्‌त त्‍याकेगु प्रार्थना

यरूशलेमय् थाहां वनेत हाःगु म्‍ये

¹ इमिसं इस्राएल ल्‍याय्‌म्‍ह जूबलय् निसें हे सास्‍ती बियावयाच्‍वंगु दु। इस्राएलं थथे धायेमा,

² “जि ल्‍याय्‌म्‍ह जूबलय् निसें हे सास्‍ती बियावयाच्‍वंगु दु, अय्‌नं इमिसं जितः त्‍याकूगु मदु।

³ इमिसं जिगु जँन्‍धूफातय् गाःवंक घाः यानाबिल अले उकियात सा वाःगु बुँ थें यानाबिल।

⁴ तर परमप्रभु धर्मीम्‍ह खः, वय्‌कलं दुष्‍टतपाखें त्‍वःतकादिल।”

⁵ सियोनया फुक्‍क शत्रुत लज्‍या चाये मालेमा अले लिहां वनेमा।

⁶ इपिं छेँया पलिइ दुगु घाँय् थें जुइमा गुगु ताहाकः जुइ न्‍ह्यः हे गनावनी।

⁷ सुनानं उकियात मुनाः वा थू चिनाः यंके फइ मखु।

⁸ अनं जुयाः वइपिं वनिपिन्‍सं सुनानं थथे धाइ मखु, “परमप्रभुं छन्‍त सुवाः बियादीमा। परमप्रभुया नामय् जिमिसं छन्‍त सुवाः बी।”