नहेम्याह 9 - नेवाः बाइबलइस्राएलीतय्सं पाप मानय् याःगु 1 व हे लाया निइप्यन्हु खुन्हु इस्राएलीत अपसं च्वनेत मुन। उबलय् इमिसं भांग्रा फिनाः थथःगु छेनय् धू तल। 2 इमिसं थःपिन्त मेपिं विदेशीतपाखें अलग तल। थथःगु थासय् च्वनाः इमिसं थथःगु पाप व थः पुर्खातय्गु मभिंगु ज्या मानय् यात। 3 स्वघौ तक परमप्रभु थः परमेश्वरया व्यवस्था सफू इमित ब्वनाः न्यंकल। अनंलि मेगु स्वघौ तक इमिसं थःगु पाप मानय् यायां परमप्रभु थः परमेश्वरया आराधना यानाच्वन। 4 लेवीत येशूअ, बानी, कादमीएल, शबन्याह, बुन्नी, शरेबियाह, बानी व कनानीं लेवीतय्गु निंतिं दय्कूगु दबुया त्वाथलय् दनाः तसलं थः परमप्रभु परमेश्वरयात प्रार्थना यात। 5 अले येशूअ, कादमीएल, बानी, हशबन्याह, शरेबियाह, होदियाह, शबन्याह व पतहियाह नांयापिं लेवीतय्सं धाल, “दनाः अनादिंनिसें अनन्त तक दीम्ह परमप्रभु झी परमेश्वरयात तःधंकि।” अले इमिसं थथे प्रार्थना यात, “छिगु महिमां जाःगु नां धन्य जुइमा, व नां फुक्क सुवाः व प्रशंसा स्वयाः च्वय् दु। 6 छि जक परमप्रभु खः। छिं हे आकाश, दकलय् तःजाःगु आकाश व उकियागु दक्व नगुत, पृथ्वी व उकी दुगु फुक्क, समुद्र व उकी दुगु फुक्क दय्कादिल। छिं हे उपिं फुक्कयात जीवन बियादी। अले स्वर्गया सेनां छितः आराधना याइ। 7 “छि अब्रामयात ल्ययाः कल्दीतय्गु ऊरं पित हयाः वयात अब्राहाम नां तयादीम्ह परमप्रभु परमेश्वर खः। 8 छिं वयात थः प्रति विश्वास बहःम्ह जूगु सीकादिल। अले छिं वया सन्तानतय्त कनानी, हित्ती, एमोरी, परिज्जी, यबूसी व गिर्गाशीतय्गु देश बी धकाः वलिसे बाचा चिनादिल। छिं थःगु बचं पूवंकादिल छाय्धाःसा छि विश्वास याये बहःम्ह खः। 9 “छिं मिश्र देशय् जिमि पुर्खातय्त जूगु दुःख स्वयादिल, लाल समुद्र सिथय् ग्वाहालिया निंतिं हाःगु इमिगु सः छिं न्यनादिल। 10 मिश्रीतय्सं तःधंछु जुयाः जिमि पुर्खातय्त क्वत्यला तःगुलिं छिं फारो, वया भारदार व वया देशयापिं सकल मनूतय्त सजाँय बीत अजू चाइपुगु चिं व ज्या यानाः थःगु निंतिं थौं तक दनिगु छगू तःधंगु नां तयादिल। 11 इपिं गंगु बँ जुयाः वने फयेमा धकाः छिं इमिगु न्ह्यःने समुद्रयात ब्वथलादिल। छि मनूत गंगु बँ जुयाः वन, अय्नं लखय् ल्वहं वांछ्वःगु थें इमित ल्यू वःपिन्त छिं वांछ्वयादिल। 12 छिं इमित न्हिनय् सुपाँय्या थां व चान्हय् मियागु थामं लँ क्यनाः यंकादिल। 13 “छि सीनै पर्वतय् क्वहां झायाः आकाशं इपिंलिसें खँ ल्हानादिल। अले इमित पाय्छिगु नियम, खःगु कानून व भिंगु विधि व आज्ञा बियादिल। 14 इमित थःगु पवित्र शबाथ सीके बियादिल। अले इमित थः दास मोशापाखें आज्ञा, विधि व नियम बियादिल। 15 “इपिं नय्पित्याःबलय् छिं स्वर्गं नयेत मरि बियादिल, प्याचाःबलय् त्वनेत ल्वहँतं लः पिकयादिल। छिं इमित बी धकाः बाचा यानादीगु देशय् अधिकार यायेगु आज्ञा बियादिल। 16 “अय्नं जिमि पुर्खातय्सं तःधंछु व जिराहा जुयाः छिगु खँ मन्यं। 17 इमिसं आज्ञा पालन यायेत म्हाः धाल अले छिं यानादीगु फुक्क ज्या व अजू चाइपुगु ज्या लुममंकू। इमिसं जिराहा जुयाः विरोधी जुल हाकनं दासत्वय् लिहां वनेत छम्ह नायः ल्यल। अय्नं छि क्षमा यानादीम्ह, दयादुम्ह, नुगः क्यातुम्ह, तंचायेत लिबाकादीम्ह व दया मायां जाःम्ह परमेश्वर खः। छिं इमित त्वःतामदी। 18 इमिसं छम्ह द्वहंया मूर्ति दय्कल अले जिमित मिश्रं लिकया हःम्ह द्यः थ्व हे खः धकाः उकियात पुजा यात। हे परमप्रभु, इमिसं छितः गज्याःगु अपमान यात। 19 “अय्नं छिं इमित तसकं नुगः क्यातुम्ह क्यनाः मरुभूमिइ वान्छ्वया मदी। इमित लँपु क्यनीगु न्हिनय्सियागु सुपाँय्या थां व चान्हय्सियागु मिया जः छिं चीका मदी। 20 इमित छिं स्यनेकने यायेत थःगु भिंगु आत्मा बियादिल, छिं इमिगु म्हुतुं छिगु मन्न चीका मदी व इपिं प्याचाःबलय् छिं इमित लः बियादिल। 21 छिं मरुभूमिइ पिइदँ तक इमित लहिनादिल, इमित छुं खँयागु मगाःमचाः मजुल, इमिगु वसः मगू, इमिगु तुति मना मवः। 22 “छिं राज्यत व जातित बियाः तातापाःगु थाय् नं इनाबियादिल। सीहोन जुजुया देश हेश्बोन व ओग जुजुयागु देश बाशान इमिसं त्याका काल। 23 छिं इमित आकाशया नगु थें अप्वः सन्तान बियादिल, छिं इमि पुर्खातय्त बी धकाः बचं बियादीगु देश इमिसं त्याकल अले अन च्वन। 24 “इमिसं कनान देश त्याकल, अनयापिं मनूत कनानीतय्त छिं इमिगु हे अधीनय् बियादिल। छिं कनानीतय्त इमि जुजुपिं व देशय् च्वंपिं मनूतलिसे थः यःथें व्यवहार यायेत इमिगु ल्हातय् बियादिल। 25 पखाः ग्वयातःगु शहरत व लखं लाःगु देश इमिसं त्याकाकाल। भिंगु भिंगु सामान दुगु छेँ, म्हुयातःगु तुं, दाखया क्यब, जैतूनया सिमा व मेमेगु फलया सिमा यक्व हे इमिसं थःगु ल्हातय् लाकल। प्वाः जाय्क नयाः इपिं ल्ह्वन, इपिं छिगु फुक्क भिंगु ज्याया कारणं लय्तायाच्वन। 26 “अय्नं छिकपिनि प्रजातय्सं विद्रोह यात। अले इमिसं खँ मन्यन। छिगु व्यवस्थापाखें ख्वाः फस्वय्कल। छिपाखे लिहां वयेत ख्याच्वः बीपिं अगमवक्तातय्त इमिसं स्यानाबिल। इमिसं छितः गज्याःगु अपमान यात। 27 उकिं छिं इमित इमि शत्रुतय्गु ल्हातय् लाकादिल। इमि शत्रुतय्सं इमित क्वःत्यल। थःगु दुःखया इलय् इमिसं छिके ग्वाहालि फ्वन। स्वर्गं छिं लिसः बियादिल। इमित शत्रुपाखें बचय् यायेत छिं थःगु तसकं नुगः क्यातुम्ह नायःत छ्वयाहयादिल। 28 “अय्नं शान्ति जुइ धुंकाः इमिसं हानं पापयात, उकिं छिं इमित शत्रुतय्गु ल्हातय् त्वःतादिल। इमिसं इमित थःगु अधीनय् तल। अय्नं हाकनं इमिसं छिके ग्वाहालि फ्वन। स्वर्गं छिं न्यनादिल, अले छि तसकं नुगः क्यातुम्ह जूगुलिं इमित तःक्वः मछि बचय् यानादिल। 29 “छिं इमित थःगु व्यवस्थापाखे लिहां वयेत ख्याच्वः बियादिल। अय्नं तःधंछु जुयाः इमिसं छिगु नियमया विरोधय् पापयात। थ्व मानय् याइपिन्त जीवन दु। अय्नं इपिं जिराहा जुयाः छिपाखें फस्वल, अत्तेरी जुयाः इमिसं छिगु खँ मन्यन। 30 दँय्दसं छिं इमित थाकु मचासें ख्याच्वः बियादिल, छिं थः अगमवक्तातय्त न्ववाइगु आत्मा बियादिल, अय्नं छिकपिनि प्रजातय्सं छिगु खँ मन्यन। उकिं इमित मेगु जातियापिं मनूतय्गु ल्हातय् लाकादिल। 31 अय्नं छि तसकं नुगः क्यातुम्ह जूगुलिं इमित त्वःतामदी, नाश यानामदी। छि दयादुम्ह व नुगः क्यातुम्ह परमेश्वर खः। 32 “उकिं हे जिमि परमेश्वर, छि तःधंम्ह, बल्लाम्ह, मानय् यायेमाःम्ह व दयामायाया बाचा पूवंकादीम्ह परमेश्वर खः। अश्शूरया जुजुपिनिगु इलंनिसें थौं तक जिमिसं, जिमि जुजुपिं, जिमि हाकिमत, जिमि पुजाहारीत व जिमि अगमवक्तात, जिमि पुर्खात व छिकपिनि फुक्क मनूतय्सं गुलि दुःख फयागु दु व लुमंकादिसँ। 33 छिं जिमित सजाँय बियाः खःगु हे यानादिल, जिमिसं पाप याःसां छि विश्वास याये बहःम्ह जुयादीगु दु। 34 जिमि जुजु, नायः व पुजाहारीत व पुर्खातय्सं नं छिगु व्यवस्था पालन याःगु मदु। इमिसं छिगु आज्ञा व ख्याच्वः मन्यं। 35 इमिगु थःगु राज्य दुबलय् नं इमिसं छिगु सेवा मयाः। अय्नं छिं इमित भिं यानादिल। छिं इमित तःधंगु लखं लाःगु जमिन बियादिल अय्नं इपिं थःगु मभिंगु ज्यां लिहां मवः। 36 “स्वयादिसँ, छिं जिमि पुर्खातय्त फलत नयेत बियादीगु व भिंगु अन्न सःगु देशय् थौं जिपिं दास जुयागु दु। 37 जिमिसं पाप यानागुलिं जिमि च्वय् तयादीपिं जुजुपिन्थाय् जिमिगु बुँइ सःगु फुक्क अन्न यंकेमाः। इमिसं जिमित व जिमि सा द्वहंतय्त थःयत्थें याइगु। जिपिं तःधंगु दुःखय् लाःगु दु। 38 “थुपिं फुक्क कारणं जिपिं इस्राएलीतय्सं च्वयाः थ्व बचं बी। अले जिमि नायः, लेवी व पुजाहारीतय्सं थुकी सही छाप तयाबी।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.