भजनसंग्रहया सफू 1 - नेवाः बाइबलन्हापांगु ब्व भज १–४१ धात्थेंयागु लसताया लँपु 1 धन्य खः व मनू, गुम्ह दुष्टतय्गु खँय् जुइ मखु, गुम्ह पापीतय्गु लँय् दनी मखु, अले गुम्ह कर्पिन्त क्वह्यंका जुइपिनिगु पुचलय् च्वनी मखु। 2 बरु व परमप्रभुया व्यवस्थाय् हे लय्तायाच्वनी। चान्हि वय्कःयागु हे व्यवस्थाय् ध्यान यानाच्वनी। 3 व खुसि सिथय् पिनातःगु सिमा थें खः। वं न्ह्याबलें थःगु इलय् फल बी। अले वयागु हः नं गुबलें सुकूगनावनी मखु। वं याःगु न्ह्यागु ज्या नं पूवनी। 4 दुष्टत अथे जुइ मखु, इपिं छ्वसँ थें खः। फसं इमित पुइकायंकी। 5 उकिं न्याय बीगु इलय् दुष्टतय्त दण्ड बी। न त पापीत हे धर्मीतय्गु सभाय् च्वने फइ। 6 छाय्धाःसा परमप्रभुं धर्मीतय्गु लँयात रक्षा यानादी। तर दुष्टतय्गु लँ नाश जुयावनी। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.