नहेम्याह 5 - नेवाः बाइबलमगाःमचाःपिन्त क्वत्यलातःगु 1 छुं ई लिपा मिजंत व इमि कलाःपिन्सं थः यहूदी किजापिनिगु विरोधय् कचकच याना हल। 2 गुलिसिनं धाल, “जिमि काय्म्ह्याय्पिं यक्व दु, जिपिं म्वायेत जिमित अन्न माःगु दु।” 3 मेपिन्सं थथे धाल, “अनिकालया इलय् अन्न कयाहयेत जिमिसं थःगु बुँ, छेँ व दाखक्यब बरः तयाः च्वनागु दु।” 4 अज्ज मेपिन्सं धाल, “जिमिसं बुँ व दाखक्यबया कर जुजुयात पुलेत धिबा त्यासाकाये माःगु दु। 5 मेपिं यहूदीत थें जिपिं नं यहूदीत खः। जिमि काय्म्ह्याय्पिं इमि काय्म्ह्याय्पिं थें च्वँ। अय्नं जिमिसं थःकाय् म्ह्याय्पिन्त दास दय्काः च्वनागु दु। गुलिंसिया म्ह्याय्पिं ला न्हापा हे दासी जुइ धुंकूगु दु। अय्नं जिमिसं छुं नं याये मफु, छाय्धाःसा जिमिगु बुँ व दाखक्यब मेपिनिगु जुइ धुंकूगु दु।” 6 इमिगु कचकच व द्वपं न्यनाः जितः तसकं तं पिहां वल। 7 जिं छुं यायेगु क्वःछिना अले जिं भारदारत व हाकिमतय्त द्वपं बिया। जिं इमित धया, “छिमिसं थः यहूदी दाजुकिजापिन्के हे अप्वः ब्याज कयाच्वंगु दु।” थ्व समस्याया बारे सहलह यायेत जिं सकसितं छगू सभाय् मुंका। 8 अले जिं धया, “फत्तिंफत्तले झीसं विदेशीतय्गु ल्हातय् म्यूपिं झी थः हे यहूदी जातियापिन्त धिबा पुलाः त्वःतकागु दु। आः छिमिसं धाःसा थः हे किजा केहेँपिन्त न्यायेगु व मीगु यानाहःगु दु। छम्ह यहूदीयात मेम्ह यहूदीया ल्हातय् मियाच्वंगु दु। थ्व गज्याःगु खँ खः?” इपिं सुम्क च्वन छाय्धाःसा इमिके धायेत छुं खँ मदु। 9 जिं हाकनं धया, “छिमिसं खःगु ज्या यानाच्वंगु मदु। मेगु जातियापिं झी शत्रुतय्सं हेबाय् चबाय् मयायेमा धकाः छिपिं झी परमेश्वरया भय कयाः च्वने म्वा ला? 10 जि व जिमि किजापिन्सं अले जिगु अधीनय् दुपिं मनूतय्सं नं इमित धिबा व अन्न त्यासा बियाच्वनागु दु। झीसं ब्याज कायेगु त्वःताबी हे माः। 11 थौं हे इमिगु बुँ, दाखक्यब व जैतूनया क्यब व छेँ इमित लितब्यु। छिमिसं इमित धिबा, अन्न, न्हूगु दाखमद्य, चिकं त्यासा ब्यूबलय् इमिके काःगु ब्याज नं लितब्यु।” 12 इमिसं धाल, “जिमिसं लितबी, इमिके छुं काये मखुत। जिमिसं छिं धाःथें हे याये।” अले जिं पुजाहारीतय्त सःताः इमिगु न्ह्यःने भारदारत व हाकिमतय्त इमिगु थ्व बचंकथं ज्या यायेत पाफय्का। 13 जिं थःगु वसःया गुजि दुथाय् थाथा यानाः धया, “थःगु बचं पूमवंकीपिं सकलें मनूतय्त परमेश्वरं इमिगु छेँ व धन सम्पत्तिं थुकथं हे थाथा यानाः लिकया दीमा।” थ्व जुइ धुंकाः सभाय् मूंपिं सकल मनूतय्सं धाल, “अथे हे जुइमा!” इमिसं परमप्रभुयात तःधंकल। अले मनूतय्सं थःगु थ्व बचंकथं ज्या यात। नहेम्याह थः कतिलाःसिं मजूगु 14 अर्तासास्त जुजुयागु निइगूगु दंनिसें स्विनिगू दँ तक जि यहूदायाम्ह राज्यपाल जुया। थुपिं झीनिदँ यंकं हे जि व जिमि किजापिन्सं राज्यपालयात दइगु नसा भत्ता मकया। 15 अय्नं जि स्वयाः न्हापायापिं राज्यपालतय्सं मनूतय्त क्वत्यलातःगु खः। अले इमिके मरि, दाखमद्य, अले थुपिंनापं पिइगू शेकेल वहः काइगु। इमि च्यःतय्सं नं मनूतय्त अत्याचार याःगु खः। अय्नं जिं थथे मयाना, छाय्धाःसा जि परमेश्वर खनाः ग्याः। 16 उकिया पलेसा जिं पखाः दय्केगु ज्याय् तसकं मेहनत याना। जिमि सकलें मनूत अन मुन। जिमिसं इमिके छकुचा नं जमिन मकया। 17 न्ह्याबलें जिं थःनापं सछि व नेय्म्ह यहूदी व हाकिमतय्त नकेगु याना। इपिं त्वःताः जःखः च्वंगु देशं जितः नापलाः वइपिं मनूतय्त नं जिनापं हे नका। 18 न्हियान्हिथं नयेत छम्ह द्वहं, खुम्ह बांलापिं फै, यक्व झंगःपन्छितय्त ज्वरय् याइगु। झिन्हुइ छक्वः माक्व फुक्क कथंयागु दाखमद्य बीगु। अय्नं जिं मनूतय्सं गुलिमछि कु क्वबीमाः धकाः स्यू। उकिं जिं राज्यपालयात दयेमाःगु नसा गुबलें मफ्वना। 19 “हे जिमि परमेश्वर, जिं थ्व जातिया निंतिं यानागु फुक्क ज्या जिगु भिंया निंतिं लुमंका तयादिसँ।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.