मर्कूस 9 - नेवाः बाइबल1 वय्कलं हानं धयादिल – “थुलि जक मखु, जिं छिमित मेगु नं धाये – थन दनाच्वंपिं मध्ये गुम्हं गुम्हं मनूत परमेश्वरयागु राज्य झःझः धाय्क वःगु मखंतले सी मखु।” येशूयागु रूप ह्यूगु मत्ती १७:१-१३ ; लूक ९:२८-३६ 2 खुन्हु लिपा येशू पत्रुस, याकूब व यूहन्नायात ब्वनाः पहाडय् झाल। अन मेपिं सुं हे मदु। इमिसं स्वस्वं हे वय्कःयागु रूप हिला वन। 3 वसः यचुसे त्वइसे च्वनाः थिनाच्वन, थथे ला थ्व संसारय् च्वंपिं सुनानं यचुके फइ मखु। 4 अन एलिया व मोशा खनेदयावल। इपिं येशू नाप खँ ल्हानाच्वन। 5 थ्व खनाः पत्रुसं वय्कःयात धाल – “गुरुजु, झीपिं थन हे च्वने दत धाःसा गुलि बांलाइ। जिमिसं स्वंगू बल्चा दय्के ला। छगू छितः, छगू मोशायात व मेगु छगू एलियायात।” 6 इपिं तसकं हे ग्याःगुलिं पत्रुसं छु धायेत्यंगु खः वं धाये मसल। 7 अले सुपाँय् वयाः इमित त्वपुल। सुपाँय् दुनें थथे धयाहःगु सः ताये दत – “थ्व जि यःम्ह काय् खः। थ्वं धाःगु खँ न्यँ।” 8 इमिसं छचाःखेलं स्वल, सुं हे मखन, अन ला इपिं व येशू जक दु। 9 पहाडं क्वहां झाया च्वंबलय् वय्कलं इमित थथे उजं बियादिल – “मनूया काय् सिनाः म्वाना मवतलय् थ्व खँ सुयातं धाये मते।” 10 थथे धयादीगुलिं इमिसं सुयातं मसीकुसे मनय् जक तया तल। अय्सां इमिसं सिनाः म्वायेगु धाःगु छु जुइ धकाः थःथवय् खँ ल्हानाच्वन। 11 अले वय्कःयाके न्यन – “शास्त्रीतय्सं न्हापालाक एलिया हे वयेमाः धकाः छाय् धयाच्वंगु?” 12 वय्कलं धयादिल – “खः, एलिया निं न्हापालाक वयाः फुक्कं मिलय् याइ। मनूया काय्नं यक्व दुःखकष्ट सियाः हेला याका च्वनेमाली धकाः छाय् धर्मशास्त्रय् च्वयातःगु? 13 जिं छिमित धात्थें धाये – एलिया ला वये धुंकल। धर्मशास्त्रय् च्वया तः थें तुं इमिसं वयात यःथें यानाः दुःखकष्ट बियाछ्वत।” भूत दुब्यूम्ह मचायात लाय्कादीगु मत्ती १७:१४-२१ ; लूक ९:३७-४३ 14 वय्कःपिं मेपिं चेलातय्थाय् लिहां झाःबलय् अन यक्व मनूत मुनाच्वंगु व शास्त्रीत वय्कःया चेलात लिसे हालाच्वंगु खन। 15 वय्कःपिं झाःगु खनाः फुक्क मनूत छक्क जुयाः ब्वाँय् वनाः लसकुस यात। 16 अले वय्कलं न्यनादिल – “छिपिं इपिं नाप छु खँय् हालाच्वनागु?” 17 छम्हय्सिनं वय्कःयात लिसः बिल – “गुरुजु, जिं जिमि काय्यात लाताम्ह भूत दुबिना च्वंगुलिं छिथाय् हया। 18 भूत दुबित धायेवं व बँय् जू वनी, अले ई भ्वाललल भ्वाललल ल्ह्वयाः वाकुधी न्ह्ययाः तिल्ल प्यना वनी। छिकपिनि चेलातय्त भूत पिछ्वया ब्यु धकाः धयां इमिसं पिछ्वये मफुत।” 19 अले वय्कलं धयादिल – “छिमिसं गथे जक विश्वास याये मफुगु? जि छिपिंनाप गुलि हे च्वनीतिनि धकाः? जिं छिमिगु निंतिं गुलि जक दुःख सह यानाच्वनेगु? मचायात थन हजि।” 20 अले मचायात वय्कःयाथाय् हल। भूतआत्मां येशूयात खनेवं मचायात कसाः यानाः बँय् छ्वावात। अले मचां ग्वारा ग्वारा तुलाः म्हुतुइ ई भ्वाललल भ्वाललल वय्कल। 21 थ्व खनाः वय्कलं न्यनादिल – “थथे जूगु गुलि दत?” बौम्हय्सिनं धाल – “मचांनिसें। 22 थ्व भूतआत्मां वयात स्यायेत अप्वः हे मिइ व लखय् वान्छ्वया बी धुंकल। छिं छुं यानादी फुसा, दया यानाः ग्वाहालि यानादिसँ रे।” 23 अले वय्कलं धयादिल – “जिं याये फु धकाः छं विश्वास याःसा मजी माःगु छु दु धकाः? विश्वास याःपिन्त ला फुक्कं जुइ।” 24 उघ्रिमय् वं धाल – “जिं विश्वास याना, अय्नं विश्वासय् बमलाःनिगुलिं जितः ग्वाहालि यानादिसँ।” 25 ग्वाः ग्वाः मनूत वयाच्वंगु खनाः वय्कलं भूतआत्मायात हक्काः धयादिल – “हे लाताम्ह व ख्वाँय्म्ह भूतआत्मा, जिं छन्त धयाच्वना – वयाथासं पिहां वा, अले हानं गुबलें हे वयाके दुबी मते।” 26 भूतआत्मा चिल्लाय् दना हालाः मचायात इसाःथिसाः यानाः पिहां वल। अले व मचा सीम्ह थें च्वना वन। फुक्कसिनं ला मचा सित हे धकाः धाल। 27 तर वय्कलं ल्हाः ज्वनाः थनादिल, अले व दना वल। 28 छेँय् दुने झाये धुंकाः चेलातय्सं सुतुक्क वय्कःयाके थथे धकाः न्यन – “जिमिसं भूतयात छाय् पिछ्वये मफुगु?” 29 वय्कलं धयादिल – “थज्याःम्ह भूतयात ला प्रार्थना मयाय्कं पिछ्वये फइ मखु।” येशूं हानं थः सीगु खँ कनादीगु मत्ती १७:२२-२३ ; लूक ९:४३-४५ 30 अनं वय्कःपिं गालील जुयाः झाल। वय्कःपिं गन वनाच्वंगु धकाः सुनां मसीमा धयागु वय्कःया इच्छा खः। 31 छाय्धाःसा लँय् वँवं वय्कलं चेलातय्त थथे धकाः स्यनादिल – “मनूया काय्यात ज्वनाः मनूतय्गु हे ल्हातय् लः ल्हाइगु ई वइन। इमिसं वयात स्याइ, अले स्वन्हु दय्काः हानं म्वाना वइ।” 32 इमिसं धाःसा वय्कलं धयादीगु खँ बांलाक मथू, अय्सां न्यनेत ग्यात। दकलय् तःधंम्ह सु? मत्ती १८:१-५ ; लूक ९:४६-४८ 33 वय्कःपिं कफर्नहुमय् थ्यंकाः छेँय् झाये धुंकाः वय्कलं इमिके “लँय् छु खँ ल्हाना च्वनागु?” धकाः न्यनादिल। 34 इपिं सुम्क च्वन, छाय्धाःसा लँय् इपिं मध्ये सु तःधं धकाः हाला वयाच्वंगु खः। 35 अले वय्कलं फ्यतुनाः झिंनिम्हय्सितं सःताः थथे धयादिल – “दकलय् न्हापा जुइत स्वइम्हय्सियां दकलय् लिपा च्वनेमाः, अले फुक्कसियां च्यः जुइमाः।” 36 थुलि धयाः वय्कलं छम्ह मचायात हयाः इमि दथुइ तयादिल। अले वयात मुलय् तयाः इमित धयादिल – 37 “सुनां जिगु नामय् थज्याःम्ह मचायात लसकुस याइ, वं जितः हे लसकुस याःगुति ग्यनी। सुनां जितः लसकुस याइ वं जितः लसकुस याःगु मखु, जितः छ्वया हःम्हय्सित लसकुस याःगु खः।” सु झी शत्रु मखु व झीम्ह हे मनू खः लूक ९:४९-५० 38 छन्हु यूहन्नां येशूयात धाल – “गुरुजु, जिमिसं छिगु नामं भूत ख्यानाः च्वंम्ह छम्ह मनूयात खना। जिमिसं वयात अथे याये मते धकाः धया, छाय्धाःसा व झीपिंलिसे जुयाच्वंम्ह मखु।” 39 वय्कलं धयादिल – “वयात पने मते, छाय्धाःसा जिगु नामं ततःधंगु ज्या यानाच्वंपिं सुनानं जितः मभिंके छालि मखु। 40 सु झी शत्रु मखु, व झीम्ह हे मनू खः। 41 जिं छिमित धात्थें धाये – सुनानं ख्रीष्टया मनूत धकाः छिमित लः जक त्वंकूसां वयात इनाम दइ।” पापय् लाकीगु खँ मत्ती १८:६-९ ; लूक १७:१-४ 42 “सुनानं जितः विश्वास यानाच्वंम्ह छम्ह चिधंम्ह मनूयागु जक नं विश्वास स्यंकेत स्वल धाःसा वयात गःपतय् ल्वहंघः घाकाः समुद्रय् वांछ्वयेगु हे बांलाइ। 43 छंगु ल्हातं छन्त पापय् लाकी धाःसा उकियात पाला छ्व। निपा ल्हाः दय्काः नरकयागु गुबलें मसीगु मिइ लाय्गु स्वयाः ला ल्हाः मदय्क म्वानाच्वनेगु हे भिं। 44 अन छ्वयाच्वंगु मि गुबलें सी मखु, अले हानं की नं गुबलें हे सी मखु। 45 छंगु तुतिं छन्त पापय् लाकी धाःसा उकियात पाला छ्व। तुति निपा दय्काः नरकयागु गुबलें मसीगु मिइ लायेगु स्वयाः ला तुति मदय्क म्वानाच्वनेगु हे भिं। 46 अन छ्वयाच्वंगु मि गुबलें सी मखु, अले हानं की नं गुबलें हे सी मखु। 47 अथे हे छंगु मिखां छन्त पापय् लाकी धाःसा उकियात लिकयाः वान्छ्वया ब्यु। मिखा निगलं मदयेका नरकयागु मिइ वांछ्वय्का च्वनेगु स्वयाः ला छंगु लागि कां जुयाः परमेश्वरयागु राज्यलय् दुहां वनेगु हे भिं। 48 अन छ्वयाच्वंगु मि गुबलें सी मखु, अले हानं की नं गुबलें सी मखु। 49 “छम्ह छम्हय्सित मिं हे चि सवाः वय्की। 50 चि भिं जू, अथेसां चिं चियागु सवाः तंकूसा गय् यानाः चि सवाः वय्केगु? छिपिं चि सवाः वःपिं जुयाच्वँ, अले फुक्क नाप मिलय् जुयाच्वँ।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.