फिलिप्पी 1 - नेवाः बाइबलपावलपाखें ज्वजलपा 1 ख्रीष्ट येशूया च्यःत पावल व तिमोथीयापाखें फिलिप्पीइ च्वंपिं ख्रीष्ट येशूयात विश्वास यानाच्वंपिं, मण्डलीइ हेरचाह याइपिं व ग्वाहालि याइपिं सकसितं ज्वजलपा! 2 झी परमेश्वर बाः व प्रभु येशू ख्रीष्टपाखें छिमित दया माया व शान्ति दयाच्वनेमा। पावलयागु प्रार्थना व सुभाय् 3 छिमिगु लुमन्तिइ जिं परमेश्वरयात न्ह्याबलें सुभाय् बियाच्वनागु दु। 4 छिमिगु निंतिं जिं न्ह्याबलें लय्लय्तातां प्रार्थना यानाच्वनागु दु। 5 छाय्धाःसा भिंगु खँ न्यंकेगु ज्याय् छिमिसं जितः न्हापांनिसें ग्वाहालि यानावयाच्वंगु दु। 6 छिमिगु नुगलय् भिंगु ज्या शुरु यानादीम्हय्सिनं हे येशू ख्रीष्ट झायादीबलय् तकं फुक्क ज्या सिधय्कादी धयागु जितः विश्वास दु। 7 छिमित जिं थःगु नुगलय् तया तयागु दु। छिमिगु खँय् जिं थुकथं मतिइ तयागु पाय्छि हे जू, छाय्धाःसा छिमिसं जितः थथे कुनातःबलय् नं अले मतःबलय् नं भिंगु खँ न्यंकेत व थुकियागु पंलिनाः साक्षी बीगुलिइ नं ग्वाहालि याःगु दु। 8 ख्रीष्ट येशूं थें जिं छिमित दुनुगलंनिसें माया यानाच्वनागु दु। थ्व खँ परमेश्वरं स्यू। 9 छिमिगु माया अज्जं अप्वयावनेमा, अले छिमिसं धात्थेंगु भिंगु खँ छु खः धयागु दुनुगलंनिसें ध्वाथुइके फयेमा धकाः नं जिं प्रार्थना यानाच्वनागु दु। 10 थथे जूसा जक छिमिसं भिंगु भिंगु खँयात ल्यया काये फइ। अले ख्रीष्ट झाइबलय् छिपिं शुद्धपिं व दोष मदुपिं जुइ फइ। 11 अले परमेश्वरया महिमा व प्रशंसाया निंतिं येशू ख्रीष्टपाखें वइगु धार्मिकताया फलं छिपिं जाइ। म्वायेगु हे ख्रीष्ट खः। 12 यःपिं दाजुकिजापिं, जितः थथे जूवःगु दुःखकष्टं भिंगु खँ झन बय्बय् जुयावंगु दु धकाः सीकि। 13 लाय्कुलिइ च्वंपिं सिपाइँतय्सं जक मखु, मेपिं फुक्कसिनं नं जितः ख्रीष्टयागु निंतिं झ्यालखानाय् कुनातःगु खः धकाः सी धुंकल। 14 थुलि जक मखु, जितः थथे कुनातःगुलिं यक्व हे दाजुकिजापिन्सं प्रभुयाके भरोसा तयाः छप्ति हे मग्यासे परमेश्वरयागु वचन न्यंकाजूगु दु। 15 गुम्ह गुम्हय्सिनं ला जिं यानागु स्वये मफयाः नुगः मुइकाः व इखं नं अथे ख्रीष्टयागु खँ न्यंकाजूगु दु। गुलिसिनं धाःसा यचुगु नुगलं हे न्यंकाच्वंगु दु। 16 थथे यचुगु नुगलं भिंगु खँ न्यंका जूपिन्सं जितः भिंगु खँयागु निंतिं थथे झ्यालखानाय् कुनातःगु खः धकाः सीकाः माया वनाः न्यंकाजूगु खः। 17 मेपिन्सं धाःसा जि कुंका तःम्हय्सित अज्ज अप्वः दुःख सास्ती यायेमा धकाः मभिंगु मतिइ तयाः ख्रीष्टयागु खँ न्यंकाजूगु खः। 18 थथे न्ह्याम्हय्सिनं न्ह्यागुकथं न्यंका जूसां जि लय्ताः, छाय्धाःसा भिंगु मतिइ तयाः याःसां मभिंगु मतिइ तयाः याःसां ख्रीष्टयागु हे खँ न्यनावनी। 19 धात्थें हे जि लय्ताः, छाय्धाःसा छिमिगु प्रार्थना व ख्रीष्ट येशूं बियादीगु आत्मायागु ग्वाहालिं जितः त्वःतकी धकाः जिं स्यू। 20 अय्जूगुलिं जि छुकी नं लज्या चाये माली मखु धकाः जितः आशा व भरोसा दु। अले न्ह्याबलें थें जि आः नं ग्याये मखु, सीसां म्वाःसां जिगुपाखें ख्रीष्टयागु नां जक तःधना च्वंसां जितः गाः। 21 छाय्धाःसा जि म्वानाच्वनेगु हे ख्रीष्टया निंतिं खः, अले सीसां जिगु हे भिं जुइ। 22 म्वानाच्वन धाःसा जिं अज्जं ख्रीष्टयागु भिंगु ज्या याये फइ। उकिं सीगु बांलाः ला कि म्वायेगु बांलाः धकाः जिं धाये मफु। 23 जि ला बाम्हय् कानाच्वंगु दु। थ्व संसार त्वःताः ख्रीष्टनाप च्वंवनेगु जिगु तःधंगु इच्छा खः। 24 थ्व जिगु निंतिं तसकं भिंगु खँ खः, छिमिगु निंतिं धाःसा जि म्वानाच्वने हे माः। 25 छिपिंनाप च्वने दइतिनि धकाः जितः विश्वास दु। अले छिमित विश्वासय् बल्लाकेत व अज्ज लय्ताय्केत जि छिपिंनाप च्वने दइतिनि धकाः नं जिं स्यू। 26 जि छिमिथाय् हाकनं वयेबलय् जि वःगुलिं छिमिसं ख्रीष्ट येशूयात अज्ज अप्वः तःधंकी। 27 ख्रीष्टयागु भिंगु खँ न्यंकू थें छिमिगु चालचलन नं जुइमाः। छिमित नाप लाःसां, मलाःसां छिपिं फुक्कं छप्पँ व छगू हे मन जुयाः भिंगु खँय् विश्वास यानाच्वंगु दु धयागु जक न्यने दःसां जितः गाः। 28 दुःख बीपिं खनाः छिपिं ग्याये मते। थुकिं इपिं नाश जुयावनी, अले छिमित मुक्ति दइ धकाः बांलाक सी दु, छाय्धाःसा थ्व परमेश्वरं हे यानादीगु खः। 29 ख्रीष्टयात विश्वास यानाच्वनेत जक मखु, वय्कःया निंतिं छिमिसं दुःखकष्ट नं सीमाः धकाः वय्कलं थथे यानादीगु खः। 30 छिमिसं न्हापा खंगु व आः न्यनाच्वंगु जिगु दुःखकष्ट छिमिसं नं फयाच्वंगु दु। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.