गन्ती 7 - नेवाः बाइबलनायःतय्सं छाये हःगु देछा 1 मोशां नापलायेगु पाल धस्वाके धुंकाः उकियात व उकिया फुक्क ज्वलं, वेदी व उकिया फुक्क थलबल नापं अभिषेक यानाः पवित्र यात। 2 अले इस्राएलया नायःत, गुपिं ल्याःखाःपिं मनूतय् नायःत खः, इमिसं देछात छाल, इपिं परिवारतय् कुलनायःत नं खः। 3 इमिसं परमप्रभुया न्ह्यःने खुगः गाडा अले झिंनिम्ह द्वहं, निम्ह निम्ह कुल नायलं छगः छगः गाडा व नायःपतिकं छम्ह छम्ह द्वहं हयाः फुक्कयात नापलायेगु पालया ध्वाखाय् देछाल। 4 अले परमप्रभुं मोशायात धयादिल, 5 “छं थुपिं द्वहं व गाडा नापलायेगु पालया ज्याय् छ्यलेत इपिंपाखें का। अले लेवीतय्त थथःगु ज्याकथं इनाब्यु।” 6 अथे जुयाः मोशां गाडा व द्वहं कयाः लेवीतय्त बिल। 7 निगः गाडा व प्यम्ह द्वहं वं गेर्शोनीतय्त इमिगु ज्याकथं बिल। 8 प्यंगः गाडा व च्याम्ह द्वहं हारून पुजाहारीया काय् ईतामारं ज्या ब्व थें याइपिं मरारीतय्त इमिगु ज्याकथं बिल। 9 मोशां कहातीतय्त धाःसा द्वहं व गाडा छुं नं मब्यू, छाय्धाःसा तसकं पवित्र ज्वलं थःगु ब्वहलय् क्वबीगु जिम्मा इमिगु खः। 10 वेदीयागु अभिषेक जूबलय् उकिया अर्पणया लागि नायःतय्सं थथःगु देछा हयाः वेदीया न्ह्यःने छाल। 11 परमप्रभुं मोशायात धयादिल, “वेदीयात देछायेत न्हिं छम्ह छम्ह कुलनायलं थःगु देछा हयेमाः।” 12 न्हापांगु दिंखुन्हु देछा छाःम्ह यहूदा कुलयाम्ह अम्मीनादाबया काय् नहशोन खः। 13 वयागु देछा थथे दु – पवित्र पालया शेकेलकथं सच्छि व स्विगू शेकेल वहःयागु छपा भु, न्हयेगू शेकेल वहःयागु छगः छ्वाकेगु बाता– थुपिं निगुलिं अन्नबलिया निंतिं चिकं ल्वाकछ्यानातःगु भिंगु छुचुनं जाःगु खः, 14 अले गुँगू जाय्क दुगु झिगू शेकेल लुँयागु छपा पाचिंगु थल, 15 होमबलिया निंतिं छम्ह द्वहंचा, छम्ह भ्याःचा व छम्ह दच्छि दुम्ह चिधिकःम्ह भ्याःचा, 16 पापबलिया निंतिं छम्ह दुगु, 17 व मेलबलिया निंतिं निम्ह द्वहं, न्याम्ह भ्याःचा, न्याम्ह दुगु व न्याम्ह दच्छि दुपिं चिधिकःपिं भ्याःचा। अम्मीनादाबया काय् नहशोनया देछा थ्व हे खः। 18 निन्हु दुखुन्हु इस्साखारया कुलयाम्ह नायः सूआरया काय् नतनेलं थःगु देछा हल। 19 वयागु देछा थथे दु – पवित्र पालया शेकेलकथं सच्छि व स्विगू शेकेल वहःयागु छपा भु, न्हयेगू शेकेल वहःयागु छगः छ्वाकेगु बाता– थुपिं निगुलिं अन्नबलिया निंतिं चिकं ल्वाकछ्यानातःगु भिंगु छुचुनं जाःगु खः, 20 अले गुँगू जाय्क दुगु झिगू शेकेल लुँयागु छपा पाचिंगु थल, 21 होमबलिया निंतिं छम्ह द्वहंचा, छम्ह भ्याःचा व छम्ह दच्छि दुम्ह चिधिकःम्ह भ्याःचा, 22 पापबलिया निंतिं छम्ह दुगु 23 व मेलबलिया निंतिं निम्ह द्वहं, न्याम्ह भ्याःचा, न्याम्ह दुगु अले न्याम्ह दच्छि दुपिं चिधिकःपिं भ्याःचा। सूआरया काय् नतनेलया देछा थ्व हे खः। 24 स्वंन्हु दुखुन्हु जबूलूनया कुलयाम्ह नायः हेलोनया काय् एलीआबं थःगु देछा हल। 25 वयागु देछा थथे दु – पवित्र पालया शेकेलकथं सच्छि व स्विगू शेकेल वहःयागु छपा भु, न्हयेगू शेकेल वहःयागु छगः छ्वाकेगु बाता – थुपिं निगुलिं थल अन्नबलिया निंतिं चिकं ल्वाकछ्यानातःगु भिंगु छुचुनं जाःगु खः, 26 अले गुँगू जाय्क दुगु झिगू शेकेल लुँयागु छपा पाचिंगु थल, 27 होमबलिया निंतिं छम्ह द्वहंचा, छम्ह भ्याःचा व छम्ह दच्छि दुम्ह चिधिकःम्ह भ्याःचा, 28 पापबलिया निंतिं छम्ह दुगु 29 व मेलबलिया निंतिं निम्ह द्वहं, न्याम्ह भ्याःचा, न्याम्ह दुगु व न्याम्ह दच्छि दुपिं चिधिकःपिं भ्याःचा। हेलोनया काय् एलीआबया देछा थ्व हे खः। 30 प्यंन्हु दुखुन्हु रूबेनया कुलयाम्ह नायः शदेऊरया काय् एलीसूरं थःगु देछा हल। 31 वयागु देछा थथे दु – पवित्र पालया शेकेलकथं सच्छि व स्विगू शेकेल वहःयागु छपा भु, न्हयेगू शेकेल वहःयागु छगः छ्वाकेगु बाता– थुपिं निगुलिं थल अन्नबलिया निंतिं चिकं ल्वाकछ्यानातःगु भिंगु छुचुनं जाःगु खः, 32 अले गुँगू जाय्क दुगु झिगू शेकेल लुँयागु छपा पाचिंगु थल, 33 होमबलिया निंतिं छम्ह द्वहंचा, छम्ह भ्याःचा व छम्ह दच्छि दुम्ह चिधिकःम्ह भ्याःचा, 34 पापबलिया निंतिं छम्ह दुगु, 35 व मेलबलिया निंतिं निम्ह द्वहं, न्याम्ह भ्याःचा, न्याम्ह दुगु व न्याम्ह दच्छि दुपिं चिधिकःपिं भ्याःचा। शदेऊरया काय् एलीसूरया देछा थ्व हे खः। 36 न्यान्हु दुखुन्हु शिमियोनया कुलयाम्ह नायः सूरीशद्दैया काय् शलूमीएलं थःगु देछा हल। 37 वयागु देछा थथे दु – पवित्र पालया शेकेलकथं सच्छि व स्विगू शेकेल वहःयागु छपा भु, न्हयेगू शेकेल वहःयागु छगः छ्वाकेगु बाता – थुपिं निगुलिं थल अन्नबलिया निंतिं चिकं ल्वाकछ्यानातःगु भिंगु छुचुनं जाःगु खः, 38 गुँगू जाय्क दुगु झिगू शेकेल लुँयागु छपा पाचिंगु थल, 39 होमबलिया निंतिं छम्ह द्वहंचा, छम्ह भ्याःचा व छम्ह दच्छि दुम्ह चिधिकःम्ह भ्याःचा, 40 पापबलिया निंतिं छम्ह दुगु, 41 व मेलबलिया निंतिं निम्ह द्वहं, न्याम्ह भ्याःचा, न्याम्ह दुगु व न्याम्ह दच्छि दुपिं चिधिकःपिं भ्याःचा। सूरीशद्दैया काय् शलूमीएलया देछा थ्व हे खः। 42 खुन्हु दुखुन्हु गादया कुलयाम्ह नायः दूएलया काय् एल्यासापं थःगु देछा हल। 43 वयागु देछा थथे दु – पवित्र पालया शेकेलकथं सच्छि व स्विगू शेकेल वहःयागु छपा भु, न्हयेगू शेकेल वहःयागु छगः छ्वाकेगु बाता – थुपिं निगुलिं अन्नबलिया निंतिं चिकं ल्वाकछ्यानातःगु भिंगु छुचुनं जाःगु खः, 44 गुँगू जाय्क दुगु झिगू शेकेल लुँयागु छपा पाचिंगु थल, 45 होमबलिया निंतिं छम्ह द्वहंचा, छम्ह भ्याःचा व छम्ह दच्छि दुम्ह चिधिकःम्ह भ्याःचा, 46 पापबलिया निंतिं छम्ह दुगु, 47 व मेलबलिया निंतिं निम्ह द्वहं, न्याम्ह भ्याःचा, न्याम्ह दुगु व न्याम्ह दच्छि दुपिं चिधिकःपिं भ्याःचा। दूएलया काय् एल्यासापया देछा थ्व हे खः। 48 न्हय्न्हु दुखुन्हु एफ्राइमया कुलयाम्ह नायः अम्मीहूदया काय् एलीशामां थःगु देछा हल। 49 वयागु देछा थथे दु – पवित्र पालया शेकेलकथं सच्छि व स्विगू शेकेल वहःयागु छपा भु, न्हयेगू शेकेल वहःयागु छगः छ्वाकेगु बाता– थुपिं निगुलिं अन्नबलिया निंतिं चिकं ल्वाकछ्यानातःगु भिंगु छुचुं जाःगु खः, 50 गुँगू जाय्क दुगु झिगू शेकेल लुँयागु छपा पाचिंगु थल, 51 होमबलिया निंतिं छम्ह द्वहंचा, छम्ह भ्याःचा व छम्ह दच्छि दुम्ह चिधिकःम्ह भ्याःचा, 52 पापबलिया निंतिं छम्ह दुगु, 53 व मेलबलिया निंतिं निम्ह द्वहं, न्याम्ह भ्याःचा, न्याम्ह दुगु व न्याम्ह दच्छि दुपिं चिधिकःपिं भ्याःचा। अम्मीहूदया काय् एलीशामाया देछा थ्व हे खः। 54 च्यान्हु दुखुन्हु मनश्शेया कुलयाम्ह नायः पदासूरया काय् गमलिएलं थःगु देछा हल। 55 वयागु देछा थथे दु – पवित्र पालया शेकेलकथं सच्छि व स्विगू शेकेल वहःयागु छपा भु, न्हयेगू (७०) शेकेल वहःयागु छगः छ्वाकेगु बाता– थुपिं निगुलिं अन्नबलिया निंतिं चिकं ल्वाकछ्यानातःगु भिंगु छुचुं जाःगु खः, 56 गुँगू जाय्क दुगु झिगू शेकेल लुँयागु छपा पाचिंगु थल। 57 होमबलिया निंतिं छम्ह द्वहंचा, छम्ह भ्याःचा व छम्ह दच्छि दुम्ह चिधिकःम्ह भ्याःचा, 58 पापबलिया निंतिं छम्ह दुगु, 59 व मेलबलिया निंतिं निम्ह द्वहं, न्याम्ह भ्याःचा, न्याम्ह दुगु व न्याम्ह दच्छि दुपिं चिधिकःपिं भ्याःचा। पदासूरया काय् गमलिएलया देछा थ्व हे खः। 60 गुन्हु दुखुन्हु बेन्यामीनया कुलयाम्ह नायः गिदेओनीया काय् अबीदानं थःगु देछा हल। 61 वयागु देछा थथे दु – पवित्र पालया शेकेलकथं सच्छि व स्विगू शेकेल वहःयागु छपा भु, न्हयेगू शेकेल वहःयागु छगः छ्वाकेगु बाता – थुपिं निगुलिं अन्नबलिया निंतिं चिकं ल्वाकछ्यानातःगु भिंगु छुचुं जाःगु खः, 62 गुँगू जाय्क दुगु झिगू शेकेल लुँयागु छपा पाचिंगु थल, 63 होमबलिया निंतिं छम्ह द्वहंचा, छम्ह भ्याःचा व छम्ह दच्छि दुम्ह चिधिकःम्ह भ्याःचा, 64 पापबलिया निंतिं छम्ह दुगु, 65 व मेलबलिया निंतिं निम्ह द्वहं, न्याम्ह भ्याःचा, न्याम्ह दुगु व न्याम्ह दच्छि दुपिं चिधिकःपिं भ्याःचा। गिदेओनीया काय् अबीदानया देछा थ्व हे खः। 66 झिन्हु दुखुन्हु दानया कुलयाम्ह नायः अम्मीशद्दैया काय् अहीएजेरं थःगु देछा हल। 67 वयागु देछा थथे दु – पवित्र पालया शेकेलकथं सच्छि व स्विगू शेकेल वहःयागु छपा भु, न्हयेगू शेकेल वहःयागु छगः छ्वाकेगु बाता – थुपिं निगुलिं अन्नबलिया निंतिं चिकं ल्वाकछ्यानातःगु भिंगु छुचुं जाःगु खः, 68 गुँगू जाय्क दुगु झिगू शेकेल लुँयागु छपा पाचिंगु थल, 69 होमबलिया निंतिं छम्ह द्वहंचा, छम्ह भ्याःचा व छम्ह दच्छि दुम्ह चिधिकःम्ह भ्याःचा, 70 पापबलिया निंतिं छम्ह दुगु, 71 मेलबलिया निंतिं निम्ह द्वहं, न्याम्ह भ्याःचा, न्याम्ह दुगु व न्याम्ह दच्छि दुपिं चिधिकःपिं भ्याःचा। अम्मीशद्दैया काय् अहीएजेरया देछा थ्व हे खः। 72 झिंछन्हु दुखुन्हु आशेरया कुलयाम्ह नायः ओक्रानया काय् पगीएलं थःगु देछा हल। 73 वयागु देछा थथे दु – पवित्र पालया शेकेलकथं सच्छि व स्विगू शेकेल वहःयागु छपा भु, न्हयेगू शेकेल वहःयागु छगः छ्वाकेगु बाता– निगुलिं अन्नबलिया निंतिं चिकं ल्वाकछ्यानातःगु भिंगु छुचुनं जाःगु खः, 74 गुँगू जाय्क दुगु झिगू शेकेल लुँयागु छपा पाचिंगु थल, 75 होमबलिया निंतिं छम्ह द्वहंचा, छम्ह भ्याःचा व छम्ह दच्छि दुम्ह चिधिकःम्ह भ्याःचा, 76 पापबलिया निंतिं छम्ह दुगु, 77 अले मेलबलिया निंतिं निम्ह द्वहं, न्याम्ह भ्याःचा, न्याम्ह दुगु व न्याम्ह दच्छि दुपिं चिधिकःपिं भ्याःचा। ओक्रानया काय् पगीएलया देछा थ्व हे खः। 78 झिंनिन्हु दुखुन्हु नप्तालीया कुलयाम्ह नायः एनानया काय् अहीरां थःगु देछा हल। 79 वयागु देछा थथे दु – पवित्र पालया शेकेलकथं सच्छि व स्विगू शेकेल वहःयागु छपा भु, न्हयेगू शेकेल वहःयागु छगः छ्वाकेगु बाता – निगुलिं अन्नबलिया निंतिं चिकं ल्वाकछ्यानातःगु भिंगु छुचुनं जाःगु खः, 80 गुँगू जाय्क दुगु झिगू शेकेल लुँयागु छपा पाचिंगु थल, 81 होमबलिया निंतिं छम्ह द्वहंचा, छम्ह भ्याःचा, व छम्ह दच्छि दुम्ह चिधिकःम्ह भ्याःचा, 82 पापबलिया निंतिं छम्ह दुगु 83 व मेलबलिया निंतिं निम्ह द्वहं, न्याम्ह भ्याःचा, न्याम्ह दुगु व न्याम्ह दच्छि दुपिं चिधिकःपिं भ्याःचा। एनानया काय् अहीराया देछा थ्व हे खः। 84 वेदीयात अभिषेक याइगु दिं इस्राएलया कुलयापिं नायःतय्सं छाःगु देछा थुपिं हे खः – वहःयागु झिंनिपा भु, वहःयागु झिंनिगः छ्वाकेगु बाता, व झिंनिपा लुँयागु पाचिंगु थल। 85 पवित्र पालया शेकेलकथं वहःयागु भु छपा पतिकं सच्छि व स्विगू शेकेल जुयाच्वन, वहःयागु छ्वाकेगु बाता छगः पतिकं न्हयेगू शेकेल जुयाच्वन। थुपिं फुक्क वहःयागु भु व बाता पवित्र पालया शेकेलकथं २,४०० शेकेल जुयाच्वन। 86 अले गुँगू जाय्क दुगु लुँयागु झिंनिपा पाचिंगु थल पवित्र पालया शेकेलकथं छपा पतिकं झिगू शेकेल जुयाच्वन। थुपिं फुक्क लुँयागु गुँगू थल १२० शेकेल जुयाच्वन। 87 होमबलिया निंतिं झिंनिम्ह द्वहंचा, झिंनिम्ह भ्याःचा, दच्छि दुपिं झिंनिम्ह चिधिकःपिं भ्याःचानापं अन्नबलि नं दुगु जुयाच्वन। अले पापबलिया निंतिं झिंनिम्ह दुगुचा छाल। 88 अले मेलबलिया निंतिं मुक्कं निइप्यम्ह द्वहं, खुइम्ह भ्याःचा, खुइम्ह दुगु व खुइम्ह दच्छि दुपिं चिधिकःपिं भ्याःचा छाःगु जुयाच्वन। वेदीया अभिषेक याये धुंकाः उकियात छायेत हःगु देछा थ्व हे खः। 89 मोशा परमप्रभुलिसें खँ ल्हायेत महा-पवित्र थासय् वंबलय् बाचाया सनू द्यःने दुगु प्रायश्चितया कृपा-आसन च्वय्या निम्ह करूबतय् दथुं वं थःनापं नवानाच्वंगु सः ताल। अले परमप्रभुं व नापं खँ ल्हानादिल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.