भजनसंग्रहया सफू 110 - नेवाः बाइबलपरमप्रभुं ल्ययादीम्ह जुजु दाऊदया भजन 1 परमप्रभुं जिमि प्रभुयात धयादिल, “छं शत्रुतय्त छंगु पालि तःले मततले छ जिगु जवय् च्वँ।” 2 परमप्रभुं छिगु बल्लाःगु राज्य यरूशलेमं तःधं यानादी। छि छिकपिनि शत्रुतय् जुजु जुयादी। 3 छिं थः शत्रुतलिसें लडाइँ याःगु दिनय् छिकपिनि मनूत छिगु हे इच्छां न्ह्यःने वनी। सुथ न्हापांया सुतिलः थें छिकपिनि ल्याय्म्हपिं पवित्र पहाडय् छिथाय् वइ। 4 परमप्रभुं पाफयादीगु दु, अले उकिं थःगु मन हीकादी मखु, “मल्कीसेदेक थें छ न्ह्याबलेंयात पुजाहारी खः।” 5 छंगु जवपाखे दीम्ह परमप्रभुं तंया दिनय् जुजुपिन्त चुँचुं यानादी। 6 वय्कलं जाति जातितय्गु न्याय यानादी, अले वय्कलं सीम्हयात द्वँचिनादी, अले पृथ्वी न्यंकयापिं शासकतय्त चुँचुं यानादी। 7 जुजुं लँय् लिकसं लाःगु खुसिया लः त्वनी, अथे जुयाः वय्कलं थःगु छ्यं धस्वाकी। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.