गन्ती 32 - नेवाः बाइबलयर्दन पुर्बया लागाय् कुलत व्य ३:१२-२२ 1 रूबेन व गाद कुलयापिन्के यक्व हे पशुत दु। इमिसं याजेर व गिलाद देश खंबलय् व थाय् पशु लहित ज्यूगु खन। 2 इमिसं मोशा, पुजाहारी एलाजार व खलःया नायःतय्थाय् वनाः धाल, 3 “अतारोत, दीबोन, याजेर, निम्रा, हेश्बोन, एलाले, सबाम, नेबो व बओन, 4 थ्व फुक्क लागायात परमप्रभुं इस्राएलया खलःया निंतिं त्याकादीगु खः। थ्व पशुतय्गु निंतिं ल्वःगु थाय् खः। छिकपिनि दासतय्के यक्व पशुत दु। 5 छिं जिपिं खनाः लय्ताः धइगु खःसा थ्व जमिन छिकपिनि दासतय्त जिमिगु सम्पत्ति जुइत बियादिसँ। जिमित यर्दन खुसिया उखे यंकादी मते।” 6 मोशां गादी व रूबेनीतय्त धाल, “छिमि इस्राएली दाजुकिजापिं उखे लडाइँलय् वनेगु, अले छिपिं जक थन याउँक च्वनेगु धयागु ला? 7 छिमिसं मेपिं इस्राएलीतय्त परमप्रभुं बियादीगु उखे पाखेयागु देशय् वनेत लिचिकेत स्वयागु ला? 8 जिं छिमि बौपिन्त कादेश-बर्नेनं व थाय् स्वके छ्वयाबलय् छिमि बौपिन्सं नं थथे हे याःगु खः। 9 इमिसं एश्कोल धाःगु गालय् वनाः व थाय्यात स्वयाः परमप्रभुं बियादीगु व थासय् वनेत इस्राएलीतय्त लिचिकाब्यूगु खः। 10 अले परमप्रभुं तंचायाः उखुन्हु हे थथे धया पाफयाः बचं बियादीगु खः, 11 ‘इपिं दुनुगलंनिसें जिगु ल्यूल्यू मजूगुलिं अब्राहाम, इसहाक व याकूबयात बी धकाः बचं बियागु देशय् मिश्रं पित हयापिं निइदँ व निइदं च्वय्यापिं सुं नं दुहां वने खनी मखु। 12 कनज्जी यपुन्नेया काय् कालेब व नूनया काय् यहोशू जक दुहां वने खनी। छाय्धाःसा इपिं दुनुगलंनिसें परमप्रभुया ल्यूल्यू जुल।’ 13 परमप्रभुं तंचायादिल, अले परमप्रभुया मिखाय् मभिंगु ज्या याःगु पुस्ताया फुक्क मनूत सिनामवंतले पिइदँ तक वय्कलं इमित मरुभूमिइ उखेंथुखें जुइकातल। 14 “हे पापीतय् सन्तान! आः हाकनं छिपिं परमप्रभुयात इस्राएलीतलिसे अझ यक्व तं चाय्केत छिमि बौपिनि थासय् दंवयाच्वंगु दु। 15 छिपिं हाकनं वय्कःया ल्यूल्यू जुइगुपाखें फःहिला वन धाःसा वय्कलं थुपिं फुक्क मनूतय्त हाकनं मरुभूमिइ त्वःतादी। अले इमिगु नाशया कारण छिपिं जुइ।” 16 अले इमिसं वयाथाय् वया धाल, “जिमित थन जिमि पशुतय्गु लागि गः व मिसात व मस्तय्गु लागि पःखाः दुगु शहरत दय्के मास्ति वः। 17 अले जिपिं इस्राएलीतय्त इमिगु थासय् मथ्यंकुतले ल्वाभः ज्वनाः इमिगु न्ह्यः न्ह्यः लडाइँलय् वने। उबलय् जिमि मिस्त व मचाखाचा थ्व देशयापिं मनूतपाखें बचय् जुइत जिमिसं दय्कागु शहरय् पःखाः दुने च्वनाच्वनी। 18 फुक्क इस्राएलीतय्सं इमित बी धयातःगु सर्बय मकातले जिपिं छेँय् लिहां वये मखु। 19 जिमिसं यर्दनया उखे छुं नं सर्बय नं काये मखु। बरु जिपिं थन हे पुर्बपाखे थःगु सर्बयकथं वःगु थासय् हे च्वने।” 20 अले मोशां इमित धाल, “छिमिसं थःपिन्सं धाःथें ल्वाभः ज्वनाः परमप्रभुया न्ह्यःने लडाइँलय् वन, 21 अले परमप्रभुं थः शत्रुतय्त बुकाः लिना मछ्वतले परमप्रभुया न्ह्यःने ल्वाभः ज्वनाः यर्दन छिनावन धाःसा 22 परमप्रभुया न्ह्यःने व देशयात त्याकेधुंकाः छिपिं लिहां वये फइ। अले परमप्रभु व इस्राएलीतय्गु लागि छिमिसं यायेमाःगु ज्या पूवनी। अले यर्दनया पुर्बपाखे च्वंगु थाय् परमप्रभुयापाखें छिमिगु सम्पत्ति जुइ। 23 “छिमिसं थःपिन्सं धाःथें मयात धाःसा छिमिसं परमप्रभुया न्ह्यःने पाप याःगु जुइ। अले छिमिगु पाप छिमित लाइ। 24 छिमिसं थः मिस्त व मचाखाचाया लागि शहर व पशुतय्गु लागि गः दय्के फु, तर थःपिनिगु बचं पूवंकेमाः।” 25 अले गादी व रूबेनीतय्सं मोशायात धाल, “प्रभु, छसपोलं उजं बियादी थें हे छःपिनि दासतय्सं याये। 26 जिमि मचाखाचा, मिस्त, सा द्वहं, फै, दुगु-च्वलय् धाःसा थन गिलादया शहरय् हे च्वनी। 27 अय्नं छिसं धयादी थें जिपिं लडाइँ याइपिं फुक्कं मनूत परमप्रभुया न्ह्यःने लडाइँ यायेत ल्वाभः ज्वनाः न्ह्यः न्ह्यः यर्दनया उखे वने।” 28 अले मोशां इमिगु खँय् एलाजार पुजाहारी, नूनया काय् यहोशू व इस्राएलीतय् कुलया नायःतय्त उजं बिल। 29 वं इमित धाल, “गादी व रूबेनीत छिपिंनापं परमप्रभुया न्ह्यःने लडाइँलय् ल्वाभः ज्वनाः यर्दनया उखे वंसा अले देश छिमिगु ल्हातय् दये धुंकाः छिमिसं गिलाद देश इमित सम्पत्तिकथं ब्यु। 30 इपिं ल्वाभः ज्वनाः छिपिंनापं यर्दन छिनाः मवन धाःसा इमित छिपिंनापं कनान देशय् हे जमिन दइ।” 31 अले गादी व रूबेनीतय्सं थथे धाल, “परमप्रभुं जिमित छु धयादीगु दु जिमिसं व हे याये। 32 जिपिं ल्वाभः ज्वनाः परमप्रभुया न्ह्यःने खुसिया उखेपाखे कनान देशय् वने, अय्नं जिमिगु थःगु सर्बय यर्दनया थुखे हे जुइमा।” 33 अले मोशां गादीत, रूबेनीतय्त व योसेफया काय् मनश्शेया बच्छि कुलयात एमोरीतय् जुजु सीहोनयागु देश व बाशानया जुजु ओगयागु देश इमिगु सिमाना दुने लाःगु शहर नापं फुक्क देश बिल। 34 अले गादीतय्सं दीबोन, अतारोत, अरोएर, 35 अत्रोत-शोपान, याजेर, योगबहा, 36 बेथ-निम्रा व बेथ-हारान नांयागु शहरतय्त पःखालं घेरय् यानाः दय्कल। अले फै, दुगु-च्वलय्तय्गु निंतिं गःत दय्कल। 37-38 रूबेनीतय्सं हेश्बोन, एलाले व किर्यातैम, नेबो, बाल-मोन व सिब्मा हाकनं दय्कल। इमिसं थःपिन्सं दय्कूगु शहरतय्गु नां तल। 39 मनश्शेया काय् माकीरया सन्तानतय्सं गिलादय् वनाः उकियात त्याकाः अन च्वंपिं एमोरीतय्त पितिनाछ्वत। 40 अथे जुयाः मोशां मनश्शेया काय् माकीरया सन्तानतय्त गिलाद बिल अले इपिं अन हे च्वन। 41 मनश्शेया सन्तान याईर वनाः गिलादया यक्व गां त्याका काल, अले उकिया नां हब्बात-याईर तल। 42 नोबहं केनात व उकिया गां त्याकाः उकिया नां थःगु हे नामय् नोबह धकाः तयाबिल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.