भजनसंग्रहया सफू 101 - नेवाः बाइबल

जुजु व वया बचं

दाऊदया भजन

¹ जिं छिगु सदां दयाच्‍वनीगु दया माया व न्‍याययागु म्‍ये हाले, हे परमप्रभु, जिं म्‍ये हालाः छिगु प्रशंसा याये।

² जिगु पहःचहः द्वं मदुगु जुइ छि जिथाय् गुबलय् झायेगु? जिं थःगु छेँय् शुद्ध जीवन हने।

³ जिं मभिंयात गुबलें सह याये मखु, परमेश्‍वरपाखें फहिला वनिपिनिगु ज्‍या जितः तसकं मयः। इपिं जिलिसें प्‍यपुनी मखु।

⁴ मभिंगु मति दुपिं मनूतपाखें जि तापाक च्‍वने। जिं मभिं ज्‍या नाप छुं स्‍वापु तये मखु।

⁵ थः जःलाखःलाया बारे मखुगु खँ ल्‍हाइम्‍हय्‌सित जिं नाश यानाबी। फुइँ यानाजुइपिं व घमण्‍डी मनूतय्‌त जिं सह याये मखु।

⁶ जिं परमेश्‍वरयात विश्‍वास याइपिं मनूतय्‌त जक ल्‍ययाः थःगु दरबारय् तये। अले द्वं मदय्‌कः जुइपिन्‍सं जक जिगु सेवा याइ।

⁷ ध्‍वंलाइम्‍ह मनू जिगु छेँय् च्‍वने दइ मखु। मखुगु खँ ल्‍हाइम्‍ह मनू जिगु मिखाया न्‍ह्यःने च्‍वने दइ मखु।

⁸ जिं न्‍हियान्‍हिथं सुथ पतिकं देशय् च्‍वंपिं दुष्‍टतय्‌त न्‍हंकेगु याये। परमप्रभुया शहरं मभिं ज्‍या याइपिं सकसितं पितिनाछ्वये।